ଝାରସୁଗୁଡ଼ା ଅଫିସ,୧୪ା୪: ଦୀର୍ଘ ୫ବର୍ଷ ତଳେ ମହାନଦୀରୁ ଉଦ୍ଧାର ହୋଇଥିବା ଯୁବତୀ ସୋନୀ ଯାଦବଙ୍କ ଆସନ୍ତା ୨୧ ତାରିଖରେ ସାହାନାଈ ବାଜିବ। ଏଥିପାଇଁ କୁଶମେଲ୍ ଗ୍ରାମର ପାଳିତ ମାଆ, ବାପା, ବନ୍ଧୁବାନ୍ଧବ ଓ ଗ୍ରାମବାସୀ ସମସ୍ତେ ଲାଗିପଡିଛନ୍ତି। ଏ ନେଇ ଗ୍ରାମବାସୀଙ୍କ ମଧ୍ୟରେ ଉତ୍ସାହ ଦେଖାଦେଇଛି। ଛତିଶଗଡ ରାୟଗଡ ଜିଲା ଧରମଗଡ ଗ୍ରାମର ପ୍ରେମ ସିଂହ ଯାଦବଙ୍କ ପୁତ୍ର ପୁରୁଷୋତ୍ତମଙ୍କ ସହିତ ସୋନୀ (ଦୌପତୀ)ଙ୍କ ବୈଦିକ ରୀତିରେ ବିବାହ ହେବାକୁ ଯାଉଛି ା ସୋନୀ ବୋହୂହୋଇ ପୁଣି ଛତିଶଗଡ ଚାଲିଯିବେ।
ସୂଚନା ଅନୁଯାୟୀ ୨୦୧୬ ସେପ୍ଟେମ୍ବର ୧୪ତାରିଖରେ କୁଶମେଲ୍ ଗ୍ରାମର ସନ୍ନ୍ୟାସୀ କାଲୋ ନାମକ ମତ୍ସ୍ୟଜୀବୀ ମହାନଦୀକୁ ଡଙ୍ଗା ନେଇ ମାଛ ମାରିବା ପାଇଁ ଯାଇଥିଲେ। ଏହି ସମୟରେ ମହାନଦୀରେ କ’ଣ ଗୋଟେ ଭାସୁଥିବା ଦେଖି ସେଠାରେ ପହଞ୍ଚତ୍ଥିଲେ। ଜଣେ ଯୁବତୀ ମୁମୁର୍ଷୂ ଅବସ୍ଥାରେ ଭାସୁଥିବା ଦେଖି ସେ ତାଙ୍କୁ ଘରକୁ ନେଇଆସିଥିଲେ। ଚିକିତ୍ସା ପରେ ଯୁବତୀ ଜଣଙ୍କ ସୁସ୍ଥ ହୋଇ ସବୁକିଛି କହିଥିଲେ। ମାଆ ବାପାଙ୍କୁ ହରାଇବା ପରେ ଛୋଟବେଳୁ ସୋନୀ ସାରଙ୍ଗଗଡ ଥାନା ଜେବରା ଗ୍ରାମରେ ମାଉସୀ ଘରେ ରହୁଥିଲେ। ସେ ଚନ୍ଦ୍ରାହାସିନୀ ମନ୍ଦିରକୁ ବୁଲିବାକୁ ଆସି ମହାନଦୀରେ ଗୋଡ ଧୋଉଥିବା ବେଳେ ଖସିଯିବାରୁ ବନ୍ୟାଜଳରେ ଭାସିଯାଇଥିଲେ। ୫୦କିଲୋମିଟର ଭାସି ଆସି ଓଡିଶାର କୁଶମେଲ୍ ଗ୍ରାମ ନିକଟରେ ଲାଗିଥିଲେ। ତାଙ୍କୁ ମତ୍ସ୍ୟଜୀବୀ ସନ୍ନ୍ୟାସୀ ଉଦ୍ଧାର କରି ଝିଅ ଭାବେ ଘରେ ରଖିଥିଲେ ସେ ନିଜ ଘରକୁ ଯିବା ପାଇଁ ଇଚ୍ଛା ପ୍ରକାଶ କରି ନ ଥିଲେ। ଏଭଳି ସ୍ଥିତିରେ ସୋନୀଙ୍କ ବାହାଘର ପାଇଁ ପାଳିତ ମା’ବାପା ଚିନ୍ତା କରିଥିଲେ। ସୋନୀ ଏବେ କନ୍ୟା ବେଶରେ ବୋହୂ ହୋଇ ଛତିଶଗଡ ଯିବେ। ଏଥିପାଇଁ ସୋନୀ ଓ ପାଳିତ ମା’ବାପା ବହୁତ ଖୁସି ଥିବା କହିଛନ୍ତି।
