କଳିଙ୍ଗନଗର,୧୦ା୨(ଡି.ଏନ.ଏ.):ଓଡ଼ିଶା ବିଦ୍ୟୁତ୍ ଶକ୍ତି ସଞ୍ଚାରଣ ନିଗମ(ଓପିଟିସିଏଲ)ର ଉଚ୍ଚ ଶକ୍ତିସମ୍ପନ୍ନ ୧୩୨ କେଭି ବିଦ୍ୟୁତ୍ ଖୁଣ୍ଟ ନିକଟରେ ଚଳିତଥର ବ୍ୟାସସରୋବର ମହୋତ୍ସବ ଆୟୋଜିତ ହେବାକୁ ନେଇ ଅନେକ ସମାଲୋଚନା ଏବଂ ବିରୋଧାଭାସ ଦେଖିବାକୁ ମିଳିଛି। ଚଳିତଥର ବ୍ୟାସସରୋବର ମହୋତ୍ସବକୁ ଦୁଇ ଦୁଇଟି ବଡ଼ ବିପଦ ରହିଛି। ମାତ୍ର ପୌର ପ୍ରଶାସନର ଏଥିପ୍ରତି ନିଘାନାହିଁ। ଓପିଟିସିଏଲ ମଧ୍ୟ ସାଧାରଣ ଲୋକଙ୍କ ସୁରକ୍ଷା ପ୍ରତି ଦାୟିତ୍ୱବାନ ନାହିଁ। ପ୍ରଶ୍ନ ଉଠୁଛି ଯେ କେଉଁ ଆଧାରରେ ଏବଂ ବିପଜ୍ଜନକ ଭାବେ ଏହି ସ୍ଥାନରେ ମହୋତ୍ସବ ନିମନ୍ତେ ଆବଶ୍ୟକୀୟ ଅନୁମତି ମିଳିଛି। ମହୋତ୍ସବ ଦେଖିବାକୁ ପରିବାର ନେଇ ଯାଇଥିବା କିଛି ଦର୍ଶକ ଏହାକୁ ସାମାଜିକ ଗଣମାଧ୍ୟମରେ ପୋଷ୍ଟ କରିବା ସହିତ ପ୍ରଶାସନ ସାଧାରଣ ଲୋକଙ୍କ ସୁରକ୍ଷା ପାଇଁ କେତେ ଚିନ୍ତିତ ତାକୁ ନେଇ ପ୍ରଶ୍ନ କରିଛନ୍ତି। ଏପରି କି ଅସୁରକ୍ଷିତ ସ୍ଥାନରେ ବ୍ୟାସସରୋବର ମହୋତ୍ସବ ଆୟୋଜନକୁ ବିଭିନ୍ନ ମହଲରେ ନିନ୍ଦା କରାଯାଇଛି।
ମହୋତ୍ସବସ୍ଥଳଠାରୁ ମାତ୍ର ୧୦-୧୫ ମିଟର ଦୂରତାରେ ପୂର୍ବତଟ ରେଳବାଇର ରେଳଲାଇନ ଯାଇଥିବାବେଳ ପ୍ରତି ୫ ମିନିଟରେ ଏହି ବାଟ ଦେଇ ରେଳ ଆତଯାତ କରୁଛି। ଗୁରୁବାର ଯୋଡ଼ାବର ଗ୍ରାମର ଅଭିନ ସାମଲ(୫୮) ମେଳାକୁ ଆସୁଥିଲେ। ଏହି ସମୟରେ ୨ ଟ୍ରେନ ଯାଉଥିବା ବେଳେ ଅଭିନ୍ନ ଗୋଟିଏ ଟ୍ରେନ ଦେଖି ପାର ହେଉଥିବା ବେଳେ ବିପରୀତ ଦିଗରୁ ଆସୁଥିବା ଟ୍ରେନ ଧକ୍କାରେ ମୃତ୍ୟୁବରଣ କରିଛନ୍ତି। ତଳେ ଲୌହ ଦାନବ ଉପରେ ୧୩୨ କେଭିର ବିଦ୍ୟୁତ୍ ଗତିଶୀଳ ରହିଥିବାବେଳେ ମଝିରେ ଅତ୍ୟନ୍ତ ବିପଦଜନକଭାବେ ବ୍ୟାସ ସରୋବର ମହୋତ୍ସବ ଚାଲୁରହିଛି। ଏହାକୁ ନେଇ ଯଦି ଆହୁରି ଅଘଟଣ ଘଟେ ଏଥିପାଇଁ କିଏ ଦାୟି ରହିବେ ବୋଲି ପ୍ରଶ୍ନବାଚୀ ସୃଷ୍ଟି ହୋଇଛି। ଓପିଟିସିଏଲର ଏପରି ଖାମଖିଆଲ ନୀତି ପାଇଁ ହଜାର ହଜାର ଜୀବନ ବାଜିରେ ଲାଗିଛି। ଏନେଇ ଓପିଟିସିଏଲ ଯାଜପୁର ରୋଡର ସହକାରୀ ଯନ୍ତ୍ରୀ ରାଜୀବ ଲୋଚନ ସାହୁଙ୍କୁ ପଚାରିବାରୁ ମେଳାରେ ଦୋଳି ସ୍ଥାପନ ପାଇଁ କୌଣସି ଅନୁମତି ପ୍ରଦାନ କରାଯାଇନାହିଁ। ମହୋତ୍ସବସ୍ଥଳ କେନ୍ଦ୍ରାପଡ଼ା ଡିଭିଜନ ଅଧୀନରେ ରହିଥିବାରୁ ଏନେଇ ସେମାନଙ୍କ ସହିତ ଯୋଗାଯୋଗ କରି ବେଆଇନ ଭାବେ ବିଦ୍ୟୁତ ନିୟମ ଉଲଂଘନକାରୀଙ୍କ ବିରୋଧରେ ଥାନାରେ ମାମଲା ଦାୟର କରାଯିବ ବୋଲି କହିଛନ୍ତି। ଘଟଣା ସମ୍ପର୍କରେ ପୌର ପ୍ରଶାସନର ପ୍ରତିକ୍ରିୟା ମିଳିପାରିନାହିଁ।
