ପୁରୀ ଅଫିସ,୨୬ା୧୨: ପୁରୀସ୍ଥିତ ଯକ୍ଷ୍ମା ଓ ସଂକ୍ରାମକ (ଟିବି ଆଣ୍ଡ୍ ଆଇଡିଏଚ୍) ରୋଗ ଚିକିତ୍ସାଳୟରେ ବ୍ରଙ୍କୋସ୍କୋପି ଚିକିତ୍ସା ସୁବିଧା ଉପଲବ୍ଧ ହୋଇଛି। ଏହାପୂର୍ବରୁ କୌଣସି ଜିଲାସ୍ତରୀୟ ଡାକ୍ତରଖାନାରେ ଏହି ଚିକିତ୍ସା ସୁବିଧା ନ ଥିଲା। ରାଜ୍ୟରେ ପୁରୀ ପ୍ରଥମ ଜିଲା ଭାବେ ଏଭଳି ସୁବିଧା ପାଇପାରିଛି। ବ୍ରଙ୍କୋସ୍କୋପି ଦ୍ୱାରା ଫୁସଫୁସ୍ ସମ୍ବନ୍ଧିତ ସମସ୍ତ ରୋଗର ଡାଇଗ୍ନୋସିସ୍ କରାଯାଇପାରିବ। କୋଭିଡ୍-୧୯, ଯକ୍ଷ୍ମା, କ୍ୟାନ୍ସର ଭଳି ରୋଗକୁ ଚିହ୍ନଟ କରିବାରେ ଏହି ଯନ୍ତ୍ର ବିଶେଷ ଭାବେ ସହାୟକ ହେବ। ଏହାଦ୍ୱାରା ଫୁସଫୁସ୍ଜନିତ ବିଭିନ୍ନ ଅସ୍ତ୍ରୋପଚାର ମଧ୍ୟ ହୋଇପାରିବ। ଛାତିରୁ କଫ, ପୂଯ ଭଳି ଜମି ରହିଥିବା ତରଳ ପଦାର୍ଥକୁ ନିଷ୍କାସନ କରିବାରେ ଏହି ଯନ୍ତ୍ର ସହାୟକ ହେବ। ଏଥିସହ ଫୁସଫୁସରେ ଜମା ହୋଇଥିବା ବାୟୁକୁ ମଧ୍ୟ ନିଷ୍କାସନ କରାଯାଇପାରିବ। ସେହିଭଳି ଯକ୍ଷ୍ମା, କ୍ୟାନ୍ସର ଓ ଫୁସ୍ଫୁସ୍ରେ ହେଉଥିବା ଅନ୍ୟ ସଂକ୍ରମିତ ରୋଗକୁ ମୁକାବିଲା କରିବା ପାଇଁ ବ୍ରଙ୍କୋସ୍କୋପି ସହାୟକ ହେବ।
ଉଲ୍ଲେଖଯୋଗ୍ୟ, ପୁରୀରେ ଏହି ସୁବିଧା ଉପଲବ୍ଧ ହେବା ପରେ ଗୁରୁବାର ଯକ୍ଷ୍ମାରେ ପୀଡ଼ିତ ଜଣେ ମହିଳାଙ୍କର ସଫଳ ଅସ୍ତ୍ରୋପଚାର ହୋଇଛି। ତାଙ୍କ ଫୁସଫୁସରେ ପୂଯ ଜମାହୋଇ ସଂକ୍ରମଣ ବ୍ୟାପୁଥିବାରୁ ଏହି ଅସ୍ତ୍ରୋପଚାର କରାଯାଇଛି। ସେହିଭଳି ବ୍ରଙ୍କୋସ୍କୋପି ସୁବିଧା ପୁରୀରେ ଉପଲବ୍ଧ ହେବା ପରେ ଜନସାଧାରଣ ଖୁସିବ୍ୟକ୍ତ କରିଛନ୍ତି। ଡାକ୍ତରଖାନା କର୍ତ୍ତୃପକ୍ଷ କହିଛନ୍ତି ଯେ, ଜିଲାସ୍ତରରେ ଏଭଳି ଚିକିତ୍ସା ସୁବିଧା ଯୋଗାଇବାରେ ପୁରୀ ପ୍ରଥମ ଜିଲା ଭାବେ ଗଣାଯିବ। ଏପରି କି ଭୁବନେଶ୍ୱରସ୍ଥ କ୍ୟାପିଟାଲ୍ ହସ୍ପିଟାଲରେ ମଧ୍ୟ ଏହି ସୁବିଧା ଉପଲବ୍ଧ ନାହିଁ।
