ନୂଆଦିଲ୍ଲୀ, ୨୦।୭: ଦିଲ୍ଲୀରେ ‘କକରୋଚ ଜନତା ପାର୍ଟି’ (CJP) ପକ୍ଷରୁ ଚାଲିଥିବା ବିରୋଧ ପ୍ରଦର୍ଶନ ମଧ୍ୟରେ ଲୋକ ସଭାରେ ବିରୋଧୀ ଦଳର ନେତା ରାହୁଲ ଗାନ୍ଧୀ କେନ୍ଦ୍ର ସରକାରଙ୍କୁ ଟାର୍ଗେଟ କରିଛନ୍ତି। ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଭାରତର ଇତିହାସର ‘ସବୁଠାରୁ ଯୁବ-ବିରୋଧୀ ପ୍ରଧାନମନ୍ତ୍ରୀ’ ବୋଲି ଅଭିହିତ କରିଛନ୍ତି। ସେ କହିଛନ୍ତି ଯେ, ଶିକ୍ଷା ଭଳି ଗୁରୁତ୍ୱପୂର୍ଣ୍ଣ ପ୍ରସଙ୍ଗରେ ପ୍ରଶ୍ନ ଉଠାଉଥିବା ପିଲାମାନଙ୍କ ଉପରେ ଲାଠି ଚଳାଯାଉଛି।
କଂଗ୍ରେସ ଏମ୍ପି ରାହୁଲ ଗାନ୍ଧୀ କହିଛନ୍ତି, “ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଭାରତର ଇତିହାସର ସବୁଠାରୁ ଯୁବ-ବିରୋଧୀ ପ୍ରଧାନମନ୍ତ୍ରୀ। ସେ ଏତେ ଯୁବ-ବିରୋଧୀ ଯେ, ଜଣେ ବିଫଳ ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଇସ୍ତଫା ମଧ୍ୟ ନେଇ ପାରୁନାହାନ୍ତି। ୧୫୨ଟି ପେପର ଲିକ୍ ହୋଇଛି, ୭.୫ କୋଟି ଛାତ୍ରୀଛାତ୍ର କ୍ଷତିଗ୍ରସ୍ତ ହୋଇଛନ୍ତି, କିନ୍ତୁ ଜଣେ ହେଲେ ଦୋଷୀକୁ ସଜା ମିଳିନାହିଁ। ସଜା କାହାକୁ ମିଳିଲା? ପରିଶ୍ରମୀ ଯୁବକମାନଙ୍କୁ। ଯେତେବେଳେ ଏହି ପିଲାମାନେ ଶିକ୍ଷା ବ୍ୟବସ୍ଥାକୁ ନେଇ ଯଥାର୍ଥ ପ୍ରଶ୍ନ ଉଠାଇଲେ, ସେତେବେଳେ ଉତ୍ତରରେ ମିଳିଲା ଲାଠି ଏବଂ ଅଟକ। ପେପର ଲିକ୍ କରୁଥିବା ଅପରାଧୀମାନେ ମୁକ୍ତରେ ବୁଲୁଛନ୍ତି, କିନ୍ତୁ ଯଥାର୍ଥ ପ୍ରସଙ୍ଗ ଉଠାଉଥିବା ଛାତ୍ରମାନଙ୍କୁ ଘୋଷାଡ଼ି ନିଆଯାଉଛି, ପିଟାଯାଉଛି। ଏହି ସରକାର କେବଳ ଯୁବକମାନଙ୍କୁ ବିଫଳ କରୁନାହାନ୍ତି, ବରଂ ସେମାନଙ୍କ ଉପରେ ଅତ୍ୟାଚାର କରୁଛନ୍ତି।”
ପ୍ରିୟଙ୍କା ଗାନ୍ଧୀ କହିଛନ୍ତି, ”ଭାଜପା ସରକାର ପିଲାମାନଙ୍କ ଉପରେ ଲାଠି ଚଳାଇବା ବଦଳରେ ନିଜର ନୀତି ଏବଂ ଅସଫଳତାଗୁଡ଼ିକର ସମୀକ୍ଷା କରିବା ଉଚିତ୍। ପ୍ରଥମେ NEET ପେପର ଲିକ୍ ହେଲା, ପରୀକ୍ଷା ରଦ୍ଦ ହେଲା ଏବଂ Re-NEETରେ ମଧ୍ୟ ଗଡ଼ବଡ଼ି ହୋଇଥିବାର ଖବର ଆସିଛି। କୁହାଯାଇଥିଲା ଯେ ପ୍ରଧାନମନ୍ତ୍ରୀ ନିଜେ ଏହା ଉପରେ ନଜର ରଖିବେ, ତଥାପି ଏସବୁ କାହିଁକି ଏବଂ କିପରି ହେଉଛି? ବାରମ୍ବାର ଏତେ ପେପର ଲିକ୍ କିପରି ହେଉଛି? ସଂସଦରେ ଏହି ପ୍ରସଙ୍ଗରେ ବିସ୍ତୃତ ଆଲୋଚନା ହେବା ଉଚିତ୍ ଏବଂ ପ୍ରଧାନମନ୍ତ୍ରୀ ଦେଶର କୋଟି କୋଟି ଯୁବକଙ୍କ କଥା ଶୁଣିବା ଦରକାର, ସେମାନଙ୍କୁ ଉତ୍ତର ଦେବା ଉଚିତ୍।”
