ଯୋଡ଼ା,୧୭ା୩(ଡି.ଏନ.ଏ): ରାଜ୍ୟ ସରକାର କେନ୍ଦୁଝର ଜିଲା ଖଣିଜ ପାଣ୍ଠି ଅନୁଦାନରେ ଯୋଡ଼ା ଖଣି ଅଞ୍ଚଳରେ ଟ୍ରାଫିକ ଓ ପ୍ରଦୂଷଣ ଜନିତ ସମସ୍ୟାରୁ ମୁକ୍ତି ପାଇଁ ସର୍ବ ବୃହତ ଓଭର ବ୍ରିଜ୍ ନିର୍ମାଣ କରୁଛନ୍ତି। ୨୦୨୦ରୁ ଯୋଡ଼ା ସହରରେ ଏହାର ନିର୍ମାଣ ଆରମ୍ଭ ହୋଇଥିବା ବେଳେ କାର୍ଯ୍ୟ ଶେଷ ପର୍ଯ୍ୟାୟରେ ପହଞ୍ଚତ୍ଛି। ଆଉ ୬ ମାସ ପରେ ଯୋଡ଼ା ସହର ଓ ଖଣି ଅଞ୍ଚଳବାସୀ ନୂତନ ଫ୍ଲାଏ ଓଭରରେ ଗମନାଗମନ ସୁବିଧା ପାଇ ପାରିବେ। ଅଞ୍ଚଳର ବିକାଶରେ ଏହା ପ୍ରମୁଖ ଭୂମିକା ଗ୍ରହଣ କରିବା ସହ ଫ୍ଲାଏ ଓଭର ରାଜ୍ୟର ଊଦ୍ଧର୍ବ ଗାମୀ ପୋଲ ଭାବେ ପରିଗଣିତ ହେବ ବୋଲି ସେତୁ ନିର୍ମାଣ ନିଗମ (ଓବିସିସି) ପ୍ରକାଶ କରିଛି।
ସୂଚନା ଅନୁଯାୟୀ, ଡିଏମ୍ଏଫ ଫଣ୍ଡରୁ ନିର୍ମିତ ବ୍ରିଜ୍ ଅଟକଳ ପ୍ରାୟ ୨୦୬ କୋଟି ଟଙ୍କା ରହିଛି। ଏହା ୫୨୦ ନଂ. ଜାତୀୟ ରାଜପଥର ରଣାସାଳଠାରୁ କମାର ଯୋଡ଼ା ପର୍ଯ୍ୟନ୍ତ ପ୍ରାୟ ୪.୪୮୭ କି.ମି. ନିର୍ମାଣ ହେଉଛି। ଏଥିରେ ୨.୯୮୦ କି.ମି ପ୍ଲାଏ ଓଭର ରହିଥିବା ବେଳେ ଏହା ରାଜ୍ୟର ସର୍ବ ବୃହତ ଫ୍ଲାଏ ଓଭର ବୋଲି ଜଣାପଡ଼ିଛି। ରାଜ୍ୟର କୌଣସି ଫ୍ଲାଏ ଓଭର ଏତେ ଦୂର ପର୍ଯ୍ୟନ୍ତ କ୍ରମାଗତ ଭାବେ ନିର୍ମିତ ହୋଇନାହିଁ। ଫ୍ଲାଏ ଓଭରର ନିର୍ମାଣ କାର୍ଯ୍ୟ ଚଳିତ ଡିସେମ୍ବର ୩୧ ସୁଦ୍ଧା ଶେଷ କରିବା ପାଇଁ ତାରିଖ ଧାର୍ଯ୍ୟ ହୋଇଛି। ମାତ୍ର କେତେକ ସ୍ଥାନରେ ସମସ୍ୟା ରହିଥିବାରୁ ବିଳମ୍ବ ହୋଇ ପାରେ ବୋଲି ଫ୍ଲାଏ ଓଭର ନିର୍ମାଣ ଦାୟିତ୍ୱରେ ଥିବା ସଂସ୍ଥାର ମାନବ ସମ୍ବଳ ଅଧିକାରୀ ଭାଗିରଥି ପଣ୍ଡା ସୂଚନା ଦେଇଛନ୍ତି। ଫ୍ଲାଏ ଓଭରର ୪୦୦ ମେଟ୍ରିକ ଟନ କ୍ଷମତା ରହିଛି। ସହର ମଧ୍ୟରେ ନିର୍ମାଣ କରାଯାଉଥିବା ସର୍ଭିସ ରୋଡ ପେଭମେଣ୍ଟ କ୍ୱାଲିଟୀ କଂକ୍ରିଟ (ପିକ୍ୟୁସି) ମାଧ୍ୟମରେ କରାଯାଉଛି। ଏହା ପ୍ରାୟ ୨୦ବର୍ଷରୁ ଅଧିକ ପର୍ଯ୍ୟନ୍ତ ସ୍ଥାୟୀ ହୋଇ ରହିବ। ଏହାର ସୌନ୍ଦର୍ଯ୍ୟ କରଣ ପାଇଁ ରାସ୍ତା କଡ଼ରେ ସୁନ୍ଦର ଫୁଲ ଗଛ ରୋପଣ କରାଯିବ। ଆଲୋକୀକରଣ ପାଇଁ ଉନ୍ନତମାନର ବିଦ୍ୟୁତ୍ ଲାଇଟ ଲଗାଯିବ। ଫ୍ଲାଏ ଓଭର ସମ୍ପୂର୍ଣ ହେବା ପରେ ଯୋଡ଼ା ସହରବାସୀ ଟ୍ରାଫିକ ସମସ୍ୟା ଓ ଧୂଳିଧୂଆଁରୁ ମୁକ୍ତି ପାଇବେ ବୋଲି କହିଛନ୍ତି। ଏ ସମ୍ପର୍କରେ ଯୋଡ଼ା ଟ୍ରକ ମାଲିକ ସଂଘର ସମ୍ପାଦକ ସୁଶାନ୍ତ ବାରିକ କହିଛନ୍ତି, ଦୀର୍ଘ ଦିନରୁ ଟ୍ରାଫିକ ସମସ୍ୟା ପାଇଁ ଛାତ୍ରୀଛାତ୍ର, ଅବିଭାବକ ଦାବି କରି ଆସୁଥିଲେ। ବ୍ୟବସାୟୀକ ଦୃଷ୍ଟି କୋଣରୁ ଫ୍ଲାଏ ଓଭର ନ ଥିବାରୁ ରାଜ୍ୟ ସରକାରଙ୍କ ଅନୁମୋଦିତ ଖଣିଜ ପରିବହନ ହୋଇ ପାରୁ ନ ଥିଲା। ଏହା ଦ୍ୱାରା ଟ୍ରକ୍ ମାଲିକମାନେ ଆଶ୍ବସ୍ତ ହେବେ। ଭିତ୍ତିଭୂମିର ଅଭାବ ହେତୁ ଦିନରେ ଖଣିଜ ପରିବହନ ହୋଇ ପାରୁ ନ ଥିଲା। ଏଣିକି ଅନବରତ ଟ୍ରକ ଚଳାଚଳ କରି ପାରିବ। ଏଥିରେ ଆର୍ଥିକ ଅଭିବୃଦ୍ଧିର ବିକାଶ ଘଟିବ। ଯୋଡ଼ା ବିକାଶ ପରିଷଦ ସଭାପତି ନିରଞ୍ଜନ ବହିଦାର କହିଛନ୍ତି, ଯୋଡ଼ାବାସୀଙ୍କ ଦୁର୍ଦ୍ଦଶା, ଛାତ୍ରୀଛାତ୍ରଙ୍କ ଅସୁବିଧା ଦୂର ହେବ, ଜନସାଧାରଣ ପ୍ରଦୂଷଣରୁ ରକ୍ଷା ପାଇପାରିବେ।
