କେନ୍ଦୁଝର,୩୧ା୧୨(ସ୍ବ.ପ୍ର./ଡି.ଏନ.ଏ.): କେନ୍ଦୁଝର କେନ୍ଦ୍ର ସମବାୟ ବ୍ୟାଙ୍କର କାର୍ଯ୍ୟକାରୀ ମୂଳଧନ ୧୧୬୨କୋଟି ଟଙ୍କାକୁ ଟପିଛି। ଋଣ ଆଦାୟର ହାର ଶତକଡ଼ା ୯୬ ପ୍ରତିଶତ ରହିଛି ବୋଲି ବ୍ୟାଙ୍କର ୬୮ତମ ସାଧାରଣ ପରିଷଦ ବୈଠକରେ ଅଧିକାରୀମାନେ ପ୍ରକାଶ କରିଛନ୍ତି। ଆର୍ଥିକ ବର୍ଷ ୨୦୨୧-୨୨ର ସମୀକ୍ଷା ଫର୍ଦ୍ଦ, ଆୟ ଓ ବ୍ୟୟ, ନିଟ୍ ଲାଭାଂଶର ବଣ୍ଟନ ସହ ବ୍ୟାଙ୍କ୍ ଅର୍ଜନ କରିଥିବା ସଫଳତା, ଉଦ୍ବେଗଜନକ ବିଷୟ ଉପରେ ସବିଶେଷ ଆଲୋଚନା କରାଯାଇଥିଲା।
କେନ୍ଦ୍ର ସମବାୟ ବ୍ୟାଙ୍କର ସଭାପତି କାନନ ବିହାରୀ ପହି ଅଧ୍ୟକ୍ଷତା କରି ବ୍ୟାଙ୍କର ଜମାସଂଗ୍ରହ ୬୨୯କୋଟି ୬୯ଲକ୍ଷ ଟଙ୍କାରେ ପହଞ୍ଚତ୍ଛି। ବିଗତ ଆର୍ଥିକ ବର୍ଷରେ ୫୧୯କୋଟି ୪୬ଲକ୍ଷ ଟଙ୍କା ଋଣ ପ୍ରଦାନ କରାଯାଇଥିଲା। ଚଳିତ ଆର୍ଥିକ ବର୍ଷରେ ଏହାକୁ ବୃଦ୍ଧି କରାଯାଇ ୫୪୪ କୋଟି ୬୪ଲକ୍ଷ ଟଙ୍କା ପ୍ରଦାନ କରାଯାଇଛି। ଏଥି ମଧ୍ୟରେ ୪୯୦ କୋଟି କୃଷି ଋଣ ଦିଆଯାଇଛି ବୋଲି କହିଥିଲେ। ବ୍ୟାଙ୍କର ସହକାରୀ ପରିଚାଳକ ଆଲୋକ ବଳ ଅତିଥି ପରିଚୟ ପ୍ରଦାନ କରିଥିବାବେଳେ କେନ୍ଦୁଝର କେନ୍ଦ୍ର ସମବାୟ ବ୍ୟାଙ୍କର ନିର୍ଦ୍ଦେଶକ ଦେବପ୍ରିୟ ପାତ୍ର, ସମବାୟ ୟୁନିୟନର ସଭାପତି ଅଟଳ ବିହାରୀ ଶତପଥୀ, ପୂର୍ବତନ ସମବାୟ ବ୍ୟାଙ୍କ ସଭାପତି କୃଷ୍ଣଚନ୍ଦ୍ର ମହାନ୍ତି, ସମବାୟ ସମିତି ସମୂହର ଉପନିବନ୍ଧକ ଶୁଭ୍ରକାନ୍ତି ତୁଙ୍ଗ, ସହକାରୀ ନିବନ୍ଧକ ଅଜୟ ସେଠୀ, କେନ୍ଦ୍ର ସମବାୟ ବ୍ୟାଙ୍କର ଉପ ସଭାନେତ୍ରୀ ରଶ୍ମିରେଖା ଚକ୍ର, କେନ୍ଦୁଝର ସମବାୟ ବ୍ୟାଙ୍କର ମୁଖ୍ୟ କାର୍ଯ୍ୟ ନିର୍ବାହୀ ଅଧିକାରୀ ରବିନ୍ଦ୍ରନାଥ କାଲୁଣ୍ଡିଆ, ନାବାର୍ଡର ଡିଡିଏମ ଦିପ୍ତିକାନ୍ତ ମଲ୍ଲିକ, ସହକାରୀ କୃଷି ଅଧିକାରୀ ଦିନବନ୍ଧୁ ସାହୁ ପ୍ରମୁଖ ବକ୍ତବ୍ୟ ପ୍ରଦାନ କରିଥିଲେ। ଜିଲାର ୪୬ଟି କୃଷିଋଣ ସମିତିର ସଭାପତି ଓ ପ୍ରତିନିଧିଙ୍କ ସମେତ ୧୦୧ ଜଣ ପ୍ରତିନିଧି ଯୋଗ ଦେଇଥିଲେ। ସୋସୋ, କାଳିଆହତା ଓ ପଦ୍ମପୁରରେ ନୂତନ ଶାଖା ଖୋଲାଯିବାକୁ ନିଷ୍ପତ୍ତି ନିଆଯିବା ସହିତ ଜିଲାରେ ଥିବା ୮ ସମବାୟ ସମିତିକୁ ୫ ଲକ୍ଷ ଟଙ୍କା ଲେଖାଏ ଆର୍ଥିକ ସହାୟତା ପ୍ରଦାନ କରାଯିବାକୁ ପ୍ରସ୍ତାବ ଗୃହିତ ହୋଇଥିଲା। ବ୍ୟାଙ୍କର ମୁଖ୍ୟ କାର୍ଯ୍ୟ ନିର୍ବାହୀ ଅଧିକାରୀ ରବିନ୍ଦ୍ରନାଥ କାଲୁଣ୍ଡିଆ ଆର୍ଥିକ ପ୍ରଗତି ଓ ବ୍ୟାଙ୍କର ବିବରଣୀ ପାଠ କରିଥିଲେ। ଶେଷରେ ଜିଲା ସମବାୟ ୟୁନିୟନର ସଭାପତି ଶତପଥୀ ଧନ୍ୟବାଦ ଅର୍ପଣ କରିଥିଲେ।
