କେନ୍ଦୁଝର,୧ା୧(ନରେଶ ଚନ୍ଦ୍ର ପଟ୍ଟନାୟକ): ନୂଆବର୍ଷ ପାଳନ ପାଇଁ ସମସ୍ତେ ଖୁସି ମନାଇବାକୁ ପ୍ରସ୍ତୁତ କରୁଥିବା ବେଳେ ପ୍ରଥମ ଦିନରେ ଘଷିପୁରା ଥାନା ବାରିଗାଁ ନିକଟରେ ସୋମବାର ସକାଳେ ଏକ କାର୍ ଓ କଣ୍ଟେନର ଧକ୍କା ହେବାରୁ କାର୍ରେ ଥିବା ୪ ଜଣ ଗୁରୁତର ହୋଇଛନ୍ତି। ଖବର ପାଇ ପୋଲିସ ଦମକଳ ବାହିନୀ ସହାୟତାରେ ଗୁରୁତରମାନଙ୍କୁ ଉଦ୍ଧାର କରି ଆନନ୍ଦପୁର ଉପଖଣ୍ଡ ଡାକ୍ତରଖାନାରେ ଚିକିତ୍ସା ପାଇଁ ଭର୍ତ୍ତି କରିଛି। ସେମାନଙ୍କ ସଠିକ୍ ପରିଚୟ ମିଳିନାହିଁ। ତେବେ ସେମାନେ କଟକ ଜିଲା ବାଙ୍କୀ ଅଞ୍ଚଳରୁ ଘଟଗାଁ ମା’ ତାରିଣୀ ଦର୍ଶନ କରିବାକୁ ଆସୁଥିଲେ ବୋଲି କୁହାଯାଉଛି।
ପ୍ରକାଶ ଯେ, ଉକ୍ତ ସ୍ଥାନରେ ଜାତୀୟ ରାଜପଥ ୨୦ କାମ ଅସମ୍ପୂର୍ଣ୍ଣ ଥିବାରୁ ଗୋଟିଏ ରାସ୍ତାରେ ଗାଡ଼ି ଯାତାୟତ କରିଥାଏ। ଏଣୁ ଏଭଳି ବାରମ୍ବାର ଦୁର୍ଘଟଣା ଘଟୁଥିଲେ ହେଁ ଏଥିପ୍ରତି କାହାର ନଜର ନାହିଁ। ଫଳରେ ଲୋକମାନେ ବହୁ ଅସୁବିଧାର ସମ୍ମୁଖୀନ ହେଉଛନ୍ତି। ପୋଲିସ ଗାଡ଼ି ଜବତ କରି ଘଟଣାର ତଦନ୍ତ କରୁଛି।
