ଭୋଗରାଇ, ୧୧।୪(ଡି.ଏନ.ଏ.)-ବାଲେଶ୍ୱର ଜିଲା ଭୋଗରାଇ ବ୍ଲକ ପୂର୍ବଭାରତର ପ୍ରସିଦ୍ଧ ଶୈବପୀଠ ହୁଗୁଳି ଗ୍ରାମର ଜଳଯନ୍ତ୍ର ଦେବତା ଶ୍ରୀ ଚନ୍ଦନେଶ୍ୱର ମହାଦେବଙ୍କ ଚୈତ୍ର ଚଡ଼କମେଳାର ଶନିବାର ଥିଲା ୪ର୍ଥ ଅର୍ଘ୍ୟ। ଏହି ଅବସରରେ ମହାଦେବଙ୍କଠାରେ ଶ୍ରେଷ୍ଠ ଭକ୍ତ ଉପବୀତଧାରୀ ପାଟଭକ୍ତ, ଦେଉଳିଆ ଓ ଶ୍ରୀବେକିଡି ୧୪ଭକ୍ତଙ୍କୁ ନେଇ ପାରମ୍ପରିକ ଚଡ଼କମେଳା ଅନୁଷ୍ଠିତ ହେଉଛି। କୋଭିଡ୍-୧୯ର ଦ୍ୱିତୀୟ ଲହର ସମଗ୍ର ଦେଶରେ ଦ୍ରୁତଗତିରେ ସଂକ୍ରମିତ ହେଉଥିବାରୁ ଜିଲା ପ୍ରଶାସନ, ଟ୍ରଷ୍ଟବୋର୍ଡ଼ ଭକ୍ତଙ୍କ ଭିଡ଼କୁ ଲକ୍ଷ୍ୟ ରଖି ଚଡ଼କମେଳାରେ କଟକଣା କଡ଼ାକଡ଼ି କରିଛନ୍ତି। ମନ୍ଦିର ପୂର୍ବ ସିଂହଦ୍ୱାର ଓ ଦକ୍ଷିଣ ଦ୍ୱାର ପ୍ରବେଶ ପଥ ମୁଖ୍ୟ ଫାଟକରେ ପ୍ରଶାସନ ପକ୍ଷରୁ ତାଲା ପକାଇ ପୋଲିସକୁ ସଜାଗ ରଖାଯାଇଛି। ସୀମିତ ସେବାୟତ, ପୂଜାରୀ ଓ ୧୪ ଉପବୀତଧାରୀ ଭକ୍ତଙ୍କୁ କେବଳ ମନ୍ଦିରକୁ ପ୍ରବେଶ ପାଇଁ ଅନୁମତି ମିଳିଥିବା ବେଳେ ଶ୍ରଦ୍ଧାଳୁଙ୍କୁ ମନ୍ଦିର ପରିସରକୁ ଯିବା ବାରଣ କରାଯାଇଛି। ଅପରପକ୍ଷରେ ଚନ୍ଦନେଶ୍ୱରଜୀଉଙ୍କ କୌଳିକ ପ୍ରଥାନୁଯାୟୀ ନୀତିକାନ୍ତି ପୂଜାର୍ଚ୍ଚନା କରାଯାଉଛି। ଏଥିସହିତ ଉପବୀତଧାରୀ ୧୪ଭକ୍ତ ସେବାୟତ, ପୂଜାରୀ ଓ ବାଦ୍ୟକାରମାନେ କୋଭିଡ୍ ନିୟମ ମାନି ବେକଡା ନୃତ୍ୟ, ଗ୍ରାମରେ ଆଲୋମ ପୂଜାର୍ଚ୍ଚନା କରୁଛନ୍ତି।
ରବିବାର ଚନ୍ଦନେଶ୍ୱର ମହାଦେବଙ୍କ ଅନ୍ୟ ଏକ ଆକର୍ଷଣ ହେଉଛି କାମିନୀ ବିବାହ। ଜୀଉଙ୍କ ବିବାହ ନିମନ୍ତେ ଭକ୍ତ, ସେବାୟତ, ପୂଜାରୀ ଓ ଟ୍ରଷ୍ଟବୋର୍ଡ଼ର ସଦସ୍ୟମାନଙ୍କ ଦ୍ୱାରା ତପତ୍ରତା ପ୍ରକାଶ ପାଇଛି। ଶନିବାର ନିଶିବସାନରୁ ସମସ୍ତ ଭକ୍ତ ଓ ପ୍ରଶାସକମାନେ ମନ୍ଦିରରୁ ପୂଜାର୍ଚ୍ଚନା କରି ନିକଟସ୍ଥ ଭଟ୍ଟପୁର ଗାଁ ମାଳାକାର ଘରେ ଯାଇ ମହାଦେବଙ୍କ ବିବାହ ନିମନ୍ତେ ନିମନ୍ତ୍ରଣ କରିବେ ଏବଂ ସେଠାରୁ କନ୍ୟା କାମିନୀଙ୍କୁ ସୁସଜ୍ଜିତ ଶୋଭାଯାତ୍ରାରେ ନେଇ ମନ୍ଦିର ବିଜେ କରିବେ। ବାବା ଚନ୍ଦନେଶ୍ୱର ମହାଦେବଙ୍କ ରୁଦ୍ଧଦ୍ୱାରରେ ମହାଦେବ ସୁନ୍ଦରୀ ଅସୁରୁଣୀଙ୍କୁ ବରଣମାଳା ପିନ୍ଧାଇବେ। କିମ୍ବଦନ୍ତୀ ଓ ପ୍ରଥାନୁଯାୟୀ ସେବାୟତଙ୍କ ଦ୍ୱାରା କାମିନୀ ବିବାହ ସମ୍ପୂର୍ଣ୍ଣ ହେବ। ବିଶ୍ୱାସର ଠାକୁର ଶ୍ରୀ ଶ୍ରୀ ଚନ୍ଦନେଶ୍ୱର ମହାଦେବଙ୍କ କାମିନୀ ବିବାହର ବହୁ ରୋମାଞ୍ଚକର କାହାଣୀ ଏବେ ବି ଶୈବଭକ୍ତଙ୍କ ଭାବାବେଗକୁ ଉଜ୍ଜୀବିତ କରୁଛି। ହେଲେ ଲକ୍ଷାଧିକ ଭକ୍ତଙ୍କ ଗହଳି ହେଉଥିବା ଏହି ପ୍ରସିଦ୍ଧ ଶୈବପୀଠ ମହାମାରୀ କରୋନାରେ ମଳିନ ପଡ଼ିଛି। କେବଳ ଚନ୍ଦନେଶ୍ୱର ବଜାର ଖୋଲା ଥିବା ବେଳେ ମନ୍ଦିର ପରିସର ବାହାରେ କାଁ ଭାଁ ଶୈବଭକ୍ତ ଭଗବାନଙ୍କୁ ଆରାଧନା କରି ଫେରୁଛନ୍ତି।
