ମୁମ୍ବାଇ,୬।୮: ହାଇପ୍ରୋଫାଇଲ ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍)ର ଆଗାମୀ ୧୩ତମ ସଂସ୍କରଣରେ ଟାଇଟଲ ପ୍ରାୟୋଜକ ତଥା ଚାଇନା ମୋବାଇଲ୍ କମ୍ପାନୀ ଭିଭୋ ଓ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ପରସ୍ପରଠାରୁ ଅଲଗା ଓ ଚୁକ୍ତିରୁ ଓହଯିବା ପାଇଁ ମିଳିତଭାବେ ନିଷ୍ପତ୍ତି ନେଇଛନ୍ତି। ଫଳରେ ଆଇପିଏଲ୍ ଟାଇଟଲ ପ୍ରାୟୋଜନରୁ ଭିଭୋ ଓହରିବା ଏକ ପ୍ରକାର ନିଶ୍ଚିତ ହୋଇଛି। ବର୍ତ୍ତମାନ ନୂଆ ପ୍ରାୟୋଜକ ସନ୍ଧାନ ଏବେ ବିସିସିଆଇ ସମ୍ମୁଖୀରେ ଏକ ବଡ଼ ଚ୍ୟାଲେଞ୍ଜ୍ ସୃଷ୍ଟି ହୋଇଛି।
୨୦୧୭ ଆଇପିଏଲ୍ରେ ଭିଭୋ ବିସିସିଆଇ ସହିତ ଚୁକ୍ତି କରିଥିଲା। ୨,୧୯୯ କୋଟି ଟଙ୍କା ବିନିମୟରେ ଭିଭୋ ୫ ବର୍ଷ ପାଇଁ ବିଡ୍ ଜିତିଥିଲା। ଟୁର୍ନାମେଣ୍ଟର ଟାଇଟଲ ରାଇଟ୍ସ ପାଇଁ ଭିଭୋ ପ୍ରତିବର୍ଷ ପାଖାପାଖି ୪୪୦ କୋଟି ଟଙ୍କ ପ୍ରଦାନ କରୁଥିଲା। ବର୍ତ୍ତମାନ ଭିଭୋ ଚୁକ୍ତିରୁ ଓହରିଯିବା ଫଳରେ ବିସିସିଆଇ ପାଇଁ ସମସ୍ୟା ସୃଷ୍ଟି ହୋଇଛି। ସାରା ଦେଶ ତଥା ବିଶ୍ୱରେ ଏବେ କୋଭିଡ୍-୧୯ ମହାମାରୀର ପ୍ରକୋପ ଜାରି ରହିଥିବା ବେଳେ ଅର୍ଥିକ ସଙ୍କଟ ସୃଷ୍ଟି ହୋଇଛି ଓ ବଜାରରେ ମାନ୍ଦାବସ୍ଥା ଚରମସୀମାରେ ପହଞ୍ଚିଛି। ଆଉ ମାତ୍ର ୪୫ ଦିନ ପରେ ଆଇପିଏଲ୍ ଆରମ୍ଭ ହେବ। ଏପରିସ୍ଥଳେ ହାତରେ ମଧ୍ୟ କମ୍ ସମୟ ରହିଛି। ଏବେ ସମାଧାନ ପନ୍ଥା ବାହାର କରିବା ପାଇଁ ବିସିସିଆଇ ବିଭିନ୍ନ ହିତଧାରକ ଓ ଶିଳ୍ପସଂସ୍ଥା ସହ ଆଲୋଚନା କରିବା ଆରମ୍ଭ କରିବ ବୋଲି କହିଛି।
ଭିଭୋ ଓହରିବା ପରେ ଭାରତୀୟ କ୍ରିକେଟ ଜଗତରେ ସମସ୍ୟା ସୃଷ୍ଟି ହୋଇଛି। ଭିଭୋ ପ୍ରତିବର୍ଷ ଦେଉଥିବା ୪୪୦ କୋଟି ଟଙ୍କା ବିସିସିଆଇ ଓ ଫ୍ରଞ୍ଚାଇଜ୍ଙ୍କ ମଧ୍ୟରେ ଭାଗ ହେଉଥିଲା। ବିସିସିଆଇ ୨୨୦ କୋଟି ହାସଲ କରୁଥିଲା। ସେହିପରି ୮ଟି ଫ୍ରାଞ୍ଚାଇଜ୍ଙ୍କ ମଧ୍ୟରେ ବାକି ୨୨୦ କୋଟି ଟଙ୍କା ଭାଗ ହେଉଥିଲା। ଫଳରେ ପ୍ରତ୍ୟେକ ଫ୍ରାଞ୍ଚାଇଜ୍ ପାଖାପାଖି ୨୮ କୋଟି ଟଙ୍କା ହାସଲ କରୁଥିଲେ। କିନ୍ତୁ ଭିଭୋ ଓହରିବା ପରେ ଫ୍ରାଞ୍ଚାଇଜ୍ଗୁଡିକ ଲାଭବାନ ହୋଇପାରିବେନି। ଫଳରେ ଫ୍ରଞ୍ଚାଇଜ୍ଗୁଡିକ ଆଇପିଏଲ୍ଠାରୁ କ୍ଷତିପୂରଣ ଦାବି କରିବେ। ପୁଣି ଫ୍ରଞ୍ଚାଇଜ୍ଗୁଡିକ ୫୦ କୋଟି ଟଙ୍କା ଅର୍ଥିକ କ୍ଷତି ସହିବେ ବୋଲି ବିସିସିଆଇ ମଧ୍ୟ ସ୍ବୀକାର କରିଛି।
ଅନ୍ୟପଟେ ଆଇପିଏଲ ଆୟୋଜନ ନ ହୋଇଥିଲେ କିଛି ମିଳି ନ ଥାନ୍ତା। ଯେହେତୁ ଟୁର୍ନାମେଣ୍ଟ ଆୟୋଜନ ହେଉଛି କିଛି ଅର୍ଥ ମିଳିବା ନିଶ୍ଚିତ। ଆଦୌ ନ ମିଳିବା ଅପେକ୍ଷା କିଛି ମିଳିବା ଶ୍ରେୟସ୍କର ବୋଲି ଧରି ନେବାକୁ ହେବ। ବିସିସିଆଇ ମଧ୍ୟ ନୂଆ ପ୍ରାୟୋଜକ ସନ୍ଧାନରେ ରହିଛି ବୋଲି ବୋର୍ଡର ଜଣେ ବରିଷ୍ଠ ଅଧିକାରୀ କହିଛନ୍ତି। ନୂଆ ପ୍ରାୟୋଜକଙ୍କଠାରୁ ଭିଭୋ ଭଳି ଅର୍ଥ ନ ମିଳିବା ନିଶ୍ଚିତ। କିନ୍ତୁ ଅତିକମ୍ରେ ଏହାର ୫୦ ପ୍ରତିଶତ ଅର୍ଥ ମିଳି ପାରିବ ବୋଲି ଆଶା କରାଯାଉଛି। ଏଭଳି ସ୍ଥିତିରେ କିଛି ଆକଳନ କରିବା ମଧ୍ୟ ଠିକ୍ ନୁହେଁ। ବିସିସିଆଇ ସମ୍ମୁଖରେ ଏକାଧିକ ଚ୍ୟାଲେଞ୍ଜ୍ ଥିଲେଣ ମଧ୍ୟ ଆଗାମୀ ୪୮ ଘଣ୍ଟ ମଧ୍ୟରେ ସବୁ କିଛି ସ୍ପଷ୍ଟ ହେବ ବୋଲି ଅଶା କରାଯାଉଛି।
