ଓ୍ବାଶିଂଟନ,୧୪।୧୨: ପୃଥିବୀର ବିଭିନ୍ନ ଦେଶର ଗୁପ୍ତ ତଥ୍ୟ ଚୋରି କରିବା ଲାଗି ଚାଇନା ରଚିଥିବା ବଡ଼ ଷଡ଼ଯନ୍ତ୍ରର ପର୍ଦ୍ଦାଫାଶ୍ ହୋଇଛି। ସମ୍ପ୍ରତି ବିଭିନ୍ନ ଦେଶର ଭିନ୍ନ ଭିନ୍ନ କମ୍ପାନୀରେ ଚାଇନା କମ୍ୟୁନିଷ୍ଟ୍ ପାର୍ଟି(ସିସିପି) ସଦସ୍ୟମାନେ କାର୍ଯ୍ୟ କରୁଥିବା ଜଣାପଡ଼ିଛି। ସେମାନେ ସମ୍ପୃକ୍ତ ଦେଶର ବହୁ ଗୁପ୍ତ ତଥ୍ୟ ଚାଇନାର କମ୍ୟୁନିଷ୍ଟ ସରକାରଙ୍କୁ ଯୋଗାଇ ଦେଉଛନ୍ତି। ସିସିପି ସଦସ୍ୟମାନେ ପ୍ରତିରକ୍ଷାଠାରୁ ଆରମ୍ଭକରି ବ୍ୟାଙ୍କ ଏବଂ ଫାର୍ମା ସେକ୍ଟରରେ ରହି ଚାଇନା ରାଷ୍ଟ୍ରପତି ଶି ଜିନ୍ପିଙ୍ଗ୍ ସରକାରଙ୍କୁ ଆବଶ୍ୟକ ଗୁପ୍ତ ତଥ୍ୟ ଯୋଗାଇ ଦେଉଛନ୍ତି। ଏକ ଡାଟା ଲିକ୍ ଘଟଣାରୁ ଚାଇନାର ଏଭଳି ଷଡ଼ଯନ୍ତ୍ର ସମ୍ପର୍କରେ ଜଣାପଡ଼ିଛି। ଲିକ୍ ହୋଇଥିବା ଡାଟାରେ ସିସିପି ସଦସ୍ୟଙ୍କ ପରିଚୟ, ପାର୍ଟିରେ ତାଙ୍କର ପଦବୀ, ଜାତୀୟ ପରିଚୟ ପତ୍ର ନମ୍ବର, ସମ୍ପ୍ରଦାୟ, ଫୋନ୍ ନମ୍ବର ଆଦି ତଥ୍ୟ ରହିଥିବା କୁହାଯାଉଛି। ବ୍ରିଟେନ, ଆମେରିକା ଏବଂ ଅଷ୍ଟ୍ରେଲିଆରେ ଅଧିକ ସଂଖ୍ୟକ ସିସିପି ସଦସ୍ୟ ରହିଥିବା କୁହାଯାଉଛି। ବ୍ରିଟେନର ଚାଇନା ଦୂତାବାସଠାରୁ ଆରମ୍ଭ କରି କେତେକ ବିଶ୍ୱବିଦ୍ୟାଳୟ ଏବଂ କମ୍ପାନୀରେ ସିସିପି ସଦସ୍ୟ କାର୍ଯ୍ୟ କରୁଛନ୍ତି। ଏନେଇ ବ୍ରିଟେନ ସରକାର ସୂଚନା ଦେଇଛନ୍ତି। ଅନ୍ୟ ଦେଶରେ ମଧ୍ୟରେ ସମାନ ସ୍ଥିତି ରହିଥିବା ଲିକ୍ ହୋଇଥିବା ଡାଟାରୁ ଜଣାପଡ଼ିଛି। ଆମେରିକାର ବୋଇଙ୍ଗ୍, କ୍ୱାଲକୋମ୍ ଏବଂ ଫାଇଜର କମ୍ପାନୀରେ ବହୁ ସଂଖ୍ୟକ ସିସିପି ସଦସ୍ୟ ରହିଥିବା କୁହାଯାଉଛି।
