ନୂଆଦିଲ୍ଲୀ,୩୧।୮: ଭୀମ୍ ୟୁପିଆଇ ଏବଂ ରୁପେ ଭଳି ପ୍ଲାଟ୍ଫର୍ମରେ ହୋଇଥିବା ପେମେଣ୍ଟ ଉପରେ ବ୍ୟାଙ୍କଗୁଡିକ ନେଇଥିବା ଚାର୍ଜ ରିଫଣ୍ଡ କରିବେ। ଜାନୁୟାରୀ ପହିଲାଠାରୁ ହୋଇଥିବା ନେଣଦେଣ ଉପରେ ଉକ୍ତ ରିଫଣ୍ଡ ମିଳିବ ବୋଲି ଜଣାପଡିଛି। ଏଥିଲାଗି ଆୟକର ବିଭାଗ ପକ୍ଷରୁ ରବିବାର ବ୍ୟାଙ୍କଗୁଡିକୁ ନିର୍ଦ୍ଦେଶ ଦିଆଯାଇଛି। ଡିଜିଟାଲ ନେଣଦେଣକୁ ଉତ୍ସାହିତ କରିବା ଏବଂ କ୍ୟାଶ୍ଲେସ୍ ଅର୍ଥ ବ୍ୟବସ୍ଥା ଆଡ଼କୁ ଦେଶକୁ ବଢାଇବା ଦିଗରେ ସରକାର ଫାଇନାନ୍ସ ଆଇନ ୨୦୧୯ର ଧାରା ୨୬୯ଏସ୍ୟୁରେ ଏଭଳି ଏକ ବ୍ୟବସ୍ଥା କରିଛନ୍ତି। କେନ୍ଦ୍ରୀୟ ପ୍ରତ୍ୟକ୍ଷ ଟିକସ ବୋର୍ଡ(ସିବିଡିଟି) ପକ୍ଷରୁ ଏ ସଂକ୍ରାନ୍ତରେ ଏକ ସର୍କୁଲାର ଜାରି କରାଯାଇଛି। ଏହି ପ୍ଲାଟ୍ଫର୍ମଗୁଡିକରେ ଆଗାମୀ ଦିନରେ ହେଉଥିବା ନେଣଦେଣ ଉପରେ କୌଣସି ଚାର୍ଜ ନ ଲାଗୁ କରିବା ଲାଗି ବ୍ୟାଙ୍କଗୁଡିକୁ ଏଥିରେ ପରାମର୍ଶ ଦିଆଯାଇଛି। କୌଣସି ବାଣିଜି୍ୟକ ସଂସ୍ଥା ବା ବ୍ୟକ୍ତିବିଶେଷ ବାର୍ଷିକ ୫୦ କୋଟି ଟଙ୍କାର କାରବାର, ବିକ୍ରି କିମ୍ବା ଅର୍ଥ ଗ୍ରହଣ କରୁଥିଲେ ତାଙ୍କୁ ତୁରନ୍ତ ଭିତ୍ତିରେ ଏହି ପ୍ଲାଟ୍ଫର୍ମଗୁଡିକରେ ନେଣଦେଣ ସୁବିଧା ପ୍ରଦାନ କରିବାକୁ କୁହାଯାଇଛି। ଏହା ମଧ୍ୟରେ ଭୀମ୍ ୟୁପିଆଇ, ରୁପେ ଏବଂ ୟୁପିଆଇ କ୍ୟୁଆର୍ କୋଡ୍ ସାମିଲ ରହିଛି। ଚଳିତ ବର୍ଷ ଜାନୁୟାରୀ ପହିଲାଠାରୁ ଉକ୍ତ ବର୍ଗରେ ହୋଇଥିବା ନେଣଦେଣ ଉପରେ ଲାଗୁ ଚାର୍ଜର ରିଫଣ୍ଡ ତୁରନ୍ତ ଭିତ୍ତିରେ କରିବାକୁ କୁହାଯାଇଛି। କେତେକ ନିର୍ଦ୍ଦିଷ୍ଟ ପ୍ଲାଟ୍ଫର୍ମରେ ଇ-ନେଣଦେଣ ଲାଗି ଜାନୁୟାରୀ ପହିଲାରୁ କୌଣସି ମର୍ଚ୍ଚାଣ୍ଟ ଡିସ୍କାଉଣ୍ଟ ରେଟ୍ (ଏମ୍ଡିଆର୍) ନ ଲାଗୁ କରିବାକୁ ପୂର୍ବରୁ ନିର୍ଦ୍ଦେଶ ରହିଛି। ମାତ୍ର କିଛି ବ୍ୟାଙ୍କ ୟୁପିଆଇରେ ହେଉଥିବା ନେଣଦେଣ ଉପରେ ଚାର୍ଜ ଲଗାଉଥିବା ସରକାରଙ୍କ ନଜରକୁ ଆସିଛି। କେତେକ କ୍ଷେତ୍ରରେ ନିର୍ଦ୍ଦିଷ୍ଟ ଥର ନେଣଦେଣ ସୀମା ପରେ ଚାର୍ଜ ଲାଗୁ ହେଉଥିବା ଦେଖାଯାଉଛି। ବ୍ୟାଙ୍କଗୁଡିକର ଏଭଳି କାର୍ଯ୍ୟକଳାପ ସରକାରଙ୍କ ଆଇନକୁ ଅବମାନନା କରୁଥିବାରୁ ଏଭଳି ନିର୍ଦ୍ଦେଶ ଦିଆଯାଇଥିବା ସିବିଡିଟି ପକ୍ଷରୁ ସୂଚନା ଦିଆଯାଇଛି।
