ଓ୍ବାଶିଂଟନ,୨୨।୧୧: ଆମେରିକାର ୱିସ୍କୋସିନରେ ଏକ ବଡ଼ ଦୁର୍ଘଟଣା ଘଟିଛି। ଖ୍ରୀଷ୍ଟମାସ ପରେଡରେ ଏହି ଦୁର୍ଘଟଣା ଘଟିଛି। ଏହି ଘଟଣାରେ ୨୦ରୁ ଅଧିକ ଜଣ ଆହତ ହୋଇଛନ୍ତି। ଆହତମାନଙ୍କ ମଧ୍ୟରେ ଅଧିକାଂଶ ଶିଶୁ ଅଛନ୍ତି। ସମସ୍ତ ଆହତଙ୍କୁ ଚିକିତ୍ସା ଲାଗି ହସ୍ପିଟାଲରେ ଭର୍ତ୍ତି କରାଯାଇଛି। ପରେଡ ସମୟରେ ଦ୍ରୁତ ଗତିରେ ଏକ ଲାଲ କାର୍ ପ୍ରବେଶ କରି ଧକ୍କା ଦେଇଥିବା ସ୍ଥାନୀୟ ପୋଲିସ ପକ୍ଷରୁ ସୂଚନା ପ୍ରଦାନ କରାଯାଇଛି।
ଘଟଣାସ୍ଥଳରେ ଉପସ୍ଥିତ ପୋଲିସ କାର ଡ୍ରାଇଭରକୁ ଅଟକ ରଖିଛନ୍ତି। ତେବେ ତାଙ୍କୁ ଏପର୍ଯ୍ୟନ୍ତ ଗିରଫ କରାଯାଇ ନାହିଁ। ପୋଲିସ ଘଟଣାର ତଦନ୍ତ ଆରମ୍ଭ କରିଛି ଏବଂ ଡ୍ରାଇଭରକୁ ପଚରାଉଚରା କରାଯାଉଛି। ବିଭିନ୍ନ ଦିଗରୁ ପୋଲିସ ଏହି ଘଟଣାର ତଦନ୍ତ କରୁଛି।
ସନ୍ଦିଗ୍ଧଙ୍କ କାରକୁ ଜବତ କରାଯାଇଛି ବୋଲି ସିଟି ପୋଲିସ ମୁଖ୍ୟ ଡାନ ଥମ୍ପସନ କହିଛନ୍ତି। ଘଟଣାର ତଦନ୍ତ ଚାଲିଥିବା ସେ କହିଛନ୍ତି। ଆହତମାନଙ୍କ ମଧ୍ୟରୁ କେତେକଙ୍କୁ ପୋଲିସ ଏବଂ କିଛି ଲୋକଙ୍କୁ ସେମାନଙ୍କ ପରିବାର ଦ୍ୱାରା ହସ୍ପିଟାଲରେ ଭର୍ତ୍ତି କରାଯାଇଛି। ଲୋକଙ୍କୁ ଘଟଣାସ୍ଥଳକୁ ନ ଯିବାକୁ ପୋଲିସ ନିବେଦନ କରିଛି। ଘଟଣାର ଭିଡିଓରେ ଏକ ଏସୟୁଭି ଲୋକଙ୍କୁ ଧକ୍କା ଦେଇଥିବାର ଦେଖାଯାଉଛି। ଏବେ ଏହି ଭିଡ଼ିଓ ଭାଇରାଲ ହେବାରେ ଲାଗିଛି।
ଏହି ଘଟଣା ରବିବାର ଅପରାହ୍ନରେ ଆମେରିକା ସମୟ ୪ଟା ୩୦ରେ ଘଟିଛି। ବାର୍ଷିକ ଖ୍ରୀଷ୍ଟମାସ ପରେଡ ଦେଖିବାକୁ ବହୁ ସଂଖ୍ୟକ ଲୋକ ଆସିଥିବା ବେଳେ ଏହି ଘଟଣା ଘଟିଥିଲା। ଜଣେ ସନ୍ଦିଗ୍ଧ ବ୍ୟକ୍ତିଙ୍କୁ ଚିହ୍ନଟ କରାଯାଇଥିବା ପୋଲିସ କହିଛି।
