ଲଦାଖ,୧୨।୧୨: ପୂର୍ବ ଲଦାଖର ଏଲ୍ଏସିରେ ଚାଇନା ଲଗାତାର ଉତ୍ତେଜନା ସୃଷ୍ଟି କରିବା ଉଦ୍ୟମ କରୁଛି। ଏବେ ପ୍ରକାଶ ପାଇଥିବା ଏକ ରିପୋର୍ଟରେ ଉଲ୍ଲେଖ କରାଯାଇଛି ଯେ, ଚାଇନା ଏଲ୍ଏସିରେ ମୁତୟନ କରାଯାଇଥିବା ସୈନ୍ୟଙ୍କୁ ‘ଆଇରନ୍ ମ୍ୟାନ୍ ଏକ୍ସୋସ୍କେଲିଟନ୍ ସୁଟ୍’ ପିନ୍ଧିବାକୁ ଦେଉଛି। ଏହାକୁ ପିନ୍ଧିଲେ ସୈନ୍ୟ ଅଧିକ ପରିମାଣର ଓଜନ ଉଠାଇବା ସହିତ ତଳେ ପଡ଼ିଲେ ଆଘାତ ଲାଗିବାର ଆଶଙ୍କା ମଧ୍ୟ ରହିବ ନାହିଁ। ଚାଇନାର ସରକାରୀ ଖବର କାଗଜ ଗ୍ଲୋବାଲ ଟାଇମ୍ସ୍ ଅନୁସାରେ ଏହି ନୂତନ ସୁଟ୍ ପିନ୍ଧି ଉଧିକ ଉଚ୍ଚା ପାହାଡ଼ରେ ସୀମା ସୁରକ୍ଷା କାର୍ଯ୍ୟ ସହଜ ହୋଇପାରିବ। ପ୍ରଥମେ ଦକ୍ଷିଣ-ପଶ୍ଚିମ ତିବ୍ବତର ନାଗରି ଅଞ୍ଚଳରେ ସୀମା ସୁରକ୍ଷା କାର୍ଯ୍ୟରେ ମୁତୟନ ଥିବା ଚାଇନା ସୈନ୍ୟଙ୍କୁ ଏହି ପୋଷାକ ପ୍ରଦାନ କରାଯାଇଛି। ଏହି ଅଞ୍ଚଳରେ ଚାଇନାର ଏକ ଗୁରୁତ୍ୱପୂର୍ଣ୍ଣ ଏୟାର ବେସ୍ ମଧ୍ୟ ରହିଛି। ଏହି ଏୟାର ବେସ୍ ରଣନୀତି ଦୃଷ୍ଟି କୋଣରୁ ଭାରତ ପାଇଁ ମଧ୍ୟ ବେଶ୍ ଗୁରୁତ୍ୱ ବହନ କରିଥାଏ। ଏଠାରେ ଚାଇନା ସୈନ୍ୟମାନଙ୍କୁ ଏଭଳି ପୋଷାକ ପ୍ରଦାନ କରିବା ଦ୍ୱାରା ସେମାନେ ଅଧିକ ଶକ୍ତିଶାଳୀ ହେବେ ବୋଲି ଆନୁମାନ କରାଯାଉଛି। ନାଗରି ସମୁଦ୍ର ପତ୍ତନଠାରୁ ୫ ହଜାର ମିଟରରୁ ଅଧିକ ଉଚ୍ଚରେ ରହିଛି। ଅମ୍ଳଜାନ ପରିମାଣ କମ୍ ରହିଥିବାରୁ ଅଧିକ ଓଜନ ଉଠାଇବା ଏଠାରେ କଷ୍ଟକର ହୋଇଥାଏ। ତେବେ ଏହି ସୁଟ୍ ପିନ୍ଧିଲେ ଏଭଳି ସମସ୍ୟା ଦୂର ହୋଇପାରିଥାଏ ବୋଲି ଗ୍ଲୋବାଲ ଟାଇମ୍ସ୍ କହିଛି। ଚାଇନାର ଏହି ଷଡ଼ଯନ୍ତ୍ର ନେଇ ଭାରତର ଚିନ୍ତା ବଢ଼ିବା ସହିତ ଅନ୍ତର୍ଜାତୀୟସ୍ତରରେ ଚର୍ଚ୍ଚା ଆରମ୍ଭ ହୋଇଛି।
