ବେଜିଂ, ୩।୪ : ଚାଇନାରେ ଏବେ ବିବାହ କରିବାକୁ ଯୁବବର୍ଗ ଅମଙ୍ଗ ହେବାରେ ଲାଗିଛନ୍ତି। ବିବାହ ପ୍ରତି ସେମାନଙ୍କର ମୋହ ଭଙ୍ଗ ହୋଇଛି। ଫଳରେ ବାର୍ଷିକ ବିବାହ ସଂଖ୍ୟା ୩୬ ବର୍ଷର ସର୍ବନିମ୍ନ ସ୍ତରରେ ପହଞ୍ଚିଛି ଯାହା ସଙ୍କଟ ସୃଷ୍ଟି ହୋଇଛି।
ବିଶେଷଜ୍ଞମାନେ କହିଛନ୍ତି ଯେ ଏହା ଯୋଗୁ ଦେଶରେ ଜନ୍ମ ହାରରେ ହ୍ରାସ ଘଟିବ। ପରିସଂଖ୍ୟାନ ଦର୍ଶାଉଛି ଯେ ୨୦୨୧ ମସିହାରେ ଚାଇନାରେ ୭୬.୩ ଲକ୍ଷ ଦମ୍ପତି ବିବାହ ପଞ୍ଜିକୃତ କରିଛନ୍ତି, ଯାହାକି ୧୯୮୬ ମସିହାରୁ ବେସାମରିକ ମନ୍ତ୍ରଣାଳୟ ଦ୍ୱାରା ପ୍ରକାଶିତ ସର୍ବନିମ୍ନତମ ସଂଖ୍ୟା।
ରାଜ୍ୟ ଖବରକାଗଜ ’ଗ୍ଲୋବାଲ ଟାଇମ୍ସ’ ଡେମୋଗ୍ରାଫି ବିଶେଷଜ୍ଞ ହି ୟାଫୁ ଲେଖିଛନ୍ତି ଯେ ବିବାହ ପଞ୍ଜିକରଣ ସଂଖ୍ୟା କମିଲେ ଚାଇନାରେ ଜନ୍ମ ହାର ହ୍ରାସ ପାଇବ। ଜାତୀୟ ପରିସଂଖ୍ୟାନ ବ୍ୟୁରୋ (ଏନବିଏସ) ଦ୍ୱାରା ଏକ ବର୍ଷର ତୁଳନାତ୍ମକ ଅଧ୍ୟୟନରୁ ଜଣାପଡିଛି ଯେ ଗତ ବର୍ଷରେ ଚାଇନାର ଜନସଂଖ୍ୟା ୫ ଲକ୍ଷରୁ କମ ବୃଦ୍ଧି ପାଇଛି। ଏହିପରି କ୍ରମାଗତ ପଞ୍ଚମ ବର୍ଷ ପାଇଁ ଜନ୍ମ ହାର ହ୍ରାସ ପାଇଛି।
ପରିସଂଖ୍ୟାନ ଦର୍ଶାଉଛି ଯେ ଗତ ତିନିବର୍ଷ ମଧ୍ୟରେ ଚାଇନାରେ ବିବାହ ପଞ୍ଜିକରଣ ସଂଖ୍ୟାରେ ହ୍ରାସ ଘଟିଛି। ୨୦୧୯ରେ, ଏକ କୋଟିରୁ କମ ଦମ୍ପତିଙ୍କ ବିବାହ ପଞ୍ଜିକୃତ ହୋଇଥିବାବେଳେ ୨୦୨୦ରେ ଏହି ସଂଖ୍ୟା ୯୦ ଲକ୍ଷରୁ କମ ଥିଲା। ସେହିପରି ୨୦୨୧ରେ ଏହା ୮୦ ଲକ୍ଷରୁ କମ ଥିଲା। ଗ୍ଲୋବାଲ ଟାଇମ୍ସ ଖବର ଅନୁଯାୟୀ, ୨୦୨୧ରେ ଦମ୍ପତିଙ୍କ ସଂଖ୍ୟା ୨୦୧୩ ତୁଳନାରେ ୫୬.୬ ପ୍ରତିଶତ।
ଉଲ୍ଲେଖନୀୟ କଥା ହେଉଛି, ୨୦୧୩ ରେ, ସର୍ବାଧିକ ବିବାହ ହୋଇଥିଲା । ୧୯୭୮ ପରଠାରୁ ଚାଇନାର ଜନ୍ମ ହାର ସର୍ବନିମ୍ନ ସ୍ତରକୁ ଖସି ଆସିଛି। ଗତ ବର୍ଷ ’ଦ ଗାର୍ଡିଆନ’ ଏହାର ଏକ ରିପୋର୍ଟରେ ଦାବି କରିଥିଲା ଯେ, ଚାଇନାରେ ଜନ ସଂଖ୍ୟା କମିବାରେ ଲାଗିଛି। ଚାଇନାର ସରକାରୀ ବିଭାଗ, ନ୍ୟାଶନାଲ ଷ୍ଟାଟିଷ୍ଟିକ୍ସ ବ୍ୟୁରୋର ତଥ୍ୟକୁ ଦର୍ଶାଇ ରିପୋର୍ଟରେ କୁହାଯାଇଛି ଯେ୨୦୨୦ରେ ଜନ୍ମ ହାର ହଜାରେ ଲୋକଙ୍କ ପିଛା ୮.୫ ରେକର୍ଡ କରାଯାଇଛି। ଯାହା ୧୯୭୮ ଠାରୁ ସର୍ବନିମ୍ନ।
