ଦୁନିଆରେ ଏମିତି ଏକ ଚର୍ଚ୍ଚ ରହିଛି, ଯାହା ୪୦ ହଜାରରୁ ଊର୍ଦ୍ଧ୍ୱ ଲୋକଙ୍କ ହାଡରେ ତିଆରି ହୋଇଛି। ଏହା ଶୁଣିବାକୁ ଆଶ୍ଚର୍ଯ୍ୟ ଲାଗୁଥିଲେ ମଧ୍ୟ ସତ। ଏହା ‘ଚର୍ଚ୍ଚ ଅଫ୍ ବୋନ୍ସ’ ନାମରେ ପରିଚିତ। ଏହାର ପ୍ରତିଷ୍ଠା ପଛର ରହିଥିବା କାହାଣୀ ମଧ୍ୟ ଅତ୍ୟନ୍ତ ଆକର୍ଷଣୀୟ। ‘ସେଡଲେକ ଓସୁଆରି’ ନାମକ ଏହି ଚର୍ଚ୍ଚକୁ ଦେଖିବା ପାଇଁ ସମଗ୍ର ବିଶ୍ୱରୁ ଲୋକେ ଆସିଥାନ୍ତି।
ୟୁରୋପର ଦେଶ ଚେକ ଗଣରାଜ୍ୟର ରାଜଧାନୀ ପ୍ରାଗରେ ୧୮୭୦ ମସିହାରେ ନିର୍ମିିତ ହୋଇଥିଲା ଏହି ଚର୍ଚ୍ଚ। ଏହାକୁ ମାନବ ଅସ୍ଥିରେ ଅତି କଳାତ୍ମକ ଭାବରେ ସଜାଯାଇଛି । ୪୦, ୦୦୦ରୁ ଅଧିକ ମାନବ କଙ୍କାଳକୁ ଏଠାରେ ଏତେ ସୁନ୍ଦର ଭାବେ ସଜାଯାଇଛି ଯେ, ଯେ କେହି ଦେଖିଲେ ଆଶ୍ଚର୍ଯ୍ୟ ହୋଇଯିବେ।
୧୪ ଏବଂ ୧୫ତମ ଶତାବ୍ଦୀରେ ମହାମାରୀ ପ୍ଲେଗ୍ ଏବଂ ଯୁଦ୍ଧ ଯୋଗୁ ବହୁ ଲୋକଙ୍କ ମୃତ୍ୟୁ ଘଟିଥିଲା। ସେମାନଙ୍କୁ ସମାଧି ଦେବା ପାଇଁ ସ୍ଥାନ ନ ଥିଲା। ତେଣୁ ସେଠାକାର ଲୋକଙ୍କ ମନରେ ଏମିତି ଏକ ଚିନ୍ତାଧାରା ଆସିଥିଲା। ପରେ ଏହି କାର୍ଯ୍ୟକୁ ସାଧୁ ତଥା ଧର୍ମଯାଜକମାନଙ୍କୁ ହସ୍ତାନ୍ତର କରାଗଲା। ଏହି ଚର୍ଚ୍ଚର ମୁଖ୍ୟ ଫାଟକରେ ତିନୋଟି ବିଶେଷ ପ୍ରକାରର କଙ୍କାଳ ରହିଛି। ଯାହା ଲୋକଙ୍କୁ ସ୍ବାଗତ କରୁଛି। ହାଡ ଦ୍ୱାରା ସଜ୍ଜିତ ଏହାର କାନ୍ଥଗୁଡିକ ବିଶେଷ କରି ଲୋକଙ୍କୁ ଆକର୍ଷିତ କରିଥାଏ। ସେହିପରି ଏହାର ଛାତ କ୍ରସବୋନ ପାର୍ଟନ ଦ୍ୱାରା ପ୍ରଭାବିତ।
ଏଠାକୁ ବହୁ ସଂଖ୍ୟାରେ ପର୍ଯ୍ୟଟକ ଆସିଥାନ୍ତି। ଏହି ଚର୍ଚ୍ଚରେ ମନୁଷ୍ୟର କଙ୍କାଳରୁ ପ୍ରତ୍ୟେକ ଅଙ୍ଗର ହାଡ ବ୍ୟବହୃତ ହୋଇଛି। ଲୋକଙ୍କ ମୃତ୍ୟୁ ପରେ ସେମାନଙ୍କ ମୃତଦେହକୁ ଏଠାରେ ସମାଧି ଦିଆଯାଇଛି। ସେହି ସମୟରେ ଏହି ସ୍ଥାନର ମାଟିକୁ ଲୋକମାନେ ଅତ୍ୟନ୍ତ ପବିତ୍ର ବୋଲି ମାନୁଥିଲେ।
