ନୂଆଦିଲ୍ଲୀ, ୨୪।୯: ଏଲ୍ଏସିରେ ଭାରତ ଚାଇନା ମୁହାଁମୁହିଁ ହେବାରେ ଲାଗିଛନ୍ତି। ତେବେ ଚାଇନା ୧୯୬୨ ଭଳି ଭାରତ ଉପରେ ଅଚାନକ ଆକ୍ରମଣ ଯୋଜନା କରୁଛି। ଚାଇନା ପକ୍ଷରୁ ଏଭଳି ଆଶଙ୍କା ଥିବାରୁ ଭାରତୀୟ ବାୟୁସେନା ଏବଂ ସ୍ଥଳସେନା ପକ୍ଷରୁ ପାହାଡ଼ ଉପରେ ଥିବା ଶିବିରଗୁଡ଼ିକର କ୍ଷମତାକୁ ବୃଦ୍ଧି କରାଯାଉଛି। ଦୁଇପକ୍ଷ ସୀମାରରେ ନିଜ ନିଜର ସୈନ୍ୟବଳ ବଢ଼ାଇବା ସହିତ ଅସ୍ତ୍ରଶସ୍ତ୍ର ଠୁଳ କରୁଛନ୍ତି। କେତେକ ବିଶେଷଜ୍ଞଙ୍କ ଅନୁସାରେ ଚାଇନା ସବୁବେଳେ ସର୍ପାଇଜ୍ ଆଟାକ୍ ରଣନୀତିକୁ ଗୁରୁତ୍ୱ ଦେଇଥାଏ। ଏହା ଦ୍ୱାରା ପ୍ରତିପକ୍ଷ ଉପରେ ନିଜର ସାମର୍ଥ୍ୟ ବଜାଇ ରଖିବା ଚାଇନା ରଣନୀତିର ଗୁରୁତ୍ୱପୂର୍ଣ୍ଣ ଦିଗ। ଏଲ୍ଏସିରେ ଆଡଭାନ୍ସଡ୍ ଲ୍ୟାଣ୍ଡିଂ ଗ୍ରାଉଣ୍ଡ(ଏଏଲ୍ଜି) ସ୍ଥାପନ କରିବା ନେଇ ଭାରତୀୟ ସେନା ପକ୍ଷରୁ ପ୍ରୟାସ ଜାରି ରହିଛି। ଏସବୁ ସ୍ଥାନରେ ବାୟୁସେନା ଦ୍ୱାରା ସ୍ଥଳସେନାଙ୍କୁ ପହଞ୍ଚାଯାଇଥାଏ। ସେହିପରି ଚାଇନା ମଧ୍ୟ ଏଲ୍ଏସି ନିକଟରେ ଏଏଲ୍ଜି ନିର୍ମାଣ କରୁଛି। ଅପରପକ୍ଷରେ ଭାରତ ମଧ୍ୟ ଗତ ୭-୮ବର୍ଷ ମଧ୍ୟରେ ଟୁଟିଙ୍ଗ, ଏଲାଙ୍ଗ୍, ପାସିଘାଟ, ବିଜୟ ନଗର ଏବଂ ମେଚୁକାରେ ଏଏଲ୍ଜି ନିର୍ମାଣ କରିସାରିଛି। ବାୟୁସେନାର ପୂର୍ବତନ ଅଧିକାରୀ ଏୟାର ମାର୍ଶଲ କେ.କେ.ନୋହଓ୍ବାରଙ୍କ ଅନୁସାରେ ଚାଇନା ୧୯୬୨ରେ ସର୍ପାଇଜ୍ ଆଟାକ୍ ରଣନୀତି ଆପଣେଇଥିଲା। ତେଣୁ ଚାଇନାର ଆଣବିକ, କେମିକାଲ, ସାଇବର ଏବଂ ବାୟୋଲୋଜିକାଲ ସମରସଜ୍ଜାକୁ ଦୃଷ୍ଟିରେ ରଖି ଭାରତୀୟ ଯବାନ ସତର୍କ ରହିବା ଆବଶ୍ୟକ ବୋଲି ସେ କହିଛନ୍ତି।
