ଭୁବନ, ୨୧ା୭(ଡି.ଏନ୍.ଏ.) – ଢେଙ୍କାନାଳ ଜିଲା ଭୁବନ ବ୍ଲକ ଧଳପଡ଼ା ଗ୍ରାମ ନିକଟରେ ନବନିର୍ମିତ ରେଙ୍ଗାଳି ମୁଖ୍ୟକେନାଲର ଡିଷ୍ଟ୍ରିବ୍ୟୁଟାରୀ କେନାଲ ମଙ୍ଗଳବାର ଭାଙ୍ଗିଯାଇଛି। ଏଥିରେ ବହୁ ଚାଷୀଙ୍କ ଧାନତଳି ଭାସିଯିବା ସହ ଜମିରେ ମାଟି ମାଡ଼ିଯାଇଛି। ୪ଦିନ ତଳେ ପରୀକ୍ଷାମୂଳକ ଭାବେ ଉଦ୍ଘାଟିତ ହୋଇଥିବା ଏହି କେନାଲରେ ଘାଇ ସୃଷ୍ଟି ହେବା ନିର୍ମାଣର ସ୍ଥାୟିତ୍ୱ ଉପରେ ପ୍ରଶ୍ନବାଚୀ ସୃଷ୍ଟି କରିଛି।
ଭୁବନ ବ୍ଲକର ଚାଷୀଙ୍କ ବହୁ ପ୍ରତୀକ୍ଷିତ ରେଙ୍ଗାଳି ବାମ କେନାଲ ଜାଇକା ସେଚପ୍ରକଳ୍ପ ଗତ ୧୫ ତାରିଖରେ ପରୀକ୍ଷାମୂଳକ ଭାବେ ଶୁଭାରମ୍ଭ ହୋଇଥିଲା। ଖଣିମନ୍ତ୍ରୀ ପ୍ରଫୁଲ୍ଲ କୁମାର ମଲ୍ଲିକ ମୁଖ୍ୟଅତିଥି ଭାବେ ଯୋଗଦେଇ ଏହାର ଉଦ୍ଘାଟନ କରିଥିଲେ। ଏହି ପ୍ରକଳ୍ପ ମାଧ୍ୟମରେ କେନାଲ ପାର୍ଶ୍ୱବର୍ତ୍ତୀ ଖରିଫ ଚାଷ କରାଯାଇଥିବା ୫,୮୪୭ ହେକ୍ଟର ଜମିକୁ ପାଣି ମାଡ଼ିବ। ଏଥିପାଇଁ ଗୋଟିଏ ଶାଖା କେନାଲ, ୩ଟି ଡିଷ୍ଟ୍ରିବ୍ୟୁଟାରୀ, ୬୩ଟି ମାଇନର ଏବଂ ସବ୍ମାଇନର କେନାଲ ନିର୍ମାଣ କାର୍ଯ୍ୟ ଶେଷ ହୋଇଛି। ଏହାଦ୍ୱାରା ୨୦୨୧ ଖରିଫ ଋତୁରେ ୪୩ ଗ୍ରାମର ଚାଷୀ ଉପକୃତ ହୋଇପାରିବେ ବୋଲି ମନ୍ତ୍ରୀ ସୂଚନା ଦେଇଥିଲେ। ତେବେ ଉଦ୍ଘାଟନର ୪ଦିନ ପରେ ଧଳପଡ଼ା ଡିଷ୍ଟ୍ରିବ୍ୟୁଟାରୀ କେନାଲରେ ଘାଇ ସୃଷ୍ଟି ହୋଇଛି।
ପ୍ରକଳ୍ପ ଶୁଭାରମ୍ଭ ସତ୍ତ୍ୱେ ଅନଳ, ମଝିପାଳ, ଦର୍ଜନୀ, ଯୋରାଗାଡିଆ ଓ କୁନିନ୍ଦା ପଞ୍ଚାୟତର କୁମୁରୁସିଙ୍ଗା, କେନ୍ଦୁପଡ଼ା, ରେନନ୍ଦାପାଟଣା, କୁନିନ୍ଦା ଅଞ୍ଚଳର ଚାଷଜମିକୁ ଡିଷ୍ଟ୍ରିବ୍ୟୁଟର କେନାଲ ପାଣି ପହଞ୍ଚୁ ନ ଥିଲା। ଏ ନେଇ ଚାଷୀମାନେ ବିଭାଗୀୟ ଅଧିକାରୀଙ୍କ ନିକଟରେ ଅଭିଯୋଗ କରିବା ପରେ ପାଣି ଛଡ଼ାଯାଇଥିଲା। ହେଲେ ଅଧିକ ପାଣି ଛଡ଼ାଯିବାରୁ କେନାଲରେ ଘାଇ ସୃଷ୍ଟି ହେବା ସହ ଚାଷ ଜମିରେ ମାଟି ମାଡ଼ିଯାଇଛି। ଜଳସ୍ରୋତରେ ଧାନ ତଳି ଭାସିଯାଇଥିବା କେତେଜଣ ଚାଷୀ ଅଭିଯୋଗ କରିଛନ୍ତି। ତୁରନ୍ତ କ୍ଷୟକ୍ଷତି ଆକଳନ କରି କ୍ଷତିପୂରଣ ଦେବାକୁ କ୍ଷତିଗ୍ରସ୍ତ ଚାଷୀମାନେ ଦାବି କରିଛନ୍ତି। ଏ ସଂକ୍ରାନ୍ତରେ ବିଭାଗୀୟ ଯନ୍ତ୍ରୀ ଦୀପକ ରଞ୍ଜନ ବେହେରା କୁହନ୍ତି, ନବନିର୍ମିତ କେନାଲ ହୁଡ଼ାରେ ନୂଆମାଟି ପକାଯାଇଥିଲା। ଅଧିକ ପାଣି ଆସିବାରୁ ଘାଟି ସୃଷ୍ଟି ହୋଇଛି। ତୁରନ୍ତ ଏହାକୁ ମରାମତି କରାଯିବ ବୋଲି ସେ ସୂଚନା ଦେଇଛନ୍ତି।
