ମାଞ୍ଚେଷ୍ଟର, ୨୮।୭: ଭ୍ରମଣକାରୀ ଓ୍ବେଷ୍ଟଇଣ୍ଡିଜ ବିପକ୍ଷରେ ଏଠାରେ ଚାଲିଥିବା ଅନ୍ତିମ ତଥା ୩ୟ ଟେଷ୍ଟ ଅବସରରେ ଇଂଲଣ୍ଡର ଦ୍ରୁତ ବୋଲର ଷ୍ଟୁଆର୍ଟ ବ୍ରଡ୍ ଏକ ଉଲ୍ଲେଖନୀୟ ସଫଳତା ହାସଲ କରିଛନ୍ତି। ଟେଷ୍ଟ କ୍ରିକେଟ୍ ଇତିହାସରେ ବିଶ୍ୱର ୭ମ ବୋଲର ଭାବେ ବ୍ରଡ୍ ୫୦୦ ଉଇକେଟ୍ ହାସଲ କରିବାରେ ସଫଳ ହୋଇଛନ୍ତି। ମଙ୍ଗଳବାର ମ୍ୟାଚ୍ର ଅନ୍ତିମ ତଥା ୫ମ ଦିବସରେ ଓ୍ବେଷ୍ଟଇଣ୍ଡିଜ ଓପନର୍ କ୍ରେଗ୍ ବାର୍ଥଓ୍ବେଟ୍ (୧୯ ରନ)ଙ୍କୁ ଏଲ୍ବିଡବ୍ଲ୍ୟୁ କରି ୩୪ ବର୍ଷୀୟ ବ୍ରଡ୍ ଏହି ମାଇଲଖୁଣ୍ଟ ହାସଲ କରିଥିଲେ। ଦ୍ୱିତୀୟ ଇଂଲଣ୍ଡ ବୋଲର ଭାବେ ସେ ୫୦୦ ଉଇକେଟ୍ ନେଇଛନ୍ତି। ବ୍ରଡ୍ଙ୍କ ପୂର୍ବରୁ ଜେମ୍ସ ଆଣ୍ଡରସନ (୫୮୯ ଉଇକେଟ୍) ପ୍ରଥମ ଇଂଲଣ୍ଡ ବୋଲର ଭାବେ ଟେଷ୍ଟ କ୍ରିକେଟ୍ରେ ଏହି ସଫଳତା ପାଇଥିଲେ। ତେବେ ଟେଷ୍ଟ କ୍ରିକେଟ୍ରେ ସର୍ବାଧିକ ଉଇକେଟ୍ ନେଇଥିବା ବୋଲର ତାଲିକାରେ ଶ୍ରୀଲଙ୍କାର ମୁଥିୟା ମୁରଲୀଥରନ (୮୦୦ ଉଇକେଟ୍) ସର୍ବାଗ୍ରେ ରହିଛନ୍ତି। ଅଷ୍ଟ୍ରେଲିଆର ଶେନ ଓ୍ବର୍ନ (୭୦୮), ଭାରତର ଅନିଲ କୁମ୍ବଲେ (୬୧୯), ଆଣ୍ଡରସନ (୫୮୯), ଗ୍ଲେନ ମ୍ୟକ୍ଗ୍ରା (୫୬୩), କର୍ଟନୀ ଓ୍ବାଲ୍ସ (୫୧୯) ଓ ଷ୍ଟୁଆର୍ଟ ବ୍ରଡ୍ ଯଥାକ୍ରମେ ତାଲିକାର ୨ୟରୁ ୭ମ ସ୍ଥାନ ମଧ୍ୟରେ ରହିଛନ୍ତି।
