ଡେରାବିଶ,୩୧ା୧୦(ସ୍ବ.ପ୍ର.): ବାତ୍ୟା, ବନ୍ୟା ଭଳି ପ୍ରାକୃତିକ ବିପର୍ଯ୍ୟୟ ସମୟରେ ସାଧାରଣ ଲୋକ ଓ ଗୃହପାଳିତ ପଶୁଙ୍କୁ ସୁରକ୍ଷା ଦେବାକୁ ରାଜ୍ୟ ସରକାରଙ୍କ ପକ୍ଷରୁ ବିଭିନ୍ନ ସ୍ଥାନରେ ବାତ୍ୟା ଆଶ୍ରୟସ୍ଥଳ ନିର୍ମାଣ କରାଯାଉଛି। ହେଲେ ନିର୍ମାଣ ଚାଲିଥିବା ବତ୍ୟା ଆଶ୍ରୟସ୍ଥଳ ନିମ୍ନମାନର ହେଉଥିବା ଅଞ୍ଚଳବାସୀଙ୍କ ପକ୍ଷରୁ ଅଭିଯୋଗ ହେଉଛି। ଏଭଳି ଘଟଣା ଦେଖିବାକୁ ମିଳିଛି କେନ୍ଦ୍ରାପଡ଼ା ଜିଲା ଅନ୍ତର୍ଗତ ଡେରାବିଶ ବ୍ଲକ ଇନ୍ଦାଳୋ ପଞ୍ଚାୟତ ଛକନା ଗ୍ରାମରେ। ଛକନା ଗ୍ରାମରେ ଶାରଦା ଏକାଡ଼େମୀ ନିକଟରେ ୨ ମହଲା ବିଶିଷ୍ଟ ବାତ୍ୟା ଆଶ୍ରୟସ୍ଥଳ ନିର୍ମାଣ ପାଇଁ କେନ୍ଦ୍ରାପଡ଼ା ଜିଲା ଗ୍ରାମ୍ୟ ଉନ୍ନୟନ ବିଭାଗ ପକ୍ଷରୁ ୧ କୋଟି ୫୦ଲକ୍ଷରୁ ଊର୍ଦ୍ଧ୍ୱ ଟଙ୍କା ବ୍ୟୟରେ ଜଣେ ଠିକାଦାରଙ୍କୁ କାର୍ଯ୍ୟାଦେଶ ଦିଆଯାଇଥିଲା। ଏହି ନିର୍ମାଣ କାର୍ଯ୍ୟ ୨୦୨୨ ଜୁନ୍ ୬ ତାରିଖ ସୁଦ୍ଧା ଶେଷ ହେବା ପାଇଁ ଠିକାଦାର ଚୁକ୍ତି କରିଥିଲେ। ମାତ୍ର ଅବଧି ଶେଷ ହୋଇଥିଲେ ମଧ୍ୟ ଠିକାଦାର ଏହି କାର୍ଯ୍ୟରେ ଶିଥିଳତା କରିଥିବାବେଳେ ଏହି ଗୃହର ଅର୍ଦ୍ଧେକ କାର୍ଯ୍ୟ ମଧ୍ୟ ଅଦ୍ୟାବଧି ସାରି ନାହିଁ। ୩୦୦୦ ବର୍ଗଫୁଟ ବିଶିଷ୍ଟ ଏହି ଗୃହର ପ୍ରଥମ ମହଲା ଛାତ ପଡ଼ିଥିବା ବେଳେ ଦ୍ୱିତୀୟ ମହଲା ଗୃହର ଛାତ ପାଇଁ ବ୍ୟବହୃତ ହେବାକୁଥିବା ଗୋଡ଼ି ଓ ଅନ୍ୟ ନିର୍ମାଣ ସାମଗ୍ରୀ ନିମ୍ନମାନର ବୋଲି ପୂର୍ବତନ ସରପଞ୍ଚ ଅଶ୍ୱିନୀ କୁମାର ମହାନ୍ତି, ଜ୍ଞାନରଞ୍ଜନ ମହାନ୍ତି, ରଞ୍ଜନ କୁମାର ସାହୁ ପ୍ରମୁଖ ବିଭାଗୀୟ ଉଚ୍ଚ କର୍ତ୍ତୃପକ୍ଷଙ୍କ ନିକଟରେ ଅଭିଯୋଗ କରିଛନ୍ତି।
ଅଭିଯୋଗ ଅନୁଯାୟୀ, ଏହି ଦୁଇମହଲା ଗୃହର କାର୍ଯ୍ୟ ଆରମ୍ଭରୁ ଠିକାଦାର ଜଣକ ନିମ୍ନମାନର କାମ କରୁଥିବା ଓ ଏହାକୁ ପ୍ରତିବାଦ କଲେ ମଧ୍ୟ ଦାୟିତ୍ୱରେ ଥିବା ବିଭାଗୀୟ କନିଷ୍ଠ ଯନ୍ତ୍ରୀ ହେୟଜ୍ଞାନ ମନେ କରୁଛନ୍ତି। ଠିକାଦାରଙ୍କ ମନମାନୀ ଫଳରେ ସମ୍ପୂର୍ଣ୍ଣ ଆଶ୍ରୟସ୍ଥଳଟି ଏକ ବିପଦସଙ୍କୁଳ ଅବସ୍ଥାକୁ ଚାଲି ଆସିଛି ବୋଲି ଅଭିଯୋଗରେ ଉଲ୍ଲେଖ କରାଯାଇଛି। ଶନିବାର ବିଭାଗୀୟ କନିଷ୍ଠ ଯନ୍ତ୍ରୀ ଶାରଦା ଭୂଷଣ ରାୟ ଘଟଣାସ୍ଥଳକୁ ଆସି କାର୍ଯ୍ୟର ତଦାରଖ କରୁଥିବା ବେଳେ ଗ୍ରାମବାସୀ ଛାତ ପକାଇବା ପାଇଁ ଆସିଥିବା ଗୋଡ଼ି ବଦଳରେ ବଜୁରୀରେ ନ ପକାଇବା ପାଇଁ କହିଥିଲେ। ତେବେ ଏହାକୁ ବେଖାତିର କରି ଠିକାଦାର ନିର୍ମାଣ କାର୍ଯ୍ୟକୁ ଆଗେଇ ନେଉଥିବାରୁ ପ୍ରାକୃତିକ ବିପର୍ଯ୍ୟୟ ସମୟରେ ଜନସାଧାରଣ ଓ ଗୃହପାଳିତ ପଶୁଙ୍କ ଆଶ୍ରୟ ନେବା ସମ୍ପୂର୍ଣ୍ଣ ବିପଦ ପାଲଟିବ। ଉଚ୍ଚ କର୍ତ୍ତୃପକ୍ଷ ତୁରନ୍ତ ଘଟଣାସ୍ଥଳ ପରିଦର୍ଶନ କରି ଏ ନେଇ ପଦକ୍ଷେପ ନ ନେଲେ ଏହି କାର୍ଯ୍ୟକୁ ବିରୋଧ କରାଯିବ ବୋଲି ଅଶ୍ୱିନୀ କହିଛନ୍ତି। ଏ ସମ୍ପର୍କରେ ବିଭାଗୀୟ ଯନ୍ତ୍ରୀ ରାୟଙ୍କୁ ପଚାରିବାରୁ ବାତ୍ୟା ଆଶ୍ରୟସ୍ଥଳ କାର୍ଯ୍ୟରେ କୌଣସି ଅନିୟମିତତା ହୋଇନାହିଁ କିମ୍ବା ନିମ୍ନମାନର ସାମଗ୍ରୀ ଠିକାଦାର ବ୍ୟବହାର କରିନାହାନ୍ତି ବୋଲି ସେ କହିଛନ୍ତି। ତେବେ ଯନ୍ତ୍ରୀଙ୍କ ଏହି ଉତ୍ତରକୁ ନେଇ ସାଧାରଣରେ ତୀବ୍ର ଅସନ୍ତୋଷ ପ୍ରକାଶ ପାଇଛି।
