କର୍ନାଟକ ଜ୍ଞାନ କୌଶଳ ଆପଣେଇବ ବିଏମ୍‌ସି
8:32 amAugust 8, 2022August 8, 2022 / 05

ଭୁବନେଶ୍ୱର,୮।୮(ବ୍ୟୁରୋ): ବିଏମ୍‌ସି ଟିମ୍‌ ରବିବାର ଦୁଇଦିନିଆ କର୍ନାଟକ ଗସ୍ତରୁ ଫେରିଛନ୍ତି। କର୍ନାଟକରେ ଥିବା ମାରାଗୋଣ୍ଡାନାହାଲ୍ଲି ହ୍ରଦ, ହୁସ୍‌କୁର୍‌ ପାର୍କ ଏବଂ ଅନ୍ୟାନ୍ୟ ସ୍ଥାନରେ ଥିବା ଜଳଉତ୍ସଗୁଡିକୁ ବୁଲି ଦେଖିବା ସହିତ ତା’ର ପୁନରୁଦ୍ଧାର ପଦ୍ଧତି ସମ୍ପର୍କରେ ଅବଗତ ହୋଇଛନ୍ତି। କର୍ନାଟକରେ ଥିବା ଜଳଉତ୍ସଗୁଡିକର ପୁନରୁଦ୍ଧାର ଉନ୍ନତମାନର ହୋଇଥିବାରୁ ସେହି ଜ୍ଞାନ କୌଶଳକୁ ଏଠାରେ ପ୍ରୟୋଗ କରିବା ପାଇଁ ବିଏମ୍‌ସି ପକ୍ଷରୁ ଯାତ୍ରା କରାଯାଇଥିଲା। ଏ ସମ୍ପର୍କରେ କମିଶନର ବିଜୟ ଅମୃତା କୁଲାଙ୍ଗେ କହିଛନ୍ତି, ଭୁବନେଶ୍ୱରରେ ଥିବା ୪୪ଟି ଜଳଉତ୍ସଗୁଡିକର ପୁନରୁଦ୍ଧାର କାର୍ଯ୍ୟ ବିଏମ୍‌ସି ଆରମ୍ଭ କରିବ। ମୁଖ୍ୟମନ୍ତ୍ରୀ କର୍ମତତ୍ପର ଅଭିଯାନ (ମୁକ୍ତା) ଯୋଜନା ଅଧୀନରେ କାମ କରାଯିବ। ଏହାକୁ କିଭଳି ଅଧିକ ଉନ୍ନତମାନର କରାଯାଇ ପାରିବ ସେ ସମ୍ପର୍କରେ ଜାଣିବା ପାଇଁ ବିଏମ୍‌ସି ଟିମ୍‌ କର୍ନାଟକ ଯାଇଥିଲା। ତେବେ ସେଠାରେ ଜଳଉତ୍ସର ପୁନରୁଦ୍ଧାର ପାଇଁ ଆପଣାଯାଉଥିବା ପଦ୍ଧତି ମଧ୍ୟରୁ କିଛି କିଛି ଏଠାରେ ପୂର୍ବରୁ ପ୍ରୟୋଗ କରାଯାଉଛି। ଏହାବାଦ୍‌ ସେଠାକାର ସମସ୍ତ ପ୍ରଣାଳୀକୁ ଏଠାରେ ପ୍ରୟୋଗ କରିବା ପାଇଁ ପ୍ରଥମେ ଭିତ୍ତିଭୂମି ଉପରେ ଗୁରୁତ୍ୱାରୋପ କରିବାକୁ ପଡିବ। ଏ ସମ୍ପର୍କରେ ଅଧିକାରୀଙ୍କ ସହ ଆଲୋଚନା କରାଯିବ ଏବଂ ଆବଶ୍ୟକ ଅନୁଯାୟୀ ପଦକ୍ଷେପ ନିଆଯିବ ବୋଲି କମିଶନର କହିଛନ୍ତି।
ସୂଚନାଯୋଗ୍ୟ, ଏକ ୧୫ ଜଣିଆ ଟିମ୍‌ ଶୁକ୍ରବାର କର୍ନାଟକ ଗସ୍ତରେ ଯାଇଥିଲେ। ଅର୍ବାନ ଡିପାର୍ଟମେଣ୍ଟ ପକ୍ଷରୁ ଏହି ଗସ୍ତ କାର୍ଯ୍ୟକ୍ରମ କରାଯାଇଥିଲା। ଏଥିରେ କମିଶନରଙ୍କ ସମେତ ମେୟର ସୁଲୋଚନା ଦାସ, ସିଟି ଇଞ୍ଜିନିୟର ଅରୁଣ ନାୟକ, ଏକ୍‌ଜିକ୍ୟୁଟିଭ୍‌ ଇଞ୍ଜିନିୟର ଗୌତମ ଦାସ, କର୍ପୋରେଟର ଏବଂ ଅନ୍ୟାନ୍ୟ ଅଧିକାରୀ ଥିଲେ। ଏହା ପୂର୍ବରୁ କର୍ନାଟକ ସରକାରଙ୍କ ମ୍ୟୁନିସିପାଲିଟି ଆଡମିନିଷ୍ଟ୍ରେସନର ବିଭିନ୍ନ ସହରାଞ୍ଚଳ ସ୍ଥାନୀୟ ସଂସ୍ଥା (ୟୁଏଲ୍‌ବି) ଏବଂ ଲାଇନ ବିଭାଗର ପ୍ରତିନିଧିତ୍ୱ କରୁଥିବା ୪୩ ଜଣ ଅଧିକାରୀଙ୍କ ଏକ ଟିମ୍‌ ଜୁଲାଇ ୨୮ରେ ଭୁବନେଶ୍ୱର ଆସିଥିଲେ। ସେମାନେ ଏଠାରେ ବିଏମ୍‌ସିର ବିଭିନ୍ନ ପ୍ରକଳ୍ପ ପରିଦର୍ଶନ କରି ପ୍ରଶଂସା କରିଥିଲେ।