ଦାରିଙ୍ଗବାଡି,୧।୯(ଅରୁଣ ସାହୁ):କନ୍ଧମାଳ ଜିଲାର ବୃହତ ବ୍ଲକ ଭାବେ ଜଣାଶୁଣା ଦାରିଙ୍ଗବାଡିରେ ଏବେ ଜନସଂଖ୍ୟା ବୃଦ୍ଧିକୁ ଦୃଷ୍ଟିରେ ରଖି ଯାତ୍ରୀବାହୀ ବସର ସଂଖ୍ୟା ମଧ୍ୟ ବୃଦ୍ଧି ପାଇଛି। ତେବେ ଏବେ ବଡ଼ ସମସ୍ୟା ମୁଣ୍ଡ ଟେକିଛି। ସମସ୍ତ ପ୍ରକାର ଯାତ୍ରୀବାହୀ ବସଗୁଡିକ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରର ମୁଖ୍ୟ ଫାଟକ ସମ୍ମୁଖରେ ଘଣ୍ଟା ଘଣ୍ଟା ଧରି ପାର୍କିଂ କରୁଥିବାବେଳେ ଯାତ୍ରୀଙ୍କୁ ଡାକିବା ପାଇଁ ପ୍ରଚଣ୍ଡ ଶବ୍ଦର ହର୍ନ ବଜାଉଥିବାରୁ ସ୍ବାସ୍ଥ୍ୟକେନ୍ଦ୍ରର ଅନ୍ତଃବିଭାଗରେ ଶଯ୍ୟାରେ ଚିକିତ୍ସା ହେଉଥିବା ରୋଗୀମାନେ ଶବ୍ଦରେ ଅସ୍ତବ୍ୟସ୍ତ ହୋଇପଡୁଛନ୍ତି।
ଏନେଇ ସ୍ଥାନୀୟ ପ୍ରଶାସନ ନୀରବ ରହୁଛି। ବିଶେଷକରି ଚାରି ଛକରେ ଟ୍ରାଫିକ ପୋଷ୍ଟରେ ନିୟୋଜିତ ପୋଲିସ ମଧ୍ୟ ନୀରବ ରହୁଥିବା ନେଇ ଜନଅସନ୍ତୋଷ ବୃଦ୍ଧି ପାଉଛି। ଦାରିଙ୍ଗବାଡିକୁ ନିୟମିତ ପର୍ଯ୍ୟଟକ ଆସୁଥିବାବେଳେ ୨୫ ପଞ୍ଚାୟତରୁ ଦୈନିକ ଜନସାଧାରଣ ବଜାର ଓ ସରକାରୀ ଏବଂ ବେସରକାରୀ ଅନୁଷ୍ଠାନରେ କାର୍ଯ୍ୟ ନେଇ ଆସୁଛନ୍ତି। ସେମାନେ ଏହି ସ୍ବାସ୍ଥ୍ୟକେନ୍ଦ୍ର ସମ୍ମୁଖରେ ବସ୍ ଷ୍ଟପେଜ ରହିଥିବାରୁ ଯାତ୍ରୀମାନେ ମଧ୍ୟ ବସ ଷ୍ଟାଣ୍ଡ ନ ଯାଇ ଏଠାରେ ବସକୁ ଅପେକ୍ଷା କରିବାକୁ ବାଧ୍ୟ ହେଉଛନ୍ତି। ଗୋଟିଏ ବସ ଅଟକିଲେ ତାକୁ ଦେଖି ଅନ୍ୟ ବସ ଗୁଡିକ ଓ ପର୍ଯ୍ୟଟକଙ୍କ ଟ୍ୟାକ୍ସି, ଟ୍ରଭେଲର ଆଦି ଏହି ସ୍ବାସ୍ଥ୍ୟକେନ୍ଦ୍ର ସମ୍ମୁଖରେ ଅଟକି ରହୁଥିବା ଦେଖିବାକୁ ମିଳୁଛି। ଶୀଘ୍ର ଏହାର ସମାଧାନ କରି ବସଗୁଡିକ ସ୍ବାସ୍ଥ୍ୟକେନ୍ଦ୍ର ସମ୍ମୁଖରେ ପାର୍କିଂ ପାଇଁ ବନ୍ଦ କରାଯିବାକୁ ସାଧାରଣରେ ଦାବି ହେଉଛି।
Dharitri – Odisha’s No.1 Odia Daily
