ମୁମ୍ବାଇ: ଅଭିନେତ୍ରୀ ନୟନତାରା ଏବଂ ଜୟଙ୍କ ଫିଲ୍ମ ‘ଅନ୍ନପୂର୍ଣ୍ଣି’ ନିକଟରେ ଓଟିଟିରେ ରିଲିଜ୍ ହୋଇଛି। ହେଲେ ଏହି ଫିଲ୍ମକୁ ନେଇ ଅନେକ ବିବାଦ ମୁଣ୍ଡ ଟେକିଛି। ସିନେମାରେ ହିନ୍ଦୁ ସମୂଦାୟର ଧାର୍ମିକ ଭାବନାକୁ କ୍ଷତି ପହଞ୍ଚାଇବା ଏବଂ ଲଭ୍ ଜିହାଦ୍କୁ ସମର୍ଥନ କରିବା ଭଳି ଅଭିଯୋଗ ରହିଛି। ଗତ ଡିସେମ୍ବର ୧ରେ ରିଲିଜ୍ ହୋଇଥିବା ଏହି ଫିଲ୍ମରେ ପ୍ରଭୁ ରାମଙ୍କ ସମ୍ବନ୍ଧୀୟ ଏକ ବିବାଦପୂର୍ଣ୍ଣ ଟିପ୍ପଣୀକୁ ସାମିଲ କରାଯାଇଛି। ଯେଉଁଥିପାଇଁ ସିନେମା ଏବେ ବିବାଦ ଘେରକୁ ଆସିଛି।
ଫିଲ୍ମ ନିର୍ମାତା ଆର୍. ରବିନ୍ଦ୍ରନ୍ ଏବଂ ଯତୀନ ସେଠୀ, ନିର୍ଦ୍ଦେଶକ ନିଲେଶ କ୍ରିଷ୍ଣାଙ୍କ ସମେତ ଅଭିନେତ୍ରୀ ନୟନତାରାଙ୍କ ସହ ସମସ୍ତ ଷ୍ଟାରଙ୍କ ବିରୋଧରେ ମୁମ୍ବାଇ ପରେ ଏବେ ମଧ୍ୟପ୍ରଦେଶରେ ମଧ୍ୟ ମାମଲା ରୁଜୁ କରାଯାଇଛି। ମୁମ୍ବାଇରେ ଅଭିଯୋଗକାରୀ ରମେଶ ସୋଲଙ୍କି ‘ଏକ୍ସ’ରେ ତାଙ୍କର ଏକ ପୋଷ୍ଟ ଶେୟାର କରିବା ସହ ଥାନାରେ ଅଭିଯୋଗ କରିଛନ୍ତି। ଯେଉଁଥିରେ ବାଲ୍ମୀକି ରାମାୟଣକୁ ଭୁଲ ଭାବେ ଦର୍ଶାଯାଇଥିବା ସହ ସିନେମାରେ ପ୍ରଭୁ ରାମ ମାଂସ ଭକ୍ଷଣ କରୁଥିବା ଆକ୍ଷେପ କରାଯାଇଛି।
ମଧ୍ୟପ୍ରଦେଶ ଜବଲପୁରରେ ହିନ୍ଦୁବାଦୀ ସଂଗଠନ ନୟନତାରାଙ୍କ ସମେତ ଅନ୍ୟ ଷ୍ଟାରଙ୍କ ବିରୋଧରେ ମାମଲା ରୁଜୁ କରିଛି। ହିନ୍ଦୁସେବା ପରିଷଦର ଅତୁଲ ଜୈଶୱାନିଙ୍କ କହିବା ମୁତାବକ, ସିନେମାରେ ଏପରି କିଛି ଦୃଶ୍ୟ ରହିଛି ଯେଉଁଥିରେ ପ୍ରଭୁ ରାମଙ୍କୁ ଅପମାନ କରାଯାଇଛି। ଏଥିସହ କିଛି ଟିପ୍ପଣୀ ରହିଛି, ଯାହା ହିନ୍ଦୁଙ୍କ ଭାବନାକୁ କ୍ଷତି ପହଞ୍ଚାଉଛି। ଫିଲ୍ମରେ ନୟନତାରା ଜଣେ ରୋଷେୟା ଭୂମିକାରେ ନଜରକୁ ଆସିଛନ୍ତି। ସେଥିରେ ସେ ତାଙ୍କ ମା’ ବାରଣ ସତ୍ତ୍ୱେ ଏକ ରିଆଲିଟି ଶୋ’ ‘ଇଣ୍ଡିଆଜ୍ ବେଷ୍ଟ ସେଫ୍’ରେ ଭାଗ ନେଇଛନ୍ତି। ସେ ଜଣେ ବ୍ରାହ୍ମଣ ଘରର ଝିଅ ହୋଇଥିବାବେଳେ ସେ ଆମିଷ ଖାଦ୍ୟ ରାନ୍ଧିବା ଏବଂ ରୋଷେଇ ପ୍ରତିଯୋଗିତା ପୂର୍ବରୁ ସେ ନମାଜ ପଢୁଥିବା ଦେଖିବାକୁ ମିଳିଛି। ତେବେ ଫିଲ୍ମରେ କାର୍ତ୍ତିକ କୁମାର, ସତ୍ୟରାଜ୍, ରେଣୁକା, କେ.ଏସ୍. ରବି କୁମାର, ପୂର୍ଣ୍ଣିମା ରବି, ସୁରେଶ ଚକ୍ରବର୍ତ୍ତୀ, ରେଡିନ କିଙ୍ଗ୍ସଲେ ପ୍ରମୁଖ ନଜରକୁ ଆସିଛନ୍ତି।
