ବଲିଉଡ ଅଭିନେତା ସୁଶାନ୍ତ ସିଂହ ରାଜପୁତ ମୃତ୍ୟୁ ପ୍ରସଙ୍ଗ ନୂଆ ମୋଡ ଆସିଛି। ଘଟଣାର ଯାଞ୍ଚ୍ ଏବେ ସିବିଆଇ ହାତକୁ ଯାଇଛି। ସୁଶାନ୍ତଙ୍କୁ ଗର୍ଲଫ୍ରେଣ୍ଡ୍ ଓଭର୍ଡୋଜ ଔଷଧ ଖାଇବାକୁ ଦେଉଥିଲେ ବୋଲି ବିହାର ସରକାରଙ୍କ ପକ୍ଷରୁ ଅଭିଯୋଗ କରାଯାଇଛି। ଏନେଇ ସୁପ୍ରିମକୋର୍ଟ ଏକ ପିଟିସନ ଦାଖଲ କରାଯାଇଛି। ରିୟା ଏବଂ ତାଙ୍କ ପରିବାର ଟଙ୍କା ଲୋଭରେ ସୁଶାନ୍ତଙ୍କୁ ନିଜ ଆଡକୁ ଟାଣିବାକୁ ଚେଷ୍ଟା କରୁତତ୍ଲେ ବୋଲି ଅଭିଯୋଗ ହୋଇଛି। ସୂଚନାଯୋଗ୍ୟ, ସୁଶାନ୍ତଙ୍କ ପିତା ପାଟଣା ରାଜୀବନଗର ଥାନାରେ ସୁଶାନ୍ତଙ୍କ ଗର୍ଲଫ୍ରେଣ୍ଡ ରିୟା ଚକ୍ରବର୍ତ୍ତୀଙ୍କ ବିରୋଧରେ ଏକ ମାମଲା ରୁଜୁ କରିଥିଲେ। ସେ କହିଥିଲେ ଯେ, ସୁଶାନ୍ତଙ୍କୁ ପ୍ରେମ ଜାଲରେ ଫସାଇ ରିୟା ଚକ୍ରବର୍ତ୍ତୀ ତାଙ୍କଠାରୁ ଟଙ୍କା ଆଦାୟ କରିବା ଓ ଆତ୍ମହତ୍ୟା ପାଇଁ ତାଙ୍କୁ ଉସୁକାଇଥିଲେ। ୨୦୧୯ରେ ରିୟାଙ୍କୁ ଭେଟିବା ପୂର୍ବରୁ ସୁଶାନ୍ତ ସମ୍ପୂର୍ଣ୍ଣ ସ୍ବାଭାବିକ ଥିଲେ। ତା’ପରେ କ’ଣ ବଦଳିଗଲା ଯେ ସେ ରିୟାଙ୍କୁ ଭେଟିବାର କିଛି ମାସ ମଧ୍ୟରେ ମାନସିକ ରୋଗୀ ହୋଇଗଲେ? ସୁଶାନ୍ତଙ୍କ ମାନସିକ ରୋଗୀ ହେବାର କାରଣ କ’ଣ ଥିଲା ତାହା ଅନୁସନ୍ଧାନ କରାଯିବା ଉଚିତ୍ ବୋଲି ପିତା କହିଛନ୍ତି।
