ଦିଗପହଣ୍ଡି,୧୩।୬(ଅଶେଷ ନାଥ ମିଶ୍ର): ଗଞ୍ଜାମ ଜିଲା ଦିଗପହଣ୍ଡି ଥାନା ଅଧୀନ ଏକ ଗାଁର ଜଣେ ୧୯ ବର୍ଷୀୟା ଯୁବତୀଙ୍କୁ ଦୀର୍ଘଦିନ ଧରି ଭଲ ପାଉଥିଲେ ପଡୋଶୀ ଗଁ ର କେ. ଜାଗିଲି ରେଡ୍ଡୀ(୩୨)। କିଛିଦିନ ପରେ ଯୁବତୀ ଜଣକ ପରିବାର ସହ ତାଙ୍କ ପୈତୃକ ଗାଁକୁ ଫେରିଥିଲେ। ଜାଗିଲି ମଧ୍ୟ ସେହି ଗାଁର ଯୁବକ। ଉଭୟଙ୍କ ମଧ୍ୟରେ ନିବିଡ଼ ସମ୍ପର୍କ ଗଢି ଉଠିଥିଲା। କିଛିଦିନ ପରେ ଯୁବତୀ ଜଣକ କାମ ପାଇଁ ବେଙ୍ଗାଲୁର ଚାଲି ଯାଇଥିଲେ। ସେ ସେଠାରେ ଥିବା ବେଳେ ପ୍ରେମିକ ଜାଗିଲି ତାଙ୍କୁ ଫୋନ କରି ପ୍ରେମ ସମ୍ପର୍କ ବାହାନାରେ ଇମୋସନାଲ ବ୍ଲାକମେଲ ଆରମ୍ଭ କରିଦେଇଥିଲେ। ଜାଗିଲି ଫୋନ କରି ଯୁବତୀଙ୍କୁ ଗାଁକୁ ଡାକିଥିଲେ। କିଛିଦିନ ପରେ ଯୁବତୀ ଜଣକ ବେଙ୍ଗାଲୁରରୁ ଗାଁକୁ ଫେରିବାପରେ ସେ ତାଙ୍କୁ ବିଭିନ୍ନ ସ୍ଥାନକୁ ବୁଲାଇ ନେଇଥିଲେ।ତାଙ୍କୁ ବିବାହ ପାଇଁ ଜାଗିଲି ପ୍ରତିଶ୍ରୁତି ଦେଇ ଅନେକଥର ଯୁବତୀଙ୍କ ସହ ଶାରୀରିକ ସମ୍ପର୍କ ରଖିଥିଲେ। ଇତି ମଧ୍ୟରେ ୭ ମାସର ଗର୍ଭବତୀ ହେବା ଜାଣି ଯୁବତୀ ଜଣକ ତାଙ୍କୁ ବିବାହ କରିବାକୁ କହିବାରୁ ପ୍ରେମିକ ଜାଗିଲିି ଯୁବତୀଙ୍କୁ ବିବାହ ପାଇଁ ରୋକଠୋକ ମନାକରିବା ସହ ଗର୍ଭରେ ବଢୁଥିବା ଛୁଆ ମୋର ନୁହେଁ ବୋଲି କହିଥିଲେ।ଗର୍ଭବତୀ ହୋଇଥିବା ବିଷୟ କାହାରିକୁ ଜଣାଇଲେ ଯୁବତୀଙ୍କୁ ହତ୍ୟା କରିବାକୁ ଧମକ ଦେଇଥିଲେ।ଲୋକ ଲଜ୍ଜା ଭୟରେ ଯୁବତୀ ଜଣକ ମାନସିକ ଭାରସାମ୍ୟ ହରାଇ ବସିଥିଲେ। ପରେ ସାହାସ ଯୁଟାଇ ଯୁବତୀ ଜଣକ ଗତ ଗୁରୁବାର ଦିଗପହଣ୍ଡି ଥାନାରେ ପହଞ୍ଚି ଜାଗିଲିଙ୍କ ବିରୋଧରେ ଏତଲା ଦେଇଥିଲେ।ଏତଲାକୁ ଭିତ୍ତିକରି ଆଇଆଇସି କିଶୋର କୁମାର ସାମଲ ଥାନା ମାମଲା ନଂ.୨୫୦/୨୬ ଭାରତୀୟ ନ୍ୟାୟ ସଂହିତାର ଦଫା -୨୯୬/୬୯/୬୪(୨)(ଏମ)/୩୫୧(୨) ଅନୁଯାୟୀ ଅଭିଯୁକ୍ତଙ୍କ ବିରୋଧରେ ମକଦ୍ଦମା ରୁଜୁ କରିଥିଲେ।ତଦନ୍ତକାରୀ ଅଧିକାରୀ ଏସଆଇ ସୋଫିଆ ମିଶ୍ର ପୀଡ଼ିତାଙ୍କ ବୟାନ ରେକର୍ଡ କରିବା ସହ ଅଭିଯୁକ୍ତଙ୍କୁ ଗିରଫ କରିଥିଲେ। ବ୍ରହ୍ମପୁର ବଡ଼ ଡାକ୍ତରଖାନା ରେ ଉଭୟଙ୍କ ଡାକ୍ତରୀ ମାଇନା କରାଇବା ପରେ ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯାଇଥିଲା। ଜାମିନ ଆବେଦନ ଖାରଜ ହେବାରୁ ଅଭିଯୁକ୍ତଙ୍କୁ ଦିଗପହଣ୍ଡି ସବ ଜେଲ ହାଜତକୁ ପଠାଇ ଦିଆଯାଇଛି।
