ନୂଆଦିଲ୍ଲୀ, ୭।୧୨: ଭାରତ ମ୍ୟାନ୍ମାର ସୀମାରେ ଚାଇନା ଜାଣିଶୁଣି ଉଗ୍ରବାଦୀ କାର୍ଯ୍ୟ କଳାକଳାପକୁ ପ୍ରୋତ୍ସାହିତ କରୁଛି। ଏଠାରେ ସକ୍ରିୟ ଥିବା ଉଗ୍ରବାଦୀ ସଂଗଠନକୁ ଚାଇନା ଆବଶ୍ୟକ ସହାୟତା ଯୋଗାଇଦେବା ସହିତ ସୀମାପାର ଅସ୍ତ୍ରଶସ୍ତ୍ର ଚୋରା ଚାଲାଣ କରୁଥିବା ଭାରତୀୟ ଗୋଇନ୍ଦା ବିଭାଗ ପକ୍ଷରୁ ପ୍ରକାଶିତ ଏକ ରିପୋର୍ଟରେ ଉଲ୍ଲେଖ କରାଯାଇଛି। ଏସମ୍ପର୍କରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ମଧ୍ୟ ସୂଚିତ କରାଯାଇଛି। ମ୍ୟାନମାର୍ରେ ସକ୍ରିୟ ରହିଥିବା ୟୁନାଇଟେଡ୍ ଓ୍ବା ଷ୍ଟେଟ୍ ଆର୍ମି ଏବଂ ଆରାକାନ୍ ଆର୍ମି ଉଗ୍ରବାଦୀ ସଂଗଠନକୁ ଦକ୍ଷିଣ ଚାଇନାର କୁନ୍ମିଙ୍ଗ ସହରରୁ ଟ୍ରେନ୍ରେ ଅସ୍ତ୍ରଶସ୍ତ୍ର ଯୋଗାଣ କରାଯାଉଛି। ଅକ୍ଟୋବରରେ ୪ ଉଗ୍ରବାଦୀ ନେତା ଚାଇନାର ଏହି ସହରରେ ଲୁଚି ବସିଥିବା ଗୋଇନ୍ଦା ରିପୋର୍ଟରେ ଦର୍ଶଯାଇଛି। ସୀମାରେ ୩ ନାଗା ଉଗ୍ରବାଦୀ ସଂଗଠନ ସକ୍ରିୟ ରହିଛି। ଏହି ସଂଗଠନଗୁଡ଼ିକ ଭାରତ ଏବଂ ମ୍ୟାନମାର ସୀମାରେ ସ୍ବତନ୍ତ୍ର ରାଜ୍ୟ ଗଠନ ପାଇଁ ଷଡ଼ଯନ୍ତ୍ର ରଚିଥିବା ରିପୋର୍ଟ ପ୍ରକାଶ ପାଇଛି। ଉଗ୍ରବାଦୀ ସଂଗଠନର ନେତା ଚାଇନାର ଅବସରପ୍ରାପ୍ତ ମିଲିଟାରୀ ଅଧିକାରୀ ତଥା କାର୍ଯ୍ୟରତ ଅଧିକାରୀଙ୍କ ସହିତ ଯୋଗାଯୋଗରେ ରହିବା ସହିତ ଗୁପ୍ତ ସୂଚନା ପ୍ରଦାନ କାର୍ଯ୍ୟ ଜାରି ରଖିଛନ୍ତି। ଏହି ରିପୋର୍ଟକୁ ଚାଇନା ପକ୍ଷରୁ ବିଭିନ୍ନ ସମୟରେ ଖଣ୍ଡନ କରାଯାଉଛି। ମାତ୍ର ଏଭଳି କାର୍ଯ୍ୟ ଦ୍ୱାରା ଚାଇନା ଭାରତ ବିରୋଧରେ ଛାୟା ଯୁଦ୍ଧ ଜାରି ରଖିଥିବା କୁହାଯାଉଛି।
