ନୂଆଦିଲ୍ଲୀ,୧୯।୧: ଅଷ୍ଟ୍ରେଲିଆର ବ୍ରିସବେନଠାରେ ଖଳାଯାଇଥିବା ଚତୁର୍ଥ ଟେଷ୍ଟକୁ ୩ ଉଇକେଟରେ ଜିତି ଭାରତୀୟ ଦଳ ଇତିହାସ ସୃଷ୍ଟି କରିଛି। ମ୍ୟାଚ୍ରେ ଗୁରୁତ୍ୱପୂର୍ଣ୍ଣ ଇନିଂସ ଖେଳିଥିଲେ ଋଷଭ ପନ୍ତ ଓ ଶୁବମନ ଗିଲ। ଏହି ଦୁଇ ଖେଳାଳିଙ୍କ ବ୍ୟତୀତ ଦଳର ସିନିୟର ବ୍ୟାଟ୍ସମ୍ୟାନ ଚେତ୍ତେଶ୍ୱର ପୂଜାରାଙ୍କ ଯୋଗଦାନ ମଧ୍ୟ ଖୁବ୍ ଗୁରୁତ୍ୱପୂର୍ଣ୍ଣ ଥିଲା। ଚିରାଚରିତ ଷ୍ଟାଇଲରେ ସେ ଧୀମା ବ୍ୟାଟିଂ କରିଥିଲେ । ହେଲେ ବ୍ୟାଟିଂ କରୁଥିବାବେଳେ ତାଙ୍କୁ ବାରମ୍ବାର ଆଘାତ ଦେଇଥିଲା ଅଷ୍ଟ୍ରେଲିଆନ ପେସରଙ୍କ ବାଉନ୍ସର।
୩୨ ବର୍ଷୀୟ ପୂଜାରାଙ୍କୁ ଆଉଟ୍ କରିବା ପାଇଁ ମିଚେଲ ଷ୍ଟାର୍କ, ପାଟ କୁମିନ୍ସ ଓ ଜୋସ ହାଜେଲଉଡ୍ ଆପଣେଇଥିଲେ ଶର୍ଟ ବଲ ଷ୍ଟାଟେଜି। ଏଥିଯୋଗୁ ବାରମ୍ବାର ଆଘାତ ପାଇଥିଲେ ଡାହାଣହାତୀ ସ୍ବୌରାଷ୍ଟ୍ର ବ୍ୟାଟ୍ସମ୍ୟାନ। ଏପରି କି ୩ ଥର ଟିମ୍ ଇଣ୍ଡିଆର ଫିଜିଓଙ୍କୁ ତାଙ୍କ ପାଇଁ ପଡ଼ିଆ ମଧ୍ୟକୁ ଆସିବାକୁ ପଡ଼ିଥିଲା। ହେଲମେଟ୍ର ଭାଇଜର ଭାଙ୍ଗିବାଠୁ ଆରମ୍ଭ କରି ହାତରେ ଆଘାତ ପାଇଥିଲେ ପୂଜାରା। ଯନ୍ତ୍ରଣାରେ ଛଟପଟ ହେଉଥିବା ମଧ୍ୟ ତାଙ୍କୁ ଦେଖିବାକୁ ମିଳିଥିଲା। ଏହାସତ୍ତ୍ୱେ ସେ ଧୈର୍ଯ୍ୟହରା ହୋଇ ନ ଥିଲେ। ଅନ୍ତିମ ସେସନରେ ପୂଜାରା ୨୧୧ ବଲର ସମ୍ମୁଖୀନ ହୋଇ ୫୬ ରନ୍ କରି ଆଉଟ୍ ହୋଇଥିଲେ। ସେ ଚତୁର୍ଥ ଉଇକେଟ ପାଇଁ ଋଷଭ ପନ୍ତଙ୍କ ସହ ଗୁରୁତ୍ୱପୂର୍ଣ୍ଣ ୬୧ ରନ୍ ଯୋଡ଼ିଥିଲେ।
