ବମ୍ବେ: ଏକତା କପୁରଙ୍କ ଧାରାବାହିକ ‘କସୌଟି ଜିନ୍ଦେଗୀ କେ’ରେ ନାୟକ ଭୂମିକାରେ ନଜର ଆସିଥିଲେ ଅଭିନେତା ସିଜେନ୍ ଖାନ୍। ଶ୍ୱେତା ତିଓ୍ବାରୀଙ୍କ ସହ ତାଙ୍କର ଯୋଡ଼ିକୁ ଦର୍ଶକେ ବେଶ୍ ପସନ୍ଦ କରିଥିଲେ। ଏବେ କିନ୍ତୁ ସେ ଲାଇମ୍ଲାଇଟ୍ରୁ ଦୂରେଇ ଯାଇଥିବା ବେଳେ ବ୍ୟକ୍ତିଗତ କାରଣକୁ ନେଇ ଚର୍ଚ୍ଚାରେ ଅଛନ୍ତି।
କିଛିଦିନ ତଳେ ସିଜେନ ଡେଟ୍ କରୁଥିବା କୁହାଯାଇଥିଲା। ଏପରିକି ସେ ବିବାହ କରିପାରନ୍ତି ବୋଲି ଶୁଣାଯାଉଥିଲା। ହେଲେ ଏସବୁ ମିଥ୍ୟା ବୋଲି ଜଣାପଡ଼ିଛି। ଜଣେ ମହିଳା ଏବେ ସିଜେନଙ୍କ ଉପରେ ପ୍ରତାରଣା ଅଭିଯୋଗ କରିଛନ୍ତି। କେବଳ ଗ୍ରୀନ୍ କାର୍ଡ ପାଇଁ ସିଜେନ୍ ତାଙ୍କୁ ବିବାହ କରି ଛାଡ଼ି ଦେଇଥିବା ସେ କହିଛନ୍ତି।
ଆଇଶା ପିରାନୀ(୪୭) ନାମକ ଜଣେ ମହିଳା ସିଜେନଙ୍କ ସ୍ତ୍ରୀ ବୋଲି ନିଜକୁ ଦାବି କରିଛନ୍ତି। ୨୦୧୫ରୁ ୧୭ ଯାଏ ଉଭୟ ବିବାହ ବନ୍ଧନରେ ଥିଲେ। କେବଳ ଆମେରିକାରେ ଗ୍ରୀନ୍ କାର୍ଡ ପାଇଁ ସିଜେନ ତାଙ୍କୁ ବିବାହ କରିଥିଲେ। ସେ ବିବାହିତ ଥିବା ସତ୍ତ୍ୱେ ତାଙ୍କୁ ମିଛ କହିଥିଲେ। ଯେତେବେଳେ ତାଙ୍କୁ ଗ୍ରୀନ୍କାର୍ଡ ମିଳିଯାଇଥିଲା ସେ ଅଲଗା ହୋଇଯାଇଥିଲେ ବୋଲି ସେ ଅଭିଯୋଗ ମଧ୍ୟ କରିଛନ୍ତି।
ପ୍ରଥମ ବିବାହରେ ସମସ୍ୟା କାରଣରୁ ସିଜେନଙ୍କ ସହ ବମ୍ବେରେ ତାଙ୍କର ବନ୍ଧୁତା ସ୍ଥାପନ ହୋଇଥିଲା। ମା’ଙ୍କୁ ନଜଣାଇ ବିବାହ କରିବାକୁ ସେ ପ୍ରସ୍ତାବ ଦେଇଥିଲେ। ସେ ବୟସରେ କମ୍ ଥିବା ବୋହୂ ଖୋଜୁଥିଲେ। ଭଲପାଉଥିବା ହେତୁ ସିଜେନ୍ଙ୍କ ଏହି କଥାରେ ସେ ହଁ ଭରିଥିଲେ। ହେଲେ ବିବାହର ଦୁଇ ବର୍ଷ ପରେ ସେ ପୂର୍ବ ପ୍ରେମିକାଙ୍କ ସହ କଥା ହୋଇଥିଲେ। ଏହାକୁ ପସନ୍ଦ ନ କରିବା ଯୋଗୁ ଉଭୟଙ୍କର ଝଗଡ଼ା ହୋଇଥିଲା।
ଅପରପକ୍ଷେ ସିଜେନ୍ କହିଛନ୍ତି ସେ କେବଳ ତାଙ୍କର ଜଣେ ପ୍ରଶଂସକ। ତାଙ୍କୁ ସେ ବିବାହ କରିନାହାନ୍ତି। ମୋ ସହ ପଙ୍ଗା ନେଇସେ ଲୋକପ୍ରିୟ ହେବାକୁ ଚାହାନ୍ତି। ଫଟୋସପ୍ କରି ସେ ସ୍କ୍ରିନ୍ଶଟ୍ ଦେଖାଉଥିବା ମଧ୍ୟ ଅଭିନେତା କହିଛନ୍ତି।
