ମହାକାଳପଡ଼ା, ୨୪ା୧(ଡି.ଏନ.ଏ.):କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ଉପକୂଳ ଅଞ୍ଚଳରେ ଚାଷୀମାନେ ଅଧିକ ଖର୍ଚ୍ଚାନ୍ତ ହୋଇ ଖରିଫ ଋତୁରେ ଧାନ ଚାଷ କରିଛନ୍ତି। ତେବେ ଚାଷୀମାନେ ମଣ୍ଡିରେ ୨୦୪୦ ଟଙ୍କାରେ ଧାନ ବିକ୍ରି ପାଇଁ ସରକାର ନିୟମ କରୁଛନ୍ତି। ହେଲେ ଚାଷୀମାନେ ଅଧିକ ଖର୍ଚ୍ଚାନ୍ତ ହୋଇ ଖରିଫ ଫସଲ ଧାନ ବାସୁମତୀ ପ୍ରତି ଆଗ୍ରହ ପ୍ରକାଶ କରିଛନ୍ତି। କାରଣ ସ୍ଥାନୀୟ ଧାନ ବ୍ୟବସାୟୀମାନେ ଚାଷୀଙ୍କଠାରୁ ବାସୁମତୀ ଧାନକୁ ୩ହଜାର ଟଙ୍କାରେ କିଣି ଆନ୍ଧ୍ର ଓ କୋଲକାତା ବ୍ୟବସାୟୀଙ୍କୁ ବେଶ୍ ଉଚ୍ଚ ମୂଲ୍ୟରେ ବିକ୍ରି କରୁଥିବା ଦେଖିବକୁ ମିଳୁଛି। ଆନ୍ଧ୍ର ଓ କୋଲକାତା ବ୍ୟବସାୟୀମାନେ ଏହି ଅଞ୍ଚଳର ସ୍ଥାନୀୟ ବ୍ୟବସାୟୀଙ୍କୁ ହାତକରି ଚାଷୀଙ୍କଠାରୁ ବାସୁମତୀ ଧାନ ବିପୁଳ ପରିମାଣରେ ଟ୍ରକ୍ ଯୋଗେ ଚାଲାଣ କରୁଛନ୍ତି। ଏଠାରେ ପ୍ରଶ୍ନ ଉଠେ ସରକାର ଚାଷୀମାନଙ୍କ ହିତ ସାଧନ ପାଇଁ ବିଭିନ୍ନ ଯୋଜନା କାର୍ଯ୍ୟକାରୀ କରୁଥିଲେ ମଧ୍ୟ ଚାଷୀଟିଏ ଯେପରି ଅଭାବୀ ବିକ୍ରିର ସମ୍ମୁଖୀନ ନ ହୁଅନ୍ତି ସେଥିପାଇଁ ସମବାୟ ଓ ଯୋଗାଣ ବିଭାଗ ପକ୍ଷରୁ ବ୍ଲକରେ ୨୪ଟି ପ୍ରାଥମିକ କୃଷି ସମବାୟ ସମିତି ଖୋଲାଯାଇଛି। ଏହି ଧାନମଣ୍ଡିଗୁଡ଼ିକରେ ଚାଷୀଙ୍କଠାରୁ କୁଇଣ୍ଟାଲ ଧାନ ପ୍ରତି ୫ କିଲୋ ଧାନ କଟ୍ନି ଛଟ୍ନି କରୁଛନ୍ତି। ଫଳରେ ସ୍ଥାନୀୟ ଚାଷୀମାନେ ମଣ୍ଡିରେ ବିକ୍ରି ନ କରି ବାଧ୍ୟ ହୋଇ ରାଜ୍ୟ ବାହାର ବ୍ୟବସାୟୀଙ୍କୁ ବିକ୍ରିକରି ବେଶ୍ ଦୁଇପଇସା ରୋଜଗାର କରୁଛନ୍ତି। ଏହି ବାସୁମତୀ ଧାନ ବ୍ଲକର ଖରିନାସୀ, ବତୀଘର, ରାମନଗର, ପେଟଛେଲା, ଜମ୍ବୁ, ବଉଳକଣି, ସୁନିତି, ନାଞ୍ଜୁରା ଆଦି ପଞ୍ଚାୟତରୁ ଟ୍ରକ୍ରେ ଚାଲାଣ ହେଉଛି। ଦୈନିକ ୫ରୁ ୧୦ ଟ୍ରକ୍ ଧାନ ରାଜ୍ୟ ବାହାରକୁ ଯାଉଛି। ଏ ସମ୍ପର୍କରେ ବ୍ଲକ ସମବାୟ ଅଧିକାରୀ ଯୋଗେନ୍ଦ୍ର ବିଶ୍ୱାଳଙ୍କ ପଚାରିବାରେ ନିର୍ଦ୍ଦିଷ୍ଟ ଅଭିଯୋଗ ମିଳିଲେ ତଦନ୍ତ କରାଯାଇ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସେ କହିଛନ୍ତି।
