ରାଉରକେଲା ଅଫିସ,୧୯।୧୨: ଅଶାନ୍ତ ହୋଇ ପଡିଛି ରାଉରକେଲା ସହର। ଲୁଟେରାମାନେ ରାସ୍ତାଘାଟରେ ନିର୍ଭୟରେ ଓ ଅବାଧରେ ବୁଲିବା ସହ ଲୋକମାନଙ୍କୁ ଲୁଟୁଛନ୍ତି ଓ ଗୁଳି ଫୁଟାଇ ହତ୍ୟା କରୁଛନ୍ତି। ପୁଲିସ ମଧ୍ୟ ସେମାନଙ୍କର ଟେର୍ ବି ପାଉନାହିଁ। ଏଭଳି ଏକ ଘଟଣାକ୍ରମରେ ଗୁରୁବାର ରାତିରେ ଜନଗହଳିପୂର୍ଣ୍ଣ ଅଞ୍ଚଳ ରାଉରକେଲା ସରକାରୀ ଡାକ୍ତରଖାନା (ଆରଜିଏଚ୍) ଓଭରବ୍ରିଜ ଉପରେ ସୁନା ଦୋକାନୀ ସରୋଜ କୁମାର ସାହୁଙ୍କୁ ଗୁଳି କରି ଲୁଟେରାମାନେ ଟଙ୍କା ଲୁଟି ନେଇଛନ୍ତି। ଡାକ୍ତରଖାନାରେ ସରୋଜଙ୍କୁ ମୃତ ଘୋଷଣା କରା ଯାଇଛି। ଦୁର୍ବୃତ୍ତମାନେ କେତେ ଟଙ୍କା ଲୁଟ କରିଛନ୍ତି ତାହା ରିପୋର୍ଟ ଲେଖାଯିବା ପର୍ଯ୍ୟନ୍ତ ଜଣାପଡିନାହିଁ।
ସରୋଜଙ୍କର ଏସ୍ଟିଆଇ ଛକ ଗଣେଶ ମାର୍କେଟରେ ‘ବନଦୁର୍ଗା’ ନାମରେ ସୁନା ଦୋକାନ ରହିଛି। ପ୍ରତିଦିନ ପରି ରାତି ପ୍ରାୟ ୧୦ଟାରେ ସରୋଜ ଦୋକାନ ବନ୍ଦ କରି ମୋଟରବାଇକରେ ଘରକୁ ଫେରୁଥିଲେ। ଆରଜିଏଚ ନିକଟ ଓଭରବ୍ରିଜ ଯିବା ମାତ୍ରେ ତାଙ୍କୁ ପିଛା କରୁଥିବା ଦୁଇ ଦୁର୍ବୃତ୍ତ ବାଇକରେ ଥାଇ ତିନିରୁ ଅଧିକ ରାଉଣ୍ଡ ଗୁଳି ଚଳାଇଥିଲେ। ଦୁଇଟି ଗୁଳି ତାଙ୍କ ମୁଣ୍ଡ ଓ ପେଟରେ ବାଜିବାରୁ ସରୋଜ ବାଇକ ସହ ରକ୍ତ ଜୁଡୁବୁଡୁ ଅବସ୍ଥାରେ ତଳେ ପଡିଯାଇଥିଲେ। ସରୋଜ ଚେତାଶୂନ୍ୟ ହୋଇଯିବା ପରେ ଦୁଇ ଦୁର୍ବୃତ୍ତ ଟଙ୍କା ବ୍ୟାଗ ଲୁଟ୍ କରି ଘଟଣାସ୍ଥଳରୁ ଫେରାର ହୋଇଯାଇଥିଲେ। ତାଙ୍କୁ ଗୁରୁତର ଅବସ୍ଥାରେ ପ୍ରଥମେ ଆରଜିଏଚ୍ ଓ ପରେ ଇସ୍ପାତ ଜେନେରାଲ ହସ୍ପିଟାଲ (ଆଇଜିଏଚ୍) ଆଇସିୟୁରେ ଭର୍ତ୍ତି କରାଯାଇଥିଲା। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ରଘୁନାଥପାଲୀ ଓ ଉଦିତନଗର ପୁଲିସ ଏବଂ ପରେ ରାଉରକେଲା ଏସ୍ପି କେ. ଶିବା ସୁବ୍ରମଣୀ ଘଟଣାସ୍ଥଳରେ ପହଞ୍ଚି ଛାନଭିନ ଚଳାଇଛନ୍ତି।
ସୂଚନାଯୋଗ୍ୟ, ଗତ ୪ ଦିନ ତଳେ ବେଦବ୍ୟାସ ସିଂହଟୋଲା ନିକଟରେ ସମାନଧରଣର ଗୁଳିକାଣ୍ଡ ଘଟିଥିଲା। ଲୁଟେରାମାନେ ସୁନା ଦୋକାନୀଙ୍କୁ ଗୁଳି ମାଡ କରିଥିଲେ। ତେବେ ଗୁଳି ତାଙ୍କ ଦେହରେ ନ ବାଜି ମୋଟରବାଇକ ପଛରେ ବସିଥିବା ତାଙ୍କ ମା’ଙ୍କ ଦେହରେ ବାଜିଥିଲା। ତାଙ୍କୁ ଗୁରୁତର ଅବସ୍ଥାରେ ପ୍ରଥମେ ଆଇଜିଏଚ୍ ପରେ ସମ୍ବଲପୁର ବୁର୍ଲାକୁ ପଠାଯାଇଥିଲା। ଏବେ ସହରରେ ପୁଣି ଗୁଳିକାଣ୍ଡ ପୁଲିସର ସୁରକ୍ଷା ବ୍ୟବସ୍ଥା ଉପରେ ପ୍ରଶ୍ନବାଚୀ ସୃଷ୍ଟି କରିଛି।
