ନୂଆଦିଲ୍ଲୀ, ୮ା୧୦: ଭାରତର ପ୍ରଧାନ ବିଚାରପତି (ସିଜେଆଇ) ୟୁ.ୟୁ. ଲଲିତଙ୍କୁ କେନ୍ଦ୍ର ସରକାର ତାଙ୍କ ଉତ୍ତରାଧିକାରୀ ବାଛିବାକୁ କହିଛନ୍ତି। ସିଜେଆଇ ଲଲିତ ପରବର୍ତ୍ତୀ ପ୍ରଧାନ ବିଚାରପତିଙ୍କ ନାମ ସ୍ପଷ୍ଟ କରିବା ପରେ ନୂଆ ବିଚାରପତି ନିଯୁକ୍ତି ନେଇ ସୁପ୍ରିମକୋର୍ଟ କଲେଜିୟମ୍ର ବୈଠକ ଡାକିପାରିବେ ନାହିଁ। ଅର୍ଥାତ୍ ସୁପ୍ରିମକୋର୍ଟରେ ଖାଲି ଥିବା ବିଚାରପତି ପଦବୀ ପୂରଣ ସକାଶେ ଜଷ୍ଟିସ୍ ଲଲିତଙ୍କ ନେତୃତ୍ୱାଧୀନ କଲେଜିୟମ୍ ସୁପାରିସ କ୍ଷମତା ହରାଇବ। ସିଜେଆଇ ଲଲିତ ଆସନ୍ତା ନଭେମ୍ବର୮ରେ ଅବସର ନେବେ। ବରିଷ୍ଠତା ଦୃଷ୍ଟିରୁ ଜଷ୍ଟିସ୍ ଡି.ଓ୍ବାଇ. ଚନ୍ଦ୍ରଚୂଡ଼ ନୂଆ ସିଜେଆଇ ହେବେ। ଚନ୍ଦ୍ରଚୂଡ଼ ନଭେମ୍ବର ୯ରେ ଶପଥ ନେଲେ ଏହାର ଠିକ୍ ୨ ବର୍ଷ ପରେ ଅର୍ଥାତ୍ ୨୦୨୪ ନଭେମ୍ବର ୧୦ରେ ଅବସର ଗ୍ରହଣ କରିବେ। ତେବେ ପରମ୍ପରା ଅନୁଯାୟୀ ସିଜେଆଇ ନିଜ ଉତ୍ତରାଧିକାରୀ ବାଛନ୍ତୁ ବୋଲି ଆଇନ ମନ୍ତ୍ରଣାଳୟ ପକ୍ଷରୁ ଅନୁରୋଧ କରାଯାଇଛି। ୫ ବରିଷ୍ଠ ବିଚାରପତି ଏବଂ ସିଜେଆଇଙ୍କ ମଧ୍ୟରେ ନୂଆ ନିଯୁକ୍ତିକୁ ନେଇ ମତଭେଦ ଲାଗି ରହିଥିବାବେଳେ କେନ୍ଦ୍ରର ଏହି ଅନୁରୋଧ ଅଡ଼ୁଆ ସ୍ଥିତି ସୃଷ୍ଟି କରିଛି।
