ବେଜିଂ,୨।୧୦: ୨୦୨୦ ଜୁନ୍ ୧୫ରେ ପୂର୍ବ ଲଦାଖର ଗଲଓ୍ବାନ ଉପତ୍ୟକାରେ ଭାରତୀୟ ଯବାନ ଓ ଚାଇନା ସୈନ୍ୟଙ୍କ ମଧ୍ୟରେ ରକ୍ତାକ୍ତ ସଂଘର୍ଷ ହୋଇଥିଲା। ଏଥିରେ ଭାରତର ୨୦ ଯବାନ ଶହୀଦ ହୋଇଥିବାବେଳେ ଚାଇନାର ୪ ସୈନ୍ୟଙ୍କ ମୃତ୍ୟୁ ଘଟିଥିବା ବେଜିଂ କହୁଛି। ଗୁରୁବାର ଶହୀଦ ଦିବସ ପାଳନ ଅବସରରେ ପିପୁଲ୍ସ ଲିବରେଶନ ଆର୍ମି (ପିଏଲ୍ଏ) ପକ୍ଷରୁ ଚାଇନା ସୋସିଆଲ ମିଡିଆରେ ଏକ ଭିଡିଓ ଜାରି କରାଯାଇଛି। ଲଦାଖରୁ ନେଇ ଅରୁଣାଚଳ ପ୍ରଦେଶ ପର୍ଯ୍ୟନ୍ତ ଦୁଇଦେଶର ପ୍ରକୃତ ନିୟନ୍ତ୍ରଣରେଖା (ଏଲ୍ଏସି)ର ସୁରକ୍ଷା ଦାୟିତ୍ୱରେ ଥିବା ଓ୍ବେଷ୍ଟର୍ନ ଥିଏଟର କମାଣ୍ଡ ଗଲଓ୍ବାନ ଉପତ୍ୟକାରେ ପ୍ରାଣ ହରାଇଥିବା ସୈନ୍ୟଙ୍କୁ ଶ୍ରଦ୍ଧାଞ୍ଜଳି ଦେବାକୁ ଯାଇ ଏହାକୁ ଶେୟାର କରିଛି। ଶତାଧିକ ପିଏଲ୍ଏ ସୈନ୍ୟ ସ୍ଲୋଗାନ ଦେଇ ଭାରତୀୟ ଯବାନଙ୍କ ସହ ଲଢ଼େଇ କରୁଥିବା ଏଥିରେ ଦେଖିବାକୁ ମିଳିଛି। ପିଏଲ୍ଏ ଅଧିକାରୀମାନେ ସଂଘର୍ଷସ୍ଥଳକୁ ଯାଇ ନିହତ ସୈନ୍ୟଙ୍କୁ ସ୍ମରଣ କରିଛନ୍ତି।
