ମୁମ୍ବାଇ, ୧୩ା୫ (ଆଇଏଏନ୍ଏସ୍): ମୁମ୍ବାଇ ପୋଲିସର ପୂର୍ବତନ କମିଶନର ପରମବୀର ସିଂଙ୍କ ବିରୋଧରେ ଥିବା ସମସ୍ତ ଅଭିଯୋଗକୁ ମହାରାଷ୍ଟ୍ର ସରକାର ପ୍ରତ୍ୟାହାର କରିନେଇଛନ୍ତି। ଏଥିସହ ଶୁକ୍ରବାର ତାଙ୍କ ଉପରୁ ନିଲମ୍ବନ ଆଦେଶକୁ ଉଠାଇଦିଆଯାଇଛି। ଦୁଇବର୍ଷ ପୂର୍ବେ ମହାରାଷ୍ଟ୍ରର ପୂର୍ବତନ ଗୃହମନ୍ତ୍ରୀ ଅନୀଲ ଦେଶମୁଖଙ୍କ ବିରୋଧରେ ପରମବୀର ଲେଖିଥିବା ଚିଠି ରାଜ୍ୟ ରାଜନୀତିରେ ହଇଚଇ ସୃଷ୍ଟି କରିଥିଲା। ତତ୍କାଳୀନ ମହାବିକାଶ ଅଘାଡ଼ି ସରକାର ତାଙ୍କୁ ୨୦୨୧ ଡିସେମ୍ବର ୨ରୁ ଅବସର ତାରିଖ ୨୦୨୨ ଜୁନ୍ ୩୦ ପର୍ଯ୍ୟନ୍ତ ଚାକିରିରୁ ନିଲମ୍ବନ କରିଥିଲେ। ମେ’ ୧୦ରେ ଗୃହ ବିଭାଗ ଜାରି କରିଥିବା ନିର୍ଦ୍ଦେଶନାମା ଅନୁଯାୟୀ ସେହି ସମୟରେ ପରମବୀର ଡ୍ୟୁଟିରେ ଥିଲେ ବୋଲି ଧରାଯିବ। ସେ ଅବସର ନେଇସାରିଥିବାରୁ ବର୍ତ୍ତମାନର ନିର୍ଦ୍ଦେଶନାମା ଅନୁଯାୟୀ ସେ ଅନେକ ଅବସରକାଳୀନ ସୁବିଧା ପାଇବାକୁ ହକ୍ଦାର ହେବେ। ଏହା ଉପରେ ପ୍ରତିକ୍ରିୟା ପ୍ରକାଶ କରି ଏନ୍ସିପି ମୁଖପାତ୍ର କ୍ଲାଇଡ୍ କ୍ରାଷ୍ଟୋ କହିଛନ୍ତି, ଯେଉଁମାନେ ମହାବିକାଶ ଅଘାଡ଼ି ସରକାରକୁ ବଦନାମ କରିଥିଲେ, ସେମାନଙ୍କୁ ଏବେ ଓ୍ବାଶିଂ ମେଶିନ୍ରେ ଧୋଇ ସଫା କରାଯାଉଛି। ପରମବୀରଙ୍କ ପରେ କିଏ ବୋଲି ସେ ପ୍ରଶ୍ନ କରିଛନ୍ତି।
