ଦାରିଙ୍ଗବାଡି,୩୦।୯ (ଅରୁଣ ସାହୁ): କନ୍ଧମାଳ ଜିଲା ଦାରିଙ୍ଗବାଡି ବ୍ଲକର ଦୁର୍ଗମ ଅଞ୍ଚକଭାବେ ଜଣାଶୁଣା କିରିକୁଟି ପଞ୍ଚାୟତର ବୁରାଙ୍ଗିଆ-ବୁଡ଼ାଗୁଡା ରାସ୍ତା କର୍ଦ୍ଧମାକ୍ତ ଯୋଗୁ ଯାତାୟତରେ ବାଧାପ୍ରାପ୍ତ ଦେଖାଯାଇଛି। ପ୍ରକାଶ ଯେ, ଅଞ୍ଚଳରେ ଦୈନିକ ବର୍ଷା ଲାଗିରହିଥିବା ବେଳେ ଗତ କିଛି ଦିନ ହେଲା ଲଘୁଚାପଜନିତ ବର୍ଷା ଲାଗି ରହିଛି ଫଳରେ ଅର୍ଦ୍ଧନିର୍ମିତ ରାସ୍ତା ଏବେ କାଦୁଅ ପଚପଚ ହୋଇ ରହିଛି। ବାଇକ, ଅଟୋ ଓ ଚାରିଚକିଆ ଯାନ ଯାତାୟାତରେ ସମସ୍ୟା ଦେଖାଯାଇଛି। ବୁରାଙ୍ଗିଆବାସୀଙ୍କ ସମେତ ଏକାଧିକ ଲୋକ ସାଧାରଣ ବଣ୍ଟନ ସାମଗ୍ରୀ ପାଇଁ ଯିବା ସମ୍ଭବ ହେଉ ନ ଥିବା ବେଳେ ସେଥିପାଇଁ ସଂଘର୍ଷ କରିବାକୁ ପଡୁଛି। ରାସ୍ତାରେ ପାଦରେ ଚାଲିକି ଯାତାୟାତ ମଧ୍ୟ ସମ୍ଭବ ହେଉନାହିଁ। ସେହିପରି ଜରୁରୀକାଳୀନ ପରିସ୍ଥିତିରେ ଆମ୍ବୁଲାନ୍ସ ମଧ୍ୟ ଗାଁକୁ ପହଞ୍ଚିବା କଷ୍ଟ ହୋଇପଡିଛି। ବୁଡ଼ାଗୁଡାଠାରୁ ବୁରାଙ୍ଗିଆ ଦେଇ ୫୯ ନଂ ଜାତୀୟ ରାଜପଥକୁ ସଂଯୋଗ କରୁଥିବା ରାସ୍ତା ସମ୍ପ୍ରସାରଣ କାର୍ଯ୍ୟ ଚାଲିଥିବାବେଳେ ତାହା ଅସମ୍ପୂର୍ଣ୍ଣ ରହିଛି। ଫଳରେ ଦୀର୍ଘ ଦିନ ହେଲା ଅଞ୍ଚଳବାସୀ ବହୁ ହଇରାଣ ଭୋଗୁଥିବା ବୁରାଙ୍ଗିଆ ଗ୍ରାମବାସୀ ଅଭିଯୋଗ କରିଛନ୍ତି। ରାସ୍ତା ପାଇଁ ରାଜରାସ୍ତାକୁ ଓହ୍ଲାଇବାକୁ ବାଧ୍ୟ ହେବୁ ବୋଲି ଗ୍ରାମବାସୀ କହିଛନ୍ତି।
