ପୁରୀ ଅଫିସ,୧୩ା୧୧: ସ୍ବଚ୍ଛତା କ୍ଷେତ୍ରରେ ପୁରୀ ହେବ ଦେଶର ଏକ ନମ୍ବର ସହର। ୨୦୨୧ ସ୍ବଚ୍ଛ ସର୍ବେକ୍ଷଣରେ ପୁରୀକୁ କିପରି ଏହି ମାନ୍ୟତା ମିଳିବ ସେଥିଲାଗି ଜିଲା ପ୍ରଶାସନ ପକ୍ଷରୁ ପ୍ରୟାସ ଚାଲିଛି। ଏଥିଲାଗି ମୋ ଧାମ, ମୋ ଗର୍ବ ଅଭିଯାନ ଆରମ୍ଭ କରାଯାଇଥିଲା। ସପ୍ତାହବ୍ୟାପୀ ଏହି ଅଭିଯାନ ବେଳେ ସହରବାସୀଙ୍କ ମଧ୍ୟରେ ସ୍ବଚ୍ଛତାର ବାର୍ତ୍ତା ଦେବା ଲାଗି ବିଭିନ୍ନ ପଦକ୍ଷେପ ଗ୍ରହଣ କରାଯାଇଛି। ଏହି ପବିତ୍ର ମାଟିରେ ଅଳିଆ ପଡ଼ିବାକୁ ଦେବା ନାହିଁ ବୋଲି ସହରବାସୀ ଶପଥ ନେଇଛନ୍ତି। ତେଣୁ ଲୋକଙ୍କ ମଧ୍ୟରେ ଏହି ଅଭ୍ୟାସ ଏବଂ ସ୍ବଚ୍ଛତା ପ୍ରତି ରହିଥିବା ପ୍ରତିବଦ୍ଧତାକୁ ଜିଲାପାଳ ବଲୱନ୍ତ ସିଂ ପରଖିଛନ୍ତି। ଗତ ଦୁଇଦିନ ହେଲା ଜିଲାପାଳ ସକାଳୁ ସାଇକେଲ ଧରି ସହରର ବିଭିନ୍ନ ଗଳିକନ୍ଦି ଏବଂ ମଠ ବୁଲୁଛନ୍ତି। ଯଦି କେଉଁଠି ଆବର୍ଜନା ଗଦା ହୋଇଥିବା ଦେଖୁଛନ୍ତି ତୁରନ୍ତ ତାହାକୁ ଉଠାଇବା ବ୍ୟବସ୍ଥା କରିବା ସହ ଲୋକଙ୍କୁ ସଚେତନ କରୁଛନ୍ତି। ଗୁରୁବାର ଜିଲାପାଳ ବଡ଼ ଓଡ଼ିଆ ମଠ, ରାଧାକାନ୍ତ ମଠ ଓ ଜିୟର ସ୍ବାମୀ ମଠକୁ ଯାଇଥିଲେ। ମଠ ପରିସର ବୁଲିବା ସହ ପ୍ରତ୍ୟହ ଆବର୍ଜନାକୁ ପୃଥକୀକରଣ କରି ସ୍ବଚ୍ଛ ସବାରିରେ ଦିଆଯାଉଛି କି ନାହିଁ ପଚାରିଥିଲେ। ଅତିବଡ଼ି ଜଗନ୍ନାଥ ଦାସଙ୍କ ସାଧନା ପୀଠ ବଡ଼ ଓଡ଼ିଆ ମଠର ସୁରକ୍ଷା ବିଷୟରେ ଅନୁଧ୍ୟାନ କରିଥିଲେ। ଶ୍ରୀମନ୍ଦିର ଚୌହଦୀରେ ଉଚ୍ଛେଦ କାର୍ଯ୍ୟ ଯୋଗୁ ଜମା ହୋଇଥିବା କଠିନ ଆବର୍ଜନା ସ୍ଥାନାନ୍ତର ଲାଗି ନିର୍ଦ୍ଦେଶ ଦେଇଥିଲେ। ଏଥିସହ ଶ୍ରୀମନ୍ଦିର ଚତୁଃପାର୍ଶ୍ୱ ଅଞ୍ଚଳରୁ ମହାପ୍ରସାଦର ବଳକା ଅଂଶ, ଲାଗି ଫୁଲ, ତୁଳସୀ ଆଦିକୁ ସସମ୍ମାନ ସ୍ଥାନାନ୍ତର ପାଇଁ ନିୟୋଜିତ କୈବଲ୍ୟ ରଥ ଠିକ୍ ଭାବେ କାମ କରୁଛି ନା ନାହିଁ ତାହାର ଅନୁଧ୍ୟାନ କରିଥିଲେ। ଜିଲାପାଳଙ୍କ ସହ ପୌରସଂସ୍ଥା ନିର୍ବାହୀ ଅଧିକାରୀ ବିଜୟ କୁମାର ଦାଶ, ଶ୍ରୀମନ୍ଦିର ଉନ୍ନୟନ ପ୍ରଶାସକ ଅଜୟ କୁମାର ଜେନା, ଜିଲା ସଂସ୍କୃତି ଅଧିକାରୀ ଚୌଧୁରୀ ଅରବିନ୍ଦ ଦାସ ପ୍ରମୁଖ ସାମିଲ ଥିଲେ।
