ଭୁବନେଶ୍ୱର,୧।୫: ବ୍ୟାଙ୍କ ଅଫ୍ ମହାରାଷ୍ଟ୍ର (ବିଓଏମ୍)ର ନିର୍ଦ୍ଦେଶକ ମଣ୍ଡଳୀ ବୈଠକ ନିକଟରେ ଅନୁଷ୍ଠିତ ହୋଇଯାଇଛି। ଉକ୍ତ ବୈଠକରେ ବ୍ୟାଙ୍କର କାରବାର ଓ ଆଗାମୀ କାର୍ଯ୍ୟକଳାପ ସହ ୨୦୨୩-୨୪ ଆର୍ଥିକ ବର୍ଷର ୪ର୍ଥ ତ୍ରୈମାସିକ ଫଳାଫଳ ମଧ୍ୟ ଘୋଷଣା କରାଯାଇଛି। ସେହିଭଳି ଜାନୁଆରୀରୁ ମାର୍ଚ୍ଚ ତ୍ରୈମାସରେ ବ୍ୟାଙ୍କ ମୋଟ ୪୫% ଅଭିବୃଦ୍ଧି ହାର ହାସଲକରି ୧,୨୧୮କୋଟି ଟଙ୍କାର ନେଟ୍ ଲାଭ ସଂଗ୍ରହ କରିପାରିଥିଲାବେଳେ ବ୍ୟାଙ୍କର ନେଟ୍ ସୁଧ ଆୟ ଓ ଅଣ-ସୁଧ ଆୟରେ ବୃଦ୍ଧି ଏବଂ ନିମ୍ନତମ ଟ୍ୟାକ୍ସ ବ୍ୟବସ୍ଥା ଦ୍ୱାରା ଏହି ଅଭିବୃଦ୍ଧି ସମ୍ଭବ ହୋଇପାରିଛି।
ସେହିଭଳି ବ୍ୟାଙ୍କ ଚଳିତ ଆର୍ଥିକ ବର୍ଷ ମଧ୍ୟରେ ପ୍ରତି ଇକ୍ୟୁଟି ଶେୟାର ପାଇଁ ୧.୪୦ର ଲାଭାଂଶ ଘୋଷଣା କରିଥିବାବେଳେ ୨୦୨୪-୨୫ ଆର୍ଥିକ ବର୍ଷରେ ଇକ୍ୟୁଟି ଇସ୍ୟୁ କରିବା ସହ ୭,୫୦୦କୋଟିର ପୁଞ୍ଜି ବୃଦ୍ଧି ପାଇଁ ଅନୁମତି ପ୍ରଦାନ କରିଛି।
ଏ ସମ୍ପର୍କରେ ବ୍ୟାଙ୍କର ପରିଚାଳନା ନିର୍ଦ୍ଦେଶକ ତଥା ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ନିଧୁ ସକ୍ସେନା କହିଛନ୍ତି, ବ୍ୟାଙ୍କ ଲଗାତର ୧୫ଟି ତ୍ରୈମାସ ଧରି ଲାଭପ୍ରଦ ରହିଥିବାବେଳେ ନିଜର ଅଭିବୃଦ୍ଧି ବଜାୟ ରଖିପାରିଛି। ଏପରିକି ବ୍ୟାଙ୍କର ନେଟ୍ ସୁଧ ଆୟ ୧୮% ଅଭିବୃଦ୍ଧି ହାର ହାସଲକରି ୨,୫୮୪ କୋଟି ଟଙ୍କାରେ ପହଞ୍ଚତ୍ଛି। ବ୍ୟାଙ୍କର ନେଟ୍ ଇଣ୍ଟରେଷ୍ଟ ମାର୍ଜିନ୍ (ଏନ୍ଆଇଏମ୍) ୩.୯୨% କୁ ବୃଦ୍ଧି ପାଇଛି। ବ୍ୟାଙ୍କର ଗ୍ରସ୍ ଏନ୍ପିଏ କିମ୍ବା ଅନାଦେୟ ଋଣ ୧.୮୮%କୁ ହ୍ରାସ ପାଇଥିବାବେଳେ ନେଟ୍ ଏନ୍ପିଏ ୦.୨୦%କୁ ହ୍ରାସ ପାଇଛି। ବ୍ୟାଙ୍କର ଗ୍ରସ୍ ଅଗ୍ରିମ ଆର୍ଥିକ ବର୍ଷ ୨୦୨୪ ମାର୍ଚ୍ଚ ଶେଷ ସୁଦ୍ଧା ୧୬.୩୦% ବୃଦ୍ଧି ପାଇ ୨,୦୩,୬୬୪ କୋଟି ଟଙ୍କାରେ ପହଞ୍ଚତ୍ଛି। ବ୍ୟାଙ୍କର ସମୁଦାୟ ଜମା ୨୦୨୪ ମାର୍ଚ୍ଚ ଶେଷ ସୁଦ୍ଧା ୧୫.୬୬% ବୃଦ୍ଧି ପାଇ ୨,୭୦,୭୪୭ କୋଟି ଟଙ୍କାରେ ପହଞ୍ଚତ୍ଛି। ସକ୍ସେନା କହିଛନ୍ତି, ବ୍ୟାଙ୍କ ଆର୍ଥିକ ବର୍ଷ ୨୦୨୫ରେ ଅଗ୍ରିମ ଏବଂ ଜମା ରାଶିରେ ଯଥାକ୍ରମେ ୧୬ ରୁ ୨୦% ଓ ୧୨ ରୁ ୧୫% ବୃଦ୍ଧିର ଆଶା ରଖିଛି।
