ବେଜିଂ, ୨।୧ : ତିବ୍ବତକୁ ନେଇ ଚାଇନା ପୁଣି ଦାଦାଗିରି ଆରମ୍ଭ କରିଛି। ଇତିମଧ୍ୟରେ ଚାଇନା ଅରୁଣାଚଳ ପ୍ରଦେଶରେ ଆଉ ୧୫ଟି ସ୍ଥାନର ନାମକରଣ କରିଛି। ଏହା ସହିତ ଦାବି କରିଛି ଯେ ତିବ୍ଦତର ଦକ୍ଷିଣ ଭାଗ ପ୍ରାଚୀନ କାଳରୁ ଚାଇନା ଅଞ୍ଚଳର ଅଂଶ ବିଶେଷ। ଦକ୍ଷିଣ ତିବ୍ବତ ଉପରେ କବ୍ଜା ଲାଗି ଚାଇନାର ଏଭଳି ଷଡ଼ଯନ୍ତ୍ରକୁ ନେଇ ଭାରତ ଦୃଢ଼ ଆପତ୍ତି ଉଠାଇଛି। ଏସବୁ ଅଞ୍ଚଳ ଭାରତର ଏକ ଅବିଚ୍ଛେଦ୍ୟ ଅଙ୍ଗ ହୋଇ ରହିଥିବ ଏବଂ ଏହାର ନାମରେ କୌଣସି ପରିବର୍ତ୍ତନ ହେବ ନାହିଁ ବୋଲି ଭାରତ କହିଛି।
ବହିର୍ବ୍ୟପାର ମନ୍ତ୍ରଣାଳୟର ମୁଖପାତ୍ର ଅରିନ୍ଦମ ବାଗଚି କହିଛନ୍ତି ଯେ ଚାଇନାର ଏଭଳି କାର୍ଯ୍ୟର ରିପୋର୍ଟ ଆମର ଦୃଷ୍ଟିକୁ ଆସିଛି। ଚାଇନା ଅରୁଣାଚଳ ପ୍ରଦେଶର କେତେକ ସ୍ଥାନର ନାମ ବଦଳାଇବାକୁ ଚେଷ୍ଟା କରିବା ଉଦ୍ୟମ ପ୍ରଥମ ଘଟଣା ନୁହେଁ। ଏପ୍ରିଲ ୨୦୧୭ରେ ମଧ୍ୟ ଚାଇନା ଏଭଳି କରିବାକୁ ଉଦ୍ୟମ କରିଥିଲା। ସେ କହିଛନ୍ତି, ’ଅରୁଣାଚଳ ପ୍ରଦେଶ ଭାରତର ଏକ ଅବିଚ୍ଛେଦ୍ୟ ଅଙ୍ଗ ଥିଲା ଏବଂ ସର୍ବଦା ରହିବ। ଏହି ମନ୍ତବ୍ୟ ଉପରେ ଭାରତର ପ୍ରତିକ୍ରିୟା ବିଷୟରେ ପଚରାଯିବାରୁ ଚାଇନାର ବୈଦେଶିକ ମନ୍ତ୍ରଣାଳୟର ମୁଖପାତ୍ର ଝାଓ ଲିଜିଆନ କହିଛନ୍ତି ଯେ ଜାଙ୍ଗନାନ ଯାହାକି ତିବ୍ଦତର ଦକ୍ଷିଣ ଭାଗ ଏହା ଚାଇନାର ତିବ୍ଦତ ସ୍ବୟଂଶାସିତ ଅଞ୍ଚଳରେ ଅବସ୍ଥିତ।
ପ୍ରାଚୀନ କାଳରୁ ଏହା ଚାଇନାର ଅଞ୍ଚଳ ହୋଇ ରହିଆସିଛି ବୋଲି ଚାଇନା ବୈଦେଶିକ ମନ୍ତ୍ରଣାଳୟର ୱେବସାଇଟରେ ପୋଷ୍ଟ କରାଯାଇଥିବା ତଥ୍ୟକୁ ନେଇ ମନ୍ତବ୍ୟରେ ଲିଜିଆନ ଏଭଳି କହିଛନ୍ତି। ଲିଜିଆନ କହିଛନ୍ତି ଚାଇନାର ଅନୁସୂଚିତ ଜାତିର ଜନଜାତି ଯେପରିକି ମୋଇନବା ଏବଂ ତିବ୍ଦତୀୟ ଗୋଷ୍ଠୀ ଏହି ଅଞ୍ଚଳରେ ଦୀର୍ଘ ଦିନ ଧରି ରହିଆସୁଛନ୍ତି ଏବଂ ଅନେକ ସ୍ଥାନର ନାମକରଣ ମଧ୍ୟ କରାଯାଇଛି।
ସେ କହିଛନ୍ତି ଯେ ଏହି ଅଞ୍ଚଳର ମାନକୀକୃତ ପରିଚାଳନା ପାଇଁ ଚାଇନାର ଦକ୍ଷ କର୍ତ୍ତୃପକ୍ଷ ନିୟମାବଳୀ ଅନୁଯାୟୀ ସମ୍ପୃକ୍ତ ଅଞ୍ଚଳ ପାଇଁ ନାମକରଣ ତାଲିକା ପ୍ରକାଶ କରିଛନ୍ତି। ଏସବୁ ଅଞ୍ଚଳ ଚାଇନାର ସାର୍ବଭୌମତ୍ୱ ଅଧୀନରେ ରହିଛି। ତେବେ ଏହାକୁ ନେଇ ଏଲ୍ଏସିରେ ଉତ୍ତେଜନା ବୃଦ୍ଧି ପାଇଛି।
