ନୂଆଦିଲ୍ଲୀ, ୭ା୪: କେନ୍ଦ୍ରର ନରେନ୍ଦ୍ର ମୋଦି ସରକାର ଗଣତାନ୍ତ୍ରିକ ନିୟମାନୁଯାୟୀ ପାର୍ଲାମେଣ୍ଟରେ ଆଲୋଚନା କରିବାକୁ ସୁଯୋଗ ଦେଉ ନ ଥିବା କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖାର୍ଗେ ଅଭିଯୋଗ କରିଛନ୍ତି। ଅନ୍ୟ ପକ୍ଷରେ ବିରୋଧୀ ଗୃହକୁ ଅଚଳ କରି ରଖିଥିବା ଭାଜପା ଅଭିଯୋଗ କରିଆସୁଛି। ଆଲୋଚନା ପାଇଁ ସୁଯୋଗ ନ ଦେଇ ସରକାର ମାତ୍ର ୧୨ ମିନିଟରେ ୫୦ ଲକ୍ଷ କୋଟି ଟଙ୍କାର ବଜେଟ ଗୃହୀତ କରାଇନେଲେ। ଆଦାନୀ ପ୍ରସଙ୍ଗରେ ଯୁଗ୍ମ ସଂସଦୀୟ କମିଟି (ଜେପିସି) ତଦନ୍ତ ଦାବିରେ ବିରୋଧୀ ଅଡ଼ିବସିଥିବାବେଳେ ଏଥିରୁ ଲୋକଙ୍କ ଦୃଷ୍ଟି ହଟାଇବା ଲାଗି ସରକାରୀ ଦଳ ପାର୍ଲାମେଣ୍ଟକୁ ଅଚଳ କରି ରଖିଥିଲେ ବୋଲି ଖାର୍ଗେ କହିଛନ୍ତି। ବଜେଟ ଅଧିବେଶନକୁ ସମ୍ପୂର୍ଣ୍ଣ ଅଚଳ କରି ରଖିବା ସରକାରଙ୍କ ଉଦ୍ଦେଶ୍ୟ ଥିଲା। ଏହାକୁ ବିରୋଧୀ ଦଳଗୁଡ଼ିକ ନିନ୍ଦା କରୁଛନ୍ତି ବୋଲି ପାର୍ଲାମେଣ୍ଟ ଭବନରୁ ବିଜୟଚୌକ ପର୍ଯ୍ୟନ୍ତ ତ୍ରିରଙ୍ଗା ଶୋଭାଯାତ୍ରା ପରେ କନ୍ଷ୍ଟିଚ୍ୟୁଶନ କ୍ଲବ୍ଠାରେ ମିଳିତ ଖବରଦାତା ସମ୍ମିଳନୀରେ ଖାର୍ଗେ କହିଛନ୍ତି। ସରକାର ଗଣତନ୍ତ୍ର ଉପରେ ବହୁତ କଥା କହୁଛନ୍ତି, କିନ୍ତୁ ଗଣତାନ୍ତ୍ରିକ ନିୟମାବଳୀ ପାଳନ କରୁନାହାନ୍ତି। ଗଣତନ୍ତ୍ର ଓ ସମ୍ବିଧାନ ପାଇଁ ବିରୋଧୀ ଦଳଗୁଡ଼ିକ ଏକାଠି ଲଢ଼ିବେ ବୋଲି କଂଗ୍ରେସ ଅଧ୍ୟକ୍ଷ କହିଛନ୍ତି।
