ଖଇରା, ୨।୪(ଡି.ଏନ.ଏ.): ବାଲେଶ୍ୱର ଜିଲା ଅଧୀନ ଖଇରା ବ୍ଲକରେ ହରଘର ଜଳ ଯୋଜନାରେ ୩୦ ପଞ୍ଚାୟତର ପ୍ରତ୍ୟେକ ପରିବାରକୁ ଟ୍ୟାପ ସଂଯୋଗ ମାଧ୍ୟମରେ ବିଶୁଦ୍ଧ ପାନୀୟଜଳ ଯୋଗାଇ ଦିଆଯିବ। ଏଥିପାଇଁ ଯୁଦ୍ଧକାଳୀନ ଭିତ୍ତିରେ ପ୍ରକଳ୍ପ କାର୍ଯ୍ୟ ଆଗେଇ ଚାଲିଛି। ୨୦୨୩ ଶେଷ ସୁଦ୍ଧା ସମସ୍ତ ପ୍ରକଳ୍ପ କାର୍ଯ୍ୟକ୍ଷମ ହେବା ସହ ପାଣି ଉପଲବ୍ଧ କରାଯାଇପାରିବ ବୋଲି ଗ୍ରାମ୍ୟ ପାନୀୟଜଳ ପରିମଳ ବିଭାଗ ସହକାରୀ ଯନ୍ତ୍ରୀ ଜ୍ୟୋତ୍ସ୍ନାମୟୀ ମାରାଣ୍ଡି କହିଛନ୍ତି।
ବ୍ଲକର ୩୭ ପଞ୍ଚାୟତ ମଧ୍ୟରୁ ଶାରୀଶୁଆ ପାହାଡ ସଂଲଗ୍ନ ୭ଟି ପଞ୍ଚାୟତକୁ ମେଗା ପାନୀୟଜଳ ପ୍ରକଳ୍ପ ଅଧୀନରେ ରଖାଯାଇଛି। ଏଥିପାଇଁ ପାଖାପାଖି ୬୪ କୋଟି ଟଙ୍କା ବ୍ୟୟ କରାଯିବାକୁ ଲକ୍ଷ୍ୟ ରଖାଯାଇଛି
ବାକି ୩୦ପଞ୍ଚାୟତକୁ ହରଘର ଜଳ ଯୋଜନାରେ ଜଳ ଯୋଗାଇ ଦିଆଯିବାକୁ ପ୍ରଥମ ପର୍ଯ୍ୟାୟରେ ଓଭରହେଡ ଟାଙ୍କି ଥିବା ୬୯ଟି ପ୍ରକଳ୍ପ ନିର୍ମାଣ କାର୍ଯ୍ୟ ଚାଲୁଛି ା
ଏଥିମଧ୍ୟରୁ ୩ଟି ସମ୍ପୂର୍ଣ୍ଣ ହୋଇ ସାରିଥିବା ବେଳେ ଅଧିକାଂଶ ପ୍ରକଳ୍ପର ନିର୍ମାଣ ଶେଷ ପର୍ଯ୍ୟାୟରେ ପହଞ୍ଚିଛି ା ବିଦ୍ୟୁତ ସଂଯୋଗରେ ବିଳମ୍ବ ପାଇଁ କିଛି ପ୍ରକଳ୍ପ ଶେଷ ହୋଇସାରିଥିଲେ ହେଁ କାର୍ଯ୍ୟକ୍ଷମରେ ଏହା ଅନ୍ତରାୟ ହୋଇଛି। ଏହି ପ୍ରକଳ୍ପ ଅଧୀନରେ ପାଖପାଖି ୧ଶହ ରାଜସ୍ବ ଗ୍ରାମର ୯ହଜାର ୬୫୯ ପରିବାରକୁ ପାନୀୟଜଳ ଯୋଗାଇ ଦିଆଯିବାକୁ ଲକ୍ଷ୍ୟ ସ୍ଥିର କରାଯାଇଛି। ଟ୍ୟାପ ସଂଯୋଗ ବାବଦରେ ପ୍ରତ୍ୟେକ ପରିବାର ୬୦ଟଙ୍କା ଲେଖାଏଁ ପ୍ରଦାନ କରିବାକୁ ନିକଟରେ ଜିଲାପାଳ ସମସ୍ତ ବ୍ଲକକୁ ପ୍ରଦାନ କରିଥିବା ଚିଠିରେ ନିର୍ଦ୍ଦେଶ ଦେଇଛନ୍ତି। କେନ୍ଦ୍ର ସରକାରଙ୍କ ଏହା ଏକ ସୁନ୍ଦର ଯୋଜନା ା
ହେଲେ ଦୀର୍ଘମିୟାଦୀ ଭାବରେ ଏବଂ ଏହାର ରକ୍ଷଣାବେକ୍ଷଣ ନିୟମିତ ବ୍ୟବଧାନରେ କରାଗଲେ ଲୋକମାନେ ଯୋଜନାର ପ୍ରକୃତ ସଫଳତା ଲାଭ କରିପାରିବେ ବୋଲି କଲରାପାଳ ଗ୍ରାମର ଚନ୍ଦ୍ରକାନ୍ତ ବେହେରା କହିଛନ୍ତି ା ବହୁ ଦାବି ପରେ ଖରାଦିନରେ ଶୋଷ ମେଣ୍ଟାଇବାକୁ କେନ୍ଦ୍ର ସରକାରଙ୍କ ଏହି ଯୋଜନାକୁ ନେଇ ଗ୍ରାମବାସୀ ଖୁସି ଜାହିର କରିଛନ୍ତି।
