ଅତ୍ୟାଧୁନିକ ପ୍ରଣାଳୀରେ କାଜୁ ପ୍ରକ୍ରିୟାକରଣ କରି ବଜାରରେ ଉପଲବ୍ଧ କରାଇବାରେ ବିନାୟକ କ୍ୟାସ୍ୟୁଜ୍ ବେଶ୍ ପରିଚିତ। ଓଡ଼ିଶା କାଜୁକୁ ସାରା ଭାରତରେ ପହଞ୍ଚାଇବା ଉଦ୍ଦେଶ୍ୟରେ ଢେଙ୍କାନାଳସ୍ଥିତ ଏହି କମ୍ପାନୀ ୨୦୨୨ରେ ପ୍ରତିଷ୍ଠିତ ହୋଇଥିଲା। ବହୁତ କମ୍ ସମୟ ମଧ୍ୟରେ ସବୁଠାରୁ ବିଶ୍ୱସ୍ତ ବ୍ରାଣ୍ଡ୍ ମଧ୍ୟରୁ ଗୋଟିଏ ହୋଇସାରିଛି। ଉଦ୍ୟୋଗୀ ନେହା ଅଗ୍ରୱାଲାଙ୍କ ସୁଦକ୍ଷ ପରିଚାଳନାରେ ଏହି କମ୍ପାନୀ ସଫଳତାର ପାହାଚ ଚଢ଼ିବାରେ ଲାଗିଛି। ନେହାଙ୍କ ଔଦ୍ୟୋଗିକ ଯାତ୍ରା ସମ୍ପର୍କରେ ଧରିତ୍ରୀ ପକ୍ଷରୁ ସ୍ବତନ୍ତ୍ର ସାକ୍ଷାତ୍କାର…
ପ୍ର- କାଜୁ ବ୍ୟବସାୟ କିପରି ଆରମ୍ଭ କଲେ?
ଉ- ବ୍ୟବସାୟଭିତ୍ତିକ ପରିବାରରେ ମୋର ଜନ୍ମ। ତେଣୁ ବ୍ୟବସାୟ କରିବା ସହ ସ୍ଥାନୀୟ ଯୁବପିଢ଼ିଙ୍କ ପାଇଁ ନିଯୁକ୍ତି ସୁଯୋଗ ସୃଷ୍ଟି କରିବା ମୋର ସବୁବେଳେ ଉଦ୍ଦେଶ୍ୟ ଥିଲା। ଗବେଷଣା କରି ଜାଣିଲି କାଜୁ ଶିଳ୍ପ ସ୍ଥାନୀୟ ଉତ୍ପାଦକୁ ବ୍ୟବହାର କରି ସମଗ୍ର ଭାରତରେ ନିଜର ଉପସ୍ଥିତି ସ୍ଥାପନ କରିବା ପାଇଁ ସୁଯୋଗ ପ୍ରଦାନ କରିଥାଏ। ଏହା ସ୍ଥାନୀୟ ଯୁବପିଢ଼ିଙ୍କୁ ବିଶେଷକରି ଗ୍ରାମୀଣ ମହିଳାମାନଙ୍କୁ ସାମିଲ କରିପାରିବ। ତେଣୁ ଏହି କ୍ଷେତ୍ରରେ ଆଗକୁ ବଢ଼ିଥିଲି।
ପ୍ର- ପ୍ରତିଯୋଗିତାମୂଳକ ବଜାରରେ ଆପଣଙ୍କ ଉତ୍ପାଦର କ’ଣ ସ୍ବତନ୍ତ୍ରତା ରହିଛି?
ଉ- ସମଗ୍ର ଭାରତରେ କାଜୁର ଏକ ବଜାର ଅଛି ଏବଂ ଏହାର ରପ୍ତାନି ସୁଯୋଗ ମଧ୍ୟ ଅଛି। ଭାରତରେ ଖାଦ୍ୟସାମଗ୍ରୀର ଚାହିଦା ସର୍ବଦା ରହିଥାଏ। ଲୋକଙ୍କ ଆୟର ବୃଦ୍ଧି ସହିତ କାଜୁର ଚାହିଦା କ୍ରମାଗତ ଭାବରେ ବୃଦ୍ଧି ପାଉଛି। ଆମେ ବିଶ୍ୱର ବିଭିନ୍ନ ସ୍ଥାନରୁ ସର୍ବୋତ୍ତମ ଯନ୍ତ୍ର ସହିତ ଏକ ଆଧୁନିକ ସ୍ବୟଂଚାଳିତ ଉତ୍ପାଦନ କେନ୍ଦ୍ର ପ୍ରସ୍ତୁତ କରିଛୁ। ଏହା ଆମକୁ ସ୍ବଳ୍ପ ପ୍ରକ୍ରିୟାକରଣ ଖର୍ଚ୍ଚରେ କ୍ରମାଗତ ଭାବରେ ଅଧିକ ଉତ୍ପାଦନର ସୁବିଧା ଦେଇଥାଏ । ଗ୍ରାହକଙ୍କ ଚାହିଦା ପୂରଣ କରିବା ପାଇଁ ଗ୍ରାହକଙ୍କ ଆବଶ୍ୟକତା ଅନୁଯାୟୀ ପ୍ରିମିୟମ୍ ଉତ୍ପାଦ ପ୍ରସ୍ତୁତ କରାଯାଉଛି।
ପ୍ର-ବଜାରରେ ମିଳୁଥିବା ପ୍ରକ୍ରିୟାକୃତ କାଜୁରେ ଅନେକ ଅପମିଶ୍ରଣ ଭଳି ଅଭିଯୋଗ ଆସିଥାଏ। ଆପଣ ଆପଣଙ୍କ ଉତ୍ପାଦର ଗୁଣବତ୍ତା ବଜାୟ ରଖିବା ପାଇଁ କି ପଦକ୍ଷେପ ନେଇଥା’ନ୍ତି?
ଉ- କେତେକ ଅସାଧୁ ବ୍ୟବସାୟୀ ପ୍ରକ୍ରିୟାକୃତ କାଜୁରେ ଅପମିଶ୍ରଣ କରିଥା’ନ୍ତି। ସେମାନଙ୍କର ଏପରି କାର୍ଯ୍ୟକଳାପ ସମଗ୍ର ଇଣ୍ଡଷ୍ଟ୍ରୀକୁ ବଦନାମ କରିଥାଏ। ମାତ୍ର ଆମ ଉତ୍ପାଦର ମାନ ପରୀକ୍ଷଣ ଆମ ପାଇଁ ଆମର ଇନ୍ସପେକ୍ସନ୍ ସେକ୍ସନ ରହିଛି। ଚ୍ୟାନେଲ ପାର୍ଟନରଙ୍କୁ କାଜୁ ହସ୍ତାନ୍ତର ପୂର୍ବରୁ ଏସବୁର ଭଲଭାବେ ଯାଞ୍ଚ କରାଯାଇଥାଏ। ଆମେ ସିଲ୍ ହୋଇଥିବା କଣ୍ଟେନର ଏବଂ ପ୍ରିପ୍ରିଣ୍ଟେଡ୍ ରିଟେଲ ପ୍ୟାକ୍ରେ ଆମ ଉତ୍ପାଦ ବିକିଥାଉ।
ପ୍ର- ବ୍ୟବସାୟ ସମ୍ପ୍ରସାରଣ ଦିଗରେ ଆଗକୁ କ’ଣ ଯୋଜନା ରହିଛି?
ଉ- ମାତ୍ର ୨ବର୍ଷର ବ୍ୟବସାୟିକ ଯାତ୍ରାରେ ଆମେ ଉଲ୍ଲେଖନୀୟ ସଫଳତା ହାସଲ କରିଛୁ। ଉତ୍ତମମାନର କାଜୁ ଯୋଗାଣ କ୍ଷେତ୍ରରେ ଆମେ ନିଜର ସ୍ଥିତି ସୁଦୃଢ଼ କରିପାରିଛୁ। ବର୍ତ୍ତମାନ ଆମେ ଦୈନିକ ୧୦ ଏମ୍ଟି କାଜୁର ପ୍ରକ୍ରିୟାକରଣ କରିପାରୁଥିବାବେଳେ ଆଗକୁ ଏହି କ୍ଷମତା ୩୦ ଏମ୍ଟିକୁ ବୃଦ୍ଧି କରିବାକୁ ଯୋଜନା ରଖିଛୁ।
ପ୍ର- ନବାଗତଙ୍କ ପାଇଁ ସଫଳତାର କିଛି ମନ୍ତ୍ର?
ଉ- ଯେକୌଣି କ୍ଷେତ୍ର ହେଉନା କାହିଁକି, ଉଦ୍ୟୋଗୀମାନେ ନୈତିକତା ବଜାୟ ରଖିବା ଜରୁରୀ। ଉପତ୍ାଦର ମାନ ସର୍ବୋତ୍କୃଷ୍ଟ ରଖି ଗ୍ରାହକଙ୍କୁ ସନ୍ତୋଷଜନ ସେବା ପ୍ରଦାନ କଲେ ସଫଳତା ନିଶ୍ଚୟ ମିଳିଥାଏ। ଆରମ୍ଭରେ ହୁଏତ କିଛି ସମସ୍ୟା ହୋଇପାରେ ମାତ୍ର ଏହି ଅଭ୍ୟାସ ଜାରି ରଖିଲେ ଦୀର୍ଘକାଳୀନ ସଫଳତା ପାଇଁ ପଥ ପରିଷ୍କାର କରିଥାଏ।
-ସାକ୍ଷାତ୍କାର: ଅନୁରାଧା ମହାରଣା, ଭୁବନେଶ୍ୱର
