ଛତ୍ରପୁର,୧୫ା୧୦(ଡି.ଏନ୍.ଏ.): ଛତ୍ରପୁରସ୍ଥିତ ଗଞ୍ଜାମ ଜିଲାପାଳଙ୍କ ବାସଭବନ ପାର୍ଶ୍ୱରେ ଗୁରୁବାର ବର୍ଷା ପାଣି ଜମି ରହିଛି। ଫଳରେ ଯାତାୟାତରେ ଅସୁବିଧା ହୋଇଛି। ପ୍ରତି ଥର ବର୍ଷା ହେଲେ ଉକ୍ତ ସ୍ଥାନରେ ବର୍ଷା ପାଣି ନିଷ୍କାସନ ହୋଇ ନ ପାରି ଜମି ରହୁଥିବା ଦେଖିବାକୁ ମିଳୁଛି। ପରେ ମୋଟର ଲଗାଇ ଏହି ପାଣିକୁ ନିଷ୍କାସନ କରିବାକୁ ପଡୁଛି। ଆବଶ୍ୟକୀୟ ଡ୍ରେନ୍ ବ୍ୟବସ୍ଥା ନ ଥିବାରୁ ଏପରି ପରିସ୍ଥିତି ସର୍ବଦା ସୃଷ୍ଟି ହେଉଥିବା ଜଣାପଡ଼ିଛି। ପୂର୍ବରୁ ଛତ୍ରପୁର ପରିବା ମାର୍କେଟ ସମ୍ମୁଖ ରାସ୍ତା ଉପରେ ଜବରଦଖଲ କରି ପରିବା ଓ ମାଛ ବିକ୍ରି ହେଉଥିଲା। କରେନା ଗାଇଡଲାଇନ୍ ଅନୁଯାୟୀ ସାମାଜିକ ଦୂରତାକୁ ପାଳନ କରିବା ପରିପ୍ରେକ୍ଷୀରେ ଉକ୍ତ ସ୍ଥାନରୁ ପରିବା ବିକ୍ରି ଉଚ୍ଛେଦ କରି ଜିଲାପାଳଙ୍କ ବାସଭବନ ପାର୍ଶ୍ୱ ରାସ୍ତାର ଉଭୟ ପାର୍ଶ୍ୱକୁ ସ୍ଥାନାନ୍ତର କରାଯାଇଥିଲା। ଉକ୍ତ ପାଣି ଜମିବାରୁ ପରିବା ବିକାଳିମାନେ ପାଣି ଘେରରେ ରହିଥିବା ଦେଖିବାକୁ ମିଳିଥିଲା। ତୁରନ୍ତ ଏହାର ପ୍ରତିକାର ବ୍ୟବସ୍ଥା କରିବାକୁ ସାଧାରଣରେ ଦାବି ହୋଇଛି।
