ନୂଆଦିଲ୍ଲୀ,୧୮।୧ : ସୁପ୍ରିମକୋର୍ଟର ପାଞ୍ଚ ଜଣିଆ ସମ୍ବିଧାନ ବେଞ୍ଚ ଦିଲ୍ଲୀରେ ଅଧିକାରୀଙ୍କ ସ୍ଥାନାନ୍ତର-ପୋଷ୍ଟିଂ ଅଧିକାର ଦାବି କରିଥିବା ମୁଖ୍ୟମନ୍ତ୍ରୀ ଅରବିନ୍ଦ କେଜରିୱାଲ ସରକାରଙ୍କ ଆବେଦନ ଉପରେ ରାୟ ବୁଧବାର ସଂରକ୍ଷିତ ରଖିଛନ୍ତି। ଶୁଣାଣି ଶେଷ ହେବା ପରେ କେନ୍ଦ୍ର ସରକାରଙ୍କ ପରାମର୍ଶଦାତା ସୋଲିସିଟର ଜେନେରାଲ ତୁଷାର ମେହେଟ୍ଟା ଏହି ମାମଲାକୁ ଏକ ବଡ଼ ବେଞ୍ଚକୁ ପଠାଇବାକୁ ଚେଷ୍ଟା କରିଥିଲେ।
ସେ କହିଥିଲେ ରାଜଧାନୀ ଅରାଜକତାକୁ ଆଖିମୁଜି ରହିବାକୁ ଦିଆଯାଇପାରିବ ନାହିଁ । ଜାନୁଆରୀ ୧୭ ରେ ଏହି ମାମଲାର ଶୁଣାଣି ହେବା ପୂର୍ବରୁ ଏବଂ ତୁଷାର ମେହେଟ୍ଟା ଦିଲ୍ଲୀ ସରକାରଙ୍କ କାର୍ଯ୍ୟଦକ୍ଷତା ଉପରେ ପ୍ରଶ୍ନ ଉଠାଇଥିଲେ।
ସେ କହିଥିଲେ ସର୍ବୋଚ୍ଚ ନ୍ୟାୟାଳୟର ଏକ ସାମ୍ବିଧାନିକ ଖଣ୍ଡପୀଠରେ ମାମଲାର ବିଚାରାଧୀନ ଥିବା ଜାଣିବା ସତ୍ତ୍ୱେ ଆମ ଆଦମୀ ପାର୍ଟି (ଏଏପି) ସରକାର ନକାରାତ୍ମକ ଆଭିମୁଖ୍ୟ ଗ୍ରହଣ କରୁଛନ୍ତି। ଏଏପି ସରକାର ଏଲଜି ଭି.କେ ସାକ୍ସେନାଙ୍କ ବିରୋଧରେ ବିରୋଧ ପ୍ରଦର୍ଶନ କରୁଛନ୍ତି। ସୋଲିସିଟର ଜେନେରାଲ କହିଥିଲେ ଯେ ବିରୋଧ ଏବଂ ନାଟକବାଜି କୋର୍ଟର ପ୍ରକ୍ରିୟା ପାଇଁ ବିକଳ୍ପ ହୋଇପାରିବ ନାହିଁ। ଜାତୀୟ ରାଜଧାନୀରେ ଏପରି ପ୍ରତିବାଦ ଘଟୁଥିବାର ବିଶ୍ୱ ସମୁଦାୟ ଦେଖୁଛନ୍ତି। ଏହା ଲଜ୍ଜାଜନକ ବିଷୟ ପାଲଟିଛି।
