ନୂଆଦିଲ୍ଲୀ,୨୨।୨: ସାମଗ୍ରୀ ଓ ସେବା ଟିକସ (ଜିଏସ୍ଟି)ରେ ରହିଥିବା ବିଭିନ୍ନ ସମସ୍ୟାକୁ ନେଇ ସର୍ବଭାରତୀୟ ବ୍ୟବସାୟୀ ମହାସଂଘ(ସିଏଆଇଟି) ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଚିଠି ଲେଖିଛି। ଫେବୃୟାରୀ ୨୬ର ଭାରତ ବନ୍ଦ କାର୍ଯ୍ୟକ୍ରମ ଅବ୍ୟବହିତ ଆଗରୁ ସଂଘ ପକ୍ଷରୁ ପ୍ରଧାନମନ୍ତ୍ରୀଙ୍କ ହସ୍ତକ୍ଷେପ ଲୋଡାଯାଇଛି। ସେହିଭଳି ଦେଶର ପ୍ରମୁଖ ଇ-କମର୍ସ କମ୍ପାନୀଗୁଡିକ ବିଭିନ୍ନ ନିୟମ ଉଲ୍ଲଂଘନ କରୁଥିବା ସଂଘ ପକ୍ଷରୁ ଅଭିଯୋଗ କରାଯାଇଛି। ସଂଘ କହିଛି ଯେ, ଜିଏସ୍ଟି ଢାଞ୍ଚାରେ ତର୍ଜମା କରିବା ଲାଗି ସରକାର ଏକ ବିଶେଷଜ୍ଞ କମିଟି ଗଠନ କରନ୍ତୁ। ଜିଲା ସ୍ତରରେ ଜିଏସ୍ଟି ଓ୍ବାର୍କିଂ ଗ୍ରୁପ ଦ୍ୱାରା ଏହି ବ୍ୟବସ୍ଥା ଠିକ୍ ଭାବେ ଚାଲୁଛି କି ନାହିଁ ତା’ର ମଧ୍ୟ ସମୀକ୍ଷା ସରକାର କରନ୍ତୁ ବୋଲି ଚିଠିରେ ନିବେଦନ କରାଯାଇଛି। ନିକଟରେ ଜିଏସ୍ଟିରେ ହୋଇଥିବା କେତେକ ସଂଶୋଧନ ଯୋଗୁ ଏହା ଏକଚ୍ଛତ୍ରବାଦୀ ହୋଇପଡିଛି। ସରକାରୀ ଅଧିକାରୀ ଏହାର ଫାଇଦା ନେଉଛନ୍ତି। ସରକାର ଗଭର୍ନାନ୍ସକୁ ଗୁରୁତ୍ୱ ଦେଉଥିବାରୁ ଏଭଳି ପ୍ରସଙ୍ଗକୁ ନଜରରେ ରଖନ୍ତୁ ବୋଲି ଚିଠିରେ ନିବେଦନ କରାଯାଇଛି।
