ବରଗଡ଼ ଅଫିସ୍,୧୬।୪: ହନୁମାନ ଜୟନ୍ତୀ ଶୋଭାଯାତ୍ରାବେଳେ ହୋଇଥିବା ହିଂସାକୁ ନେଇ ସମ୍ବଲପୁରରେ ଅନିର୍ଦ୍ଦିଷ୍ଟ କାଳ ପର୍ଯ୍ୟନ୍ତ କର୍ଫ୍ୟୁ ଘୋଷଣା କରାଯାଇଛି। ଏହାର ପ୍ରଭାବ ବରଗଡ଼ ଜିଲାରେ ମଧ୍ୟ ଅନୁଭୂତ ହୋଇଛି। ସମ୍ବଲପୁରରେ କର୍ଫ୍ୟୁ ଜାରି କରାଯାଇଥିବା ଯୋଗୁ ଶନିବାର ବସ୍ ଚଳାଚଳ ବ୍ୟାହତ ହୋଇପଡିଥିଲା। ହାତ ଗଣତି ଅଳ୍ପ ସଂଖ୍ୟକ ଯାତ୍ରୀବାହୀ ବସ୍କୁ ଛାଡ଼ିଦେଲେ ଅଧିକାଂଶ ବସ୍ ଉଭୟ ସରକାରୀ ଏବଂ ଘରୋଇ ବସଷ୍ଟାଣ୍ଡରେ ଅଟକି ରହିଥିଲା। ଫଳରେ ଯାତ୍ରୀମାନଙ୍କୁ ହଟହଟା ହେବାକୁ ପଡ଼ିଥିଲା।
ବରଗଡ଼ରୁ ସମ୍ବଲପୁରକୁ ସରକାରୀ ବସ୍, ସିଟି ବସ୍ ସମେତ ଘରୋଇ ଯାତ୍ରୀବାହୀ ନିୟମିତ ଯାତାୟାତ କରେ। ଛାତ୍ରୀଛାତ୍ରଙ୍କଠାରୁ ଅନେକ ସରକାରୀ, ଘରୋଇ କର୍ମଚାରୀ ସବୁଦିନ ସେହି ବସ୍ ଉପରେ ନିର୍ଭର କରିଥାନ୍ତି। ହେଲେ ସମ୍ବଲପୁରରେ କର୍ଫ୍ୟୁ ଜାରି ହେବା ପରେ ଶନିବାର ସେଠାକୁ ବସ୍ ଚଳାଚଳ ବନ୍ଦ ରହିଥିଲା। ଯାତ୍ରୀମାନେ ସରକାରୀ, ଘରୋଇ ବସ୍ଷ୍ଟାଣ୍ଡକୁ ଆସିଥିଲେ, ମାତ୍ର ବସ୍ ସମ୍ବଲପୁର ଅଭିମୁଖେ ନ ବାହାରିବାରୁ ନିରାଶରେ ଘରକୁ ଫେରିବାକୁ ପଡ଼ିଥିଲା। ତେବେ ପରେ ଅଳ୍ପ କେତୋଟି ବସ୍ ସମ୍ବଲପୁର ଅଭିମୁଖେ ଯାଇଥିଲେ ସୁଦ୍ଧା କିଛି ଅଧାବାଟରୁ ଫେରି ଆସୁଥିଲା ଏବଂ ଆଉ କିଛି ସମ୍ବଲପୁର ଘରୋଇ ବସଷ୍ଟାଣ୍ଡ ପର୍ଯ୍ୟନ୍ତ ଯାଇଥିଲେ ମଧ୍ୟ ତୁରନ୍ତ ବସଷ୍ଟାଣ୍ଡ ଛାଡ଼ି ବରଗଡ଼ ଅଭିମୁଖେ ଫେରି ଆସୁଥିଲା। ଏ ସମ୍ପର୍କରେ ବରଗଡ଼ ଘରୋଇ ବସ୍ ମାଲିକ ସଂଘର ସମ୍ପାଦକ ଶେଖ୍ ନଜିମୁଦ୍ଦିନଙ୍କୁ ପଚାରିବାରୁ ସେ କହିଥିଲେ, ବରଗଡ଼ରୁ ସମ୍ବଲପୁରକୁ ପ୍ରାୟ ୪୦ ଯାତ୍ରୀବାହୀ ବସ୍ ସବୁଦିନ ମୋଟ୍ ପ୍ରାୟ ୧୧୦ଥର ଯିବା ଆସିବା କରିଥାନ୍ତି। ତେବେ ସମ୍ବଲପୁରରେ କର୍ଫ୍ୟୁ ଜାରି କରାଯାଇଥିବା ଯୋଗୁ ତାକୁ ଦୃଷ୍ଟିରେ ରଖି ସେଠାକୁ ବସ ଚଳାଚଳ ବନ୍ଦ ରହିଥିଲା। ରବିବାରଠାରୁ ସମ୍ବଲପୁରକୁ ବସ୍ ଚଳାଚଳ ସ୍ବାଭାବିକ ହେବ ବୋଲି ନିଷ୍ପତ୍ତି ନିଆଯାଇଛି ବୋଲି ସେ କହିଥିଲେ।
