ମୁମ୍ବାଇ,୫।୪: ପୂର୍ବତନ ପୋଲିସ କମିଶନର ପରମବୀର ସିଂଙ୍କ ଆବେଦନ ଉପରେ ବିଚାର କରି ହାଇକୋର୍ଟ ସୋମବାର ବଡ଼ ଫଇସଲା ଶୁଣାଇଛନ୍ତି। ୧୦୦କୋଟି ଟଙ୍କାର ବଟି ଆଦାୟ ମାମଲାର ଯାଞ୍ଚ୍ ଏଣିକି ସିବିଆଇ କରିବ ବୋଲି କୋର୍ଟ କହିଛନ୍ତି। ମହାରାଷ୍ଟ୍ର ଗୃହମନ୍ତ୍ରୀ ଅନୀଲ ଦେଶମୁଖଙ୍କ ବିରୋଧରେ ଅଣାଯାଇଥିବା ଅଭିଯୋଗର ବିଚାର କରି କୋର୍ଟ କହିଛନ୍ତି ଯେ, ଏନେଇ ମାମଲା ଦାଏର କରାଯାଇଛି। ପୋଲିସ ଏହାର ତଦନ୍ତ ଆରମ୍ଭ କରିବ। ତେବେ ପୋଲିସ ତଦନ୍ତ ପରେ ମାମଲା ସିବିଆଇ ହାତକୁ ଯିବ। କୋର୍ଟ କହିଛନ୍ତି ଯେ, ଅନୀଲ ରାଜ୍ୟର ଗୃହମନ୍ତ୍ରୀ। ତେଣୁ ମାମଲାର ନିରପେକ୍ଷ ଯାଞ୍ଚ୍ ଜରୁରୀ। ସୂଚନାଯୋଗ୍ୟ, କୋର୍ଟଙ୍କ ଫଇସଲା ଆଧାରରେ ଆସନ୍ତା ୧୫ ଦିନ ମଧ୍ୟରେ ସିବିଆଇ ନିର୍ଦ୍ଦେଶକଙ୍କୁ ମାମଲା ହସ୍ତାନ୍ତର କରାଯିବ। ଅନୀଲଙ୍କ ବିରୋଧରେ ପ୍ରମାଣ ମିଳିଲେ ଏନେଇ ସିବିଆଇ ପକ୍ଷରୁ ମାମଲା ଦାଏର କରାଯିବ।
