ବେଙ୍ଗାଲୁରୁ,୧୫।୩:ଦୋକାନରୁ କୌଣସି ଜିନିଷ କିଣିଲେ ଆମେ ସାଧାରଣତଃ ସମ୍ପୂର୍ଣ୍ଣ ମୂଲ୍ୟ ପୈଠ କରିଥାଉ। ଉଦାହରଣ ସ୍ବରୂପ ଯଦି ଗୋଟିଏ ଜିନିଷର ଦାମ୍ ୨୪ଟଙ୍କା ୫୫ ପଇସା ତେବେ ଆମେ ସାଧାରଣତଃ ବିନା ପ୍ରଶ୍ନରେ ଦୋକାନୀଙ୍କୁ ସମ୍ପୂର୍ଣ୍ଣ ୨୫ ଟଙ୍କା ଦେଇଥାଉ। କିନ୍ତୁ ବେଙ୍ଗାଲୁରୁର ଜଣେ ଗ୍ରାହକଙ୍କଠାରୁ ହୋଟେଲ କର୍ମଚାରୀ ଅଧିକ ୪୦ ପଇସା ନେଇଯିବାରୁ ସେ ଖାଉଟି ଅଦାଲତର ଦ୍ୱାରସ୍ଥ ହୋଇଥିଲେ। ହେଲେ ମାତ୍ର ୪୦ ପଇସା ପାଇଁ ଅଦାଲତର ସମୟ ନଷ୍ଟ କରିଥିବାରୁ ଓଲଟା ଅଦାଲତ ତାଙ୍କୁ ୪ ହଜାର ଟଙ୍କା ଜରିମାନାରେ ଦଣ୍ଡିତ କରିଛନ୍ତି।
ଟି. ନରସିହ୍ମା ମୂର୍ତ୍ତି ନାମକ ଜଣେ ବ୍ୟକ୍ତି ବେଙ୍ଗାଲୁରୁରେ ଥିବା ଏମ୍ପାୟାର ହୋଟେଲରୁ ଖାଇବା ଅର୍ଡର କରିଥିଲେ। ଅର୍ଡର କରିଥିବା ଖାଦ୍ୟର ମୂଲ୍ୟ ୨୬୪.୬୦ ପଇସା ହୋଇଥିବାବେଳେ ହୋଟେଲ ଅଧିକାରୀ ତାଙ୍କଠାରୁ ୨୬୫ଟଙ୍କା ନେଇଥିଲେ। ହୋଟେଲ ଅଧିକାରୀ କ’ଣ ପାଇଁ ୪୦ ପଇସା ଅଧିକ ନେଲେ ବୋଲି ମୂର୍ତ୍ତି ପ୍ରଶ୍ନ କରିଥିଲେ ହେଁ ହୋଟେଲ ପକ୍ଷରୁ କୌଣସି ଜବାବ୍ ମିଳି ନ ଥିଲା; ଯାହାପରେ ମୂର୍ତ୍ତି କଞ୍ଜୁମର କୋର୍ଟରେ ଅଭିଯୋଗ କରିଥିଲେ। ହୋଟେଲ କର୍ତ୍ତୃପକ୍ଷ ଗ୍ରାହକଙ୍କୁ ଠକୁଥିବା ଅଭିଯୋଗ ପତ୍ରରେ ଉଲ୍ଲେଖ କରାଯାଇଥିଲା। ମୂର୍ତ୍ତି ପେସାରେ ଜଣେ ଓକିଲ ହୋଇଥିବାରୁ ସେ ନିଜେ କୋର୍ଟରେ ଏହି ମାମଲା ଲଢୁଥିବାବେଳେ ଅଂଶୁମାନ. ଏମ୍ ଏବଂ ଆଦିତ୍ୟ ଏମ୍ବ୍ରୋସ୍ ହୋଟେଲ ପକ୍ଷରୁ ମାମଲା ଲଢୁଥିଲେ।
ମାର୍ଚ୍ଚ ୪ ତାରିଖରେ କୋର୍ଟ ପକ୍ଷରୁ କରାଯାଇଥିବା ଶୁଣାଣିରେ ଅଭିଯୋଗକାରୀଙ୍କ ଉପରେ କୋର୍ଟ ୪୦୦୦ ଟଙ୍କା ଜରିମାନା ଲଗାଇଛନ୍ତି। ଭାରତ ସରକାରଙ୍କ ନିୟମ ଅନୁସାରେ ଯଦି କୌଣସି ଜିନିଷର ମୂଲ୍ୟ ୫୦ ପଇସାରୁ ଅଧିକ ହୁଏ ତେବେ ତାକୁ ୧ ଟଙ୍କା ବୋଲି ହିସାବ କରାଯାଏ। ସେହିପରି କୌଣସି ଜିନିଷର ମୂଲ୍ୟରେ ୫୦ ପଇସାରୁ କମ୍ ହେଲେ ତାକୁ ଅଣଦେଖା କରାଯାଇପାରିବ। ଅଭିଯୋଗ ଅନୁସାରେ ମୂର୍ତ୍ତିଙ୍କ ଅଭିଯୋଗକ୍ରମେ ୨୬୪.୬୦ ପଇସା ବିଲ୍ ହେବା ପରେ ହୋଟେଲ କର୍ତ୍ତୃପକ୍ଷ ୨୬୫ ଟଙ୍କା ନେବା କୌଣସିମତେ ଅପରାଧ ନୁହେଁ। ଅଭିଯୋଗକାରୀ ଉଭୟ ହୋଟେଲ ଏବଂ ଅଦାଲତର ସମୟର ନଷ୍ଟ କରିଥିବାରୁ ଜଜ୍ ମୂର୍ତ୍ତିଙ୍କ ଉପରେ ବର୍ଷିଥିଲେ। ଏ ନେଇ ଅଭିଯୋଗକାରୀଙ୍କୁ ହୋଟେଲ କର୍ତ୍ତୃପକ୍ଷଙ୍କୁ ୨ ହଜାର ଏବଂ କୋର୍ଟକୁ ୨ ହଜାର ଜରିମାନା ଦେବାକୁ ପଡ଼ିବ। ତେବେ ଏହି ଟଙ୍କା ମୂର୍ତ୍ତିଙ୍କୁ ୩୦ ଦିନ ଭିତରେ ଦେବା ପାଇଁ କୋର୍ଟ ପକ୍ଷରୁ ନିର୍ଦ୍ଦେଶ ଦିଆଯାଇଛି।
