ବ୍ରହ୍ମପୁର ଅଫିସ,୨୦।୧: ଦକ୍ଷିଣ ଓଡ଼ିଶାର ମୁଖ୍ୟ ବାଣିଜ୍ୟିକ ପେଣ୍ଠସ୍ଥଳ ବ୍ରହ୍ମପୁର ବଡ଼ବଜାରରେ ଖରାଦିନେ ପାନୀୟ ଜଳ ସମସ୍ୟା ଦେଖାଦେଇଥାଏ। ବ୍ୟବସାୟୀଙ୍କଠାରୁ ଆରମ୍ଭ କରି ଗ୍ରାହକ ଓ ଅନ୍ୟ ଯେ କୌଣସି କାମ ପାଇଁ ଆସୁଥିବା ଲୋକେ ପିଇବା ପାଣି ମୁନ୍ଦାଏ ପାଇଁ ବହୁ ଅସୁବିଧାର ସମ୍ମୁଖୀନ ହୋଇଥାନ୍ତି। ପ୍ରତ୍ୟେହ ଏହି ବଜାରରେ ବହୁ ଟଙ୍କାର ବ୍ୟବସାୟ ହେଉଥିଲେ ମଧ୍ୟ ସାଧାରଣ ସୁବିଧା ଯୋଗାଇ ଦିଆଯାଇପାରୁନାହିଁ।
ବଡ଼ବଜାର ଦେଶୀ ବେହେରାସାହି, ଅଶ୍ୱିନୀ କମ୍ପ୍ଲେକ୍ସ, ଜାନକୀ ସୁରୟା କମ୍ପ୍ଲେକ୍ସ, ତ୍ରିନାଥ ମାର୍କେଟ, ପରିବା ବଜାର, ମାଛବଜାର, ରାମ ମାର୍କେଟ ଆଦିରେ ପାନୀୟ ଜଳ ସମସ୍ୟା ଲାଗି ରହୁଛି। ବ୍ୟବସାୟୀମାନେ ନିୟମିତ ପାଣି ବୋତଲ କିଣି ପିଉଛନ୍ତି। ବଡ଼ବଜାରର ଶତାଧିକ ବ୍ୟବସାୟୀ, ୫୦୦ରୁ ଊର୍ଦ୍ଧ୍ୱ ପଟାରିକ୍ସା ଚାଳକ ଏବଂ କୁଲିଙ୍କ ବାଦ୍ଦେଲେ ଏଠାକୁ ଦୈନିକ ଜିଲା ତଥା ରାଜ୍ୟ ବାହାରରୁ ଲୋକେ ଆସୁଥିଲେ ବି ସେମାନଙ୍କ ପାଇଁ ପାନୀୟ ଜଳ ସୁବିଧା ନାହିଁ । ପିତାଗୁଣ୍ଡି ସାହି, ତ୍ରିନାଥ ମନ୍ଦିର ସମ୍ମୁ୍ଖ ଏବଂ ମାଛବଜାର ନିକଟ ଏପରି ୩ଟି ସ୍ଥାନରେ ୩ ନଳକୂପ ରହିଛି। ସେଥିଧ୍ୟରୁ ଦୁଇଟିରେ ପାଣି ଆସୁଛି । ମାଛ ବଜାର ନିକଟ ନଳକୂପଟି ଅସ୍ବାସ୍ଥ୍ୟକର ପରିବେଶରେ ଥିବାରୁ ତାହା ବ୍ୟବହାର ହେଉନି।
ଅନ୍ୟପକ୍ଷରେ ବଡ଼ ବଜାରର ପ୍ରତ୍ୟେକ ଘରକୁ ପାଇପ୍ ଯୋଗେ ଜଳ ଯୋଗାଣ ହେଉଛି। ଚନ୍ଦ୍ରମା ସାହି ଓ ଦେଶୀ ବେହେରା ସାହି ତ୍ରିନାଥ ମନ୍ଦିର ସମ୍ମୁଖରେ ଷ୍ଟାଣ୍ଡ ପୋଷ୍ଟ ରହିଛି। ଚନ୍ଦ୍ରମା ସାହି ଷ୍ଟାଣ୍ଡ ପୋଷ୍ଟ ବହୁ ଦିନ ହେଲା ବନ୍ଦ ରହିଛି। ତ୍ରିନାଥ ମନ୍ଦିର ନିକଟ ଷ୍ଟାଣ୍ଡ ପୋଷ୍ଟରେ ମାତ୍ର ଅଧଘଣ୍ଟା ପାଇଁ ପାଣି ଆସୁଛି। ଯାହାକି ବ୍ୟବସାୟୀ ଓ ଗ୍ରାହକଙ୍କ ନିମନ୍ତେ ପର୍ଯ୍ୟାପ୍ତ ନୁହେଁ । ବର୍ଷ ବର୍ଷ ଧରି ଏଠାର ପାନୀୟ ଜଳ ସମସ୍ୟା ସମାଧାନ ହୋଇପାରୁ ନ ଥିବା ବ୍ୟବସାୟୀ ଦିଲେଶ୍ୱର ଦଳେଇ ଅଭିଯୋଗ କରିଛନ୍ତି । ପୂର୍ବତନ କର୍ପୋରେଟର ପି. ଆଶାରାଣୀ କହିଛନ୍ତି, ବଡ଼ ବଜାରରେ ଖରାଦିନେ ଲୋକଙ୍କ ସୁବିଧା ନିମନ୍ତେ ଜଳଛତ୍ର ଖୋଲାଯାଉଛି। ବହୁବାର ମହାନଗର ନିଗମ କର୍ତ୍ତୃପକ୍ଷ ଓ ଜନସ୍ବାସ୍ଥ୍ୟ ବିଭାଗ ସହ ବଡ଼ବଜାର ଅଞ୍ଚଳରେ ଏକ ଓଭର ହେଡ୍ ଟାଙ୍କି କରି ଲୋକଙ୍କୁ ୨୪ ଘଣ୍ଟା ବିଶୁଦ୍ଧ ଜଳ ଯୋଗାଇବା ବ୍ୟବସ୍ଥା କରିବାକୁ କୁହାଯାଇଛି। ହେଲେ ସ୍ଥାନ ଅଭାବ ଯୋଗୁ ଏହା ଅଟକି ରହିଛି। ସେପଟେ ଜନସ୍ବାସ୍ଥ୍ୟ ବିଭାଗର ଅଧୀକ୍ଷଣ ଯନ୍ତ୍ରୀ ସୀତାରାମ ପଣ୍ଡା କହିଛନ୍ତି, ବଡ଼ବଜାର ଅଞ୍ଚଳର ଅଧିକାଂଶ ଘରକୁ ପାନୀୟ ଜଳ ଯୋଗାଣ ବ୍ୟବସ୍ଥା ହୋଇଛି। ତେଣୁ ବଜାରରେ ଷ୍ଟାଣ୍ଡପୋଷ୍ଟକୁ ଗୁରୁତ୍ୱ ଦିଆଯାଇନି।
