ଭଞ୍ଜନଗର,୨।୪(ବାବୁଲା ପ୍ରଧାନ)-ଗଞ୍ଜାମ ଜିଲା ଭଞ୍ଜନଗର ଘୁମୁସର ଉତ୍ତର ବନଖଣ୍ଡରେ ହାତୀ ସମେତ ବିଭିନ୍ନ ପ୍ରାଣୀ ନିର୍ଦ୍ଧିଷ୍ଟ ଅଞ୍ଚଳ ମଧ୍ୟରେ ଅଧିକାଂଶ ସମୟ ବସବାସ କରନ୍ତି। ତେଣୁ ସେମାନଙ୍କ ସୁରକ୍ଷା ବିଭାଗୀୟ କର୍ମଚାରୀମାନଙ୍କ ପାଇଁ ଅନେକ ସମୟରେ ଚ୍ୟାଲେଞ୍ଜ ସୃଷ୍ଟି କରୁଛି। କର୍ମଚାରୀମାନେ ପର୍ଯ୍ୟାୟକ୍ରମେ ବିଭିନ୍ନ ସେକ୍ସନରେ ଡ୍ୟୁଟି କରୁଛନ୍ତି। ଏଥିସହ ପାଦ ଚଲା ପାଟ୍ରୋଲିଁ କରୁଛନ୍ତି। ବିଭାଗୀୟ ଉଚ୍ଚ କର୍ତ୍ତୃପକ୍ଷ ଡ୍ୟୁଟି ଠିକ୍ ଭାବେ ହେଉଛି କି ନାହିଁ ମଧ୍ୟ ଯାଞ୍ଚ କରୁଛନ୍ତି। ବର୍ତ୍ତମାନ ଗ୍ରୀଷ୍ମ। ଜଙ୍ଗଲରେ ନିଆଁ ମଧ୍ୟ ଲାଗୁଛି। ନିଆଁ ଲିଭାଇବା ପାଇଁ ଆବଶ୍ୟକ କର୍ମଚାରୀ ଅଭାବ। ବିଗତ କିଛି ମାସ ମଧ୍ୟରେ ଏହି ବନଖଣ୍ଡରେ ଶତାଧିକ ସ୍ଥାନରେ ଜଙ୍ଗଲ ନିଆଁ ଲାଗିଥିଲା। ପରବର୍ତ୍ତୀ ପର୍ଯ୍ୟାୟରେ ତାହାକୁ ଗ୍ରାମବାସୀଙ୍କ ସହଯୋଗରେ ନିୟନ୍ତ୍ରଣ କରାଯାଇଛି । ତଥାପି ଆଗକୁ ଜଙ୍ଗଲ ନିଆଁ ବଢିବା ସମ୍ଭାବନା ରହିଛି। ତେଣୁ ବିଭାଗୀୟ ଉଚ୍ଚ କର୍ତ୍ତୃପକ୍ଷ ଏଥିପ୍ରତି ଦୃଷ୍ଟି ଦେଇ କିଛି ଅସ୍ଥାୟୀ କର୍ମଚାରୀ ନିଯୁକ୍ତି ଦେବାକୁ ଦାବୀ ହୋଇଛି।
