ଚେନ୍ନାଇ, ୧୫।୨ : ସ୍ଥାନୀୟ ଚେପକ ଗ୍ରାଉଣ୍ଡରେ ଚାଲିଥିବା ଭାରତ-ଇଂଲଣ୍ଡ ଦ୍ୱିତୀୟ ଟେଷ୍ଟ ମ୍ୟାଚ୍ ବେଳେ ସ୍ଥାନୀୟ ସ୍କୁଲର ଜଣେ ଦଶମ ଶ୍ରେଣୀର ଛାତ୍ର କୋଭିଡ୍ ପ୍ରୋଟୋକଲ ଭଙ୍ଗ କରିଛନ୍ତି। ଟେଷ୍ଟ ମ୍ୟାଚର ତୃତୀୟ ଦିନ ଅର୍ଥାତ ସୋମବାର ମଧ୍ୟାହ୍ନ ଭୋଜନ ବିରତି ବେଳେ ଏହି ଘଟଣା ଘଟିଛି। ଦୁଇ ଦଳର ଖେଳାଳିମାନେ ପ୍ୟାଭେଲିଅନ ଫେରିଯିବା ପରେ ଇଂଲଣ୍ଡ ଦଳର ରିଜର୍ଭ ଖେଳାଳିମାନେ ପଡ଼ିଆରେ ଅଭ୍ୟାସ କରିଥିଲେ। ଏହି ସମୟରେ ଉକ୍ତ ଛାତ୍ର ଜଣଙ୍କ ୧୨ ମିଟର ଉଚ୍ଚତା ବିଶିଷ୍ଟ ସୁରକ୍ଷା ବଳୟ ଡେଇଁ ପ୍ରବେଶ କରିଥିଲେ ଗ୍ରାଉଣ୍ଡ ଭିତରେ। କୌଣସି ପୋଲିସକର୍ମୀ ନ ଥିବାରୁ ଛାତ୍ରଙ୍କୁ ରୋକିବାକୁ କେହି ନ ଥିଲେ।
କୁନି ପ୍ରଶଂସକ ଇଂଲଣ୍ଡ ଖେଳାଳିଙ୍କ ସହ ହାତ ମିଳାଇବାକୁ ଚାହୁଁଥିଲେ। କିନ୍ତୁ ଖେଳାଳିମାନେ ମନା କରିବାରୁ ଟିମ୍ ଇଣ୍ଡିଆ ଜର୍ସି ପିନ୍ଧିଥିବା ଛାତ୍ର ଜଣଙ୍କ ସୁରକ୍ଷା ବଳୟ ଡେଇଁ ଗ୍ୟାଲେରିକୁ ଫେରି ଯାଇଥିଲେ। ଏହାପରେ ଉକ୍ତ ଛାତ୍ରଙ୍କୁ ଚେତାବନୀ ଦେବା ସହ ଷ୍ଟାଡିୟମରୁ ବାହାର କରି ଦେଇଥିଲେ ପୋଲିସ ଓ ଗ୍ରାଉଣ୍ଡ ଅଫିସିଆଲ।
