ଭୁବନେଶ୍ୱର, ୧୦ା୨(ବ୍ୟୁରୋ): ଭୁବନେଶ୍ୱର ଉନ୍ନୟନ କର୍ତ୍ତୃପକ୍ଷ (ବିଡିଏ) ଏବଂ ଓଡ଼ିଶା ରାଜ୍ୟ ଗୃହ ନିର୍ମାଣ ବୋର୍ଡ (ଓଏସ୍ଏଚ୍ବି)ର ହାଉସିଂ ଅଞ୍ଚଳରେ ପ୍ରାୟ ୪ ଦଶନ୍ଧି ଧରି ରହିଥିବା ଜଙ୍ଗଲ ସମସ୍ୟା ଦୂରହେବ। ବୁଧବାର ଲୋକସେବା ଭବନରୁ ଭର୍ଚୁଆଲରେ ମୁଖ୍ୟ ଶାସନ ସଚିବ ସୁରେଶ ଚନ୍ଦ୍ର ମହାପାତ୍ରଙ୍କ ଅଧ୍ୟକ୍ଷତାରେ ବସିଥିବା ଉଚ୍ଚସ୍ତରୀୟ ବୈଠକରେ ଏନେଇ ନିଷ୍ପତ୍ତି ନିଆଯାଇଛି। ମିଳିଥିବା ସୂଚନା ମୁତାବକ, ୧୯୭୦ରୁ ବରମୁଣ୍ଡା, ପାଇକନଗର, କାନନବିହାର ଏବଂ ଜୟଦେବବିହାର ଅଞ୍ଚଳରେ ବସବାସ କରୁଥିବା ଲୋକଙ୍କ ବିଭିନ୍ନ ସମସ୍ୟାକୁ ବିଚାରକରି ମାସକ ମଧ୍ୟରେ ଜଙ୍ଗଲ କିସମ ପରିବର୍ତ୍ତନ ପ୍ରକ୍ରିୟା ଶେଷ କରିବା ପାଇଁ ମୁଖ୍ୟ ଶାସନ ସଚିବ ବିଡିଏକୁ ନିର୍ଦ୍ଦେଶ ଦେଇଛନ୍ତି। କିସମ ପରିବର୍ତ୍ତନ ହେବାକୁ ଥିବା ଜଙ୍ଗଲ ଜମିରେ କ୍ଷତିପୂରଣ ବନୀକରଣ ନିମନ୍ତେ ନିର୍ଦ୍ଦେଶ ଦିଆଯାଇଛି। ଏହାସହ ରାଜସ୍ବ ଏବଂ ବିପର୍ଯ୍ୟୟ ପରିଚାଳନା ବିଭାଗ ଦ୍ୱାରା ପୂର୍ବରୁ ଚିହ୍ନିତ ଜମିରୁ କ୍ଷତିପୂରଣ ବନୀକରଣ ନିମନ୍ତେ ଜମି ଚିହ୍ନଟ କରିବାକୁ କଟକ ଏଡିଏମ୍ ଏବଂ ଆଠଗଡ଼ ଡିଏଫ୍ଓଙ୍କୁ କୁହାଯାଇଛି। ଏହି ପଦକ୍ଷେପ ଦ୍ୱାରା ପ୍ରାୟ ୨ ହଜାର ପରିବାର ଉପକାର ପାଇବେ। ଏହାସହ କ୍ଷତିପୂରଣ ବନୀକରଣ ଲାଗି କୌଣସି ଜଙ୍ଗଲ ଜମି ଆବଣ୍ଟନ ହେବ ନାହିଁ ବୋଲି ମୁଖ୍ୟ ଶାସନ ସଚିବ ସ୍ପଷ୍ଟ କରିଛନ୍ତି। ପତିତ ରାଜସ୍ବ ଜଙ୍ଗଲ ଜମି ଚିହ୍ନଟ କରିବା ସହ କ୍ଷତିପୂରଣ ବନୀକରଣ ନିମନ୍ତେ ଲ୍ୟାଣ୍ଡବ୍ୟାଙ୍କ ଥିବା ଜମିକୁ ଏଥିରେ ସାମିଲ କରିବାକୁ କୁହାଯାଇଛି। ଏହାଫଳରେ ଜଙ୍ଗଲ କିସମ ପରିବର୍ତ୍ତନ ସମସ୍ୟା ଯୋଗୁ କୌଣସି ବିକାଶମୂଳକ ପ୍ରକଳ୍ପ ଅଟକି ରହିବନାହିଁ। ରାଜସ୍ବ ଓ ବିପର୍ଯ୍ୟୟ ପରିଚାଳନା ବିଭାଗ ଅତିରିକ୍ତ ମୁଖ୍ୟ ଶାସନ ସଚିବ ସତ୍ୟବ୍ରତ ସାହୁ କହିଛନ୍ତି, କ୍ଷତିପୂରଣ ବନୀକରଣ ଲାଗି ଲ୍ୟାଣ୍ଡବ୍ୟାଙ୍କ ସୃଷ୍ଟି ହୋଇସାରିଛି। ଜାନୁୟାରୀରେ ୧୮ ଜିଲାରେ ପ୍ରାୟ ୨୬,୫୦୦ ଏକର ପତିତ ରାଜସ୍ବ ଜଙ୍ଗଲ ଜମି ଚିହ୍ନଟ କରାଯାଇଛି। ଏହି ଜିଲାଗୁଡ଼ିକ ହେଉଛି କେନ୍ଦୁଝର, ସୁନ୍ଦରଗଡ଼, ବଲାଙ୍ଗୀର, ଯାଜପୁର, ମୟୂରଭଞ୍ଜ, ବାଲେଶ୍ୱର, ସମ୍ବଲପୁର, ଅନୁଗୋଳ, କଟକ, ଢେଙ୍କାନାଳ, ଗଞ୍ଜାମ, ଜଗତ୍ସିଂହପୁର, ଝାରସୁଗୁଡ଼ା, ମାଲକାନଗିରି, ନବରଙ୍ଗପୁର, ନୂଆପଡ଼ା, ସୋନପୁର ଏବଂ ନୟାଗଡ଼। ମାସକରେ କେନ୍ଦୁଝର ଜିଲାରେ ପ୍ରାୟ ୧୦,୮୦୦ ଏକର ଜମି ଚିହ୍ନଟ ହୋଇଛି। ସେ ଆହୁରି କହିଛନ୍ତି, ମାର୍ଚ୍ଚ ୨୦୨୨ ସୁଦ୍ଧା ଲ୍ୟାଣ୍ଡବ୍ୟାଙ୍କର ୫୦ ହଜାର ଏକରକୁ ବୃଦ୍ଧି କରିବା ପାଇଁ ଲକ୍ଷ୍ୟ ଧାର୍ଯ୍ୟ କରାଯାଇଛି। ଏହାସହ ବର୍ଷକ ମଧ୍ୟରେ କ୍ଷତିପୂରଣ ବନୀକରଣ ନିମନ୍ତେ ପାଖାପାଖି ୧ ଲକ୍ଷ ହେକ୍ଟର ଜମିକୁ ଲ୍ୟାଣ୍ଡବ୍ୟାଙ୍କ ଫୋଲ୍ଡକୁ ଆଣିବା ପାଇଁ ଲକ୍ଷ୍ୟ ରହିଛି। ବୈଠକରେ ହୋଇଥିବା ନିଷ୍ପତ୍ତି ଅନୁସାରେ, କ୍ଷତିପୂରଣ ବନୀକରଣ ପାଇଁ ଜମି ଆବଣ୍ଟନ ସକାଶେ ରାଜସ୍ବ ଓ ବିପର୍ଯ୍ୟୟ ପରିଚାଳନା ବିଭାଗର ଅତିରିକ୍ତ ମୁଖ୍ୟ ସଚିବ ନୋଡାଲ ଅଧିକାରୀ ରହିବେ। ଉନ୍ନୟନମୂଳକ ପ୍ରକଳ୍ପର କାର୍ଯ୍ୟନିର୍ବାହୀ ସଂସ୍ଥାଗୁଡ଼ିକ ଲ୍ୟାଣ୍ଡବ୍ୟାଙ୍କରୁ କ୍ଷତିପୂରଣ ବନୀକରଣ ଜମି ସକାଶେ ସମ୍ପୃକ୍ତ ଜିଲାର ଏଡିଏମ୍ (ରାଜସ୍ବ)ଙ୍କୁ ଜଣାଇବେ। ଏହି ବୈଠକରେ ଜଙ୍ଗଲ ଓ ପରିବେଶ ବିଭାଗ ଅତିରିକ୍ତ ମୁଖ୍ୟ ସଚିବ ମୋନା ଶର୍ମା, ଗୃହ ନିର୍ମାଣ ଓ ନଗର ଉନ୍ନୟନ ବିଭାଗ ପ୍ରମୁଖ ସଚିବ ଜି. ମାଥିଭାଥାନନ୍, ପ୍ରଧାନ ମୁଖ୍ୟ ବନ ସଂରକ୍ଷକ ଶିଶିର କୁମାର ରଥୋ, ବିଡିଏ ଉପାଧ୍ୟକ୍ଷ ସଞ୍ଜୟ ସିଂଙ୍କ ସମେତ ବିଭାଗଗୁଡ଼ିକର ବରିଷ୍ଠ ଅଧିକାରୀମାନେ ଅଂଶଗ୍ରହଣ କରିଥିଲେ।
