ନୂଆଦିଲ୍ଲୀ, ୩।୯: ବିଶ୍ୱର ସବୁଠାରୁ ବ୍ୟୟବହୁଳ ଟି୨୦ କ୍ରିକେଟ୍ ଟୁର୍ନାମେଣ୍ଟ ଇଣ୍ଡିଆନ୍ ପ୍ରିମିୟର ଲିଗ୍ (ଆଇପିଏଲ୍)ର ତ୍ରୟୋଦଶ ସଂସ୍କରଣ ସେପ୍ଟେମ୍ବର ୧୯ରୁ ୟୁଏଇରେ ଆରମ୍ଭ ହେବ। ଚଳିତ ବର୍ଷ କରୋନା ମହାମାରୀର ପ୍ରଭାବ ଲାଗି ଆଇପିଏଲ୍କୁ ଭାରତ ପରିବର୍ତ୍ତେ ୟୁଏଇରେ ଆୟୋଜିତ କରାଯାଇଛି। ସମସ୍ତ ୮ଟି ଯାକ ଫ୍ରାଞ୍ଚାଇଜ ୟୁଏଇରେ ପହଞ୍ଚି କ୍ୱାରାଣ୍ଟାଇନରେ ରହିବା ପରେ ଏବେ ଅଭ୍ୟାସ ଆରମ୍ଭ କରିଦେଇଛନ୍ତି।
କ୍ରିକେଟ୍ ସାଧାରଣତଃ ବ୍ୟାଟ୍ସମ୍ୟାନଙ୍କ ଖେଳ ହୋଇଥାଏ। ତେଣୁ ଏଥିରେ ଅଧିକ ପରିମାଣରେ ଚୌକା ଓ ଛକା ଦେଖିବାକୁ ମିଳିଥାଏ। ଭାରତର ମହେନ୍ଦ୍ର ସିଂ ଧୋନୀଙ୍କଠାରୁ ଆରମ୍ଭ କରି ଓ୍ବେଷ୍ଟଇଣ୍ଡିଜର ବିସ୍ଫୋରକ ବ୍ୟାଟ୍ସମ୍ୟାନ କ୍ରିସ ଗେଲ୍ ଛକା ମାରିବାରେ ବେଶ୍ ସିଦ୍ଧହସ୍ତ। କିନ୍ତୁ ଆଇପିଏଲ୍ ଇତିହାସରେ ସର୍ବାଧିକ ଛକା ମାରିବାର ରେକର୍ଡ ଗେଲ୍ଙ୍କ ନାମରେ ରହିଛି। ଓ୍ବେଷ୍ଟଇଣ୍ଡିଜର ଏହି ବାମହାତୀ ଓପନର୍ ୧୨୪ ଇନିଂସରୁ ୩୨୬ ଛକା ମାରି ଏହି ତାଲିକାର ସର୍ବାଗ୍ରେ ରହିଛନ୍ତି। ତାଲିକାର ଟପ୍-୫ରେ ୩ଜଣ ଭାରତୀୟ ଖେଳାଳି ରହିଛନ୍ତି।
ସେମାନେ ହେଲେ ଚେନ୍ନାଇ ସୁପର୍ କିଙ୍ଗ୍ସର ମହେନ୍ଦ୍ର ସିଂ ଧୋନୀ, ମୁମ୍ବାଇ ଇଣ୍ଡିଆନ୍ସର ରୋହିତ୍ ଶର୍ମା ଓ ଧୋନୀଙ୍କ ସାଥୀ ଖେଳାଳି ସୁରେଶ ରାଇନା। ଧୋନୀ (୧୭୦ ଇନିଂସ, ୨୦୯ ଛକା) ତାଲିକାର ୩ୟ ସ୍ଥାନରେ ରହିଛନ୍ତି। ସେହିଭଳି ରୋହିତ୍ (୧୮୩ ଇନିଂସ, ୧୯୪ ଛକା) ଓ ରାଇନା (୧୮୯ ଇନିଂସ, ୧୯୪ ଛକା) ଯଥାକ୍ରମେ ୪ର୍ଥ ଓ ୫ମ ସ୍ଥାନ ଲାଭ କରିଛନ୍ତି। ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋରର ଏବି ଡି ଭିଲର୍ସ (୧୪୨ ଇନିଂସ, ୨୧୨ ଛକା) ଏହି ତାଲିକାରେ ଗେଲ୍ଙ୍କ ପଛକୁ ୨ୟ ସ୍ଥାନରେ ରହିଛନ୍ତିି।
